Hyderabad: హైదరాబాద్ నగరంలో దారుణ ఘటన చోటు చేసుకుంది. కేవలం ఇద్దరి మధ్య జరుగుతున్న చిన్న గొడవను ఆపేందుకు ప్రయత్నించిన ఒక యువకుడు ప్రాణాలు కోల్పోయాడు. ఈ సంఘటన ఆదివారం రాత్రి టోలిచౌకి పోలీస్ స్టేషన్ పరిధిలోని పారామౌంట్ కాలనీ, గేట్ నంబర్-4 దగ్గర జరిగింది. ఈ హత్యతో స్థానికంగా తీవ్ర కలకలం రేగింది.
వివరాల్లోకి వెళితే… ఇర్ఫాన్ (24) అనే యువకుడి సోదరుడు అద్నాన్, మరొక యువకుడు బిలాల్ మధ్య ఏదో విషయంలో గొడవ జరిగింది. ఈ విషయం తెలుసుకున్న ఇర్ఫాన్ వెంటనే ఘటనా స్థలానికి చేరుకున్నాడు. వాళ్ళిద్దరి మధ్య ఘర్షణను ఆపేందుకు ప్రయత్నించాడు. ఈ క్రమంలో, ఆగ్రహంతో ఉన్న బిలాల్ తన దగ్గర ఉన్న కత్తితో ఇర్ఫాన్పై అకస్మాత్తుగా దాడి చేశాడు.
కత్తిపోట్లకు గురైన ఇర్ఫాన్ తీవ్రంగా గాయపడ్డాడు. వెంటనే స్థానికులు అతన్ని ఆస్పత్రికి తరలించే ప్రయత్నం చేశారు, కానీ దురదృష్టవశాత్తూ మార్గమధ్యలోనే ఇర్ఫాన్ ప్రాణాలు కోల్పోయాడు. సమాచారం అందుకున్న పోలీసులు వెంటనే ఘటనా స్థలానికి చేరుకున్నారు. నిందితుడు బిలాల్ను పోలీసులు వెంటనే అదుపులోకి తీసుకున్నారు. ఈ గొడవకు, హత్యకు గల అసలు కారణాలు ఏమై ఉంటాయనే దానిపై పోలీసులు కేసు నమోదు చేసి దర్యాప్తు చేస్తున్నారు.