Hyderabad: సంక్రాంతి పండుగ అనగానే ఆకాశమంతటా రంగురంగుల గాలిపటాల సందడి గుర్తుకొస్తుంది. అయితే, ఈ వేడుకల్లో వినోదం వెనుక దాగి ఉన్న ప్రాణాంతక ‘చైనా మాంజా’పై హైదరాబాద్ పోలీసులు ఇప్పుడు ఉక్కుపాదం మోపుతున్నారు. ప్రజల ప్రాణాలకు, పక్షుల మనుగడకు ముప్పుగా మారిన ఈ నిషేధిత దారాల విక్రయాలపై నగర పోలీస్ కమిషనర్ సజ్జనార్ నేతృత్వంలో టాస్క్ ఫోర్స్ బృందాలు మెరుపు దాడులు నిర్వహిస్తున్నాయి. గురువారం (జనవరి 8, 2026) జరిగిన ప్రెస్ మీట్లో సీపీ సజ్జనార్ ఈ ఆపరేషన్కు సంబంధించిన సంచలన వివరాలను వెల్లడించారు.
నగరవ్యాప్తంగా సాగిన ఈ సోదాల్లో పోలీసులు ఇప్పటివరకు సుమారు రూ. 1.24 కోట్ల విలువైన చైనా మాంజాను స్వాధీనం చేసుకున్నారు. మొత్తం 103 కేసులు నమోదు కాగా, ఈ అక్రమ విక్రయాలకు పాల్పడుతున్న 143 మందిని అదుపులోకి తీసుకున్నారు. ఇందులో 5,226 మాంజా బాబిన్లను సీజ్ చేసినట్లు అధికారులు తెలిపారు. ఈ నిషేధిత మాంజాను ప్రధానంగా ఢిల్లీ, సూరత్, మరియు మహారాష్ట్రల నుంచి అక్రమంగా సిటీకి తెప్పిస్తున్నట్లు పోలీసులు గుర్తించారు. ముఖ్యంగా ఈ ఆపరేషన్లో సిటీ టాస్క్ ఫోర్స్ కీలక పాత్ర పోషించి, అత్యధికంగా 67 కేసులను నమోదు చేసింది.
ఇది కూడా చదవండి: ED Raids: కోల్కతాలో ఈడీ వర్సెస్ దీదీ.. ఐప్యాక్ కార్యాలయంలో సోదాలు
నగరంలోని వివిధ జోన్ల వారీగా చూస్తే, సౌత్ వెస్ట్ జోన్ 34 కేసులతో అగ్రస్థానంలో ఉండగా, సౌత్ జోన్లో 27, ఈస్ట్ జోన్లో 18 కేసులు నమోదయ్యాయి. మిగిలిన జోన్లలో కూడా పోలీసులు నిరంతర నిఘా కొనసాగిస్తున్నారు. కేవలం దాడులకే పరిమితం కాకుండా, చైనా మాంజా వల్ల కలిగే నష్టాలపై సీపీ సజ్జనార్ ప్రజలను హెచ్చరించారు. ఈ మాంజా తయారీలో ప్లాస్టిక్, గాజు పెంకులు మరియు మెటాలిక్ కోటింగ్ వాడుతారని, దీనివల్ల గాలిపటాలు ఎగురవేసే చిన్నారులకు విద్యుత్ షాక్ తగిలే ప్రమాదం ఉందని ఆయన ఆందోళన వ్యక్తం చేశారు. గతంలో ఈ దారాల వల్ల మనుషుల గొంతులు కోసుకుపోయిన మరియు వేల సంఖ్యలో పక్షులు ప్రాణాలు కోల్పోయిన విషాద ఘటనలను ఆయన గుర్తు చేశారు.
ఆనందంగా జరుపుకోవాల్సిన పండుగ మరొకరి ప్రాణాలకు శాపంగా మారకూడదని, తల్లిదండ్రులు తమ పిల్లలకు కేవలం నూలు దారాలను (Cotton Thread) మాత్రమే కొనివ్వాలని పోలీసులు విజ్ఞప్తి చేస్తున్నారు. నిబంధనలను అతిక్రమించి నిషేధిత మాంజాను విక్రయించే వారిపై ‘ప్రివెంటివ్ డిటెన్షన్’ (PD) యాక్ట్ వంటి కఠిన చట్టాల కింద చర్యలు తీసుకుంటామని సీపీ హెచ్చరించారు. సంక్రాంతి సంబరాలు సురక్షితంగా జరుపుకోవాలన్నదే పోలీసుల ఆకాంక్ష.