IndiGo Flights Crisis: దేశీయ విమానయాన రంగంలో ప్రముఖ సంస్థ ఇండిగో ఎయిర్లైన్స్ గత నాలుగు రోజులుగా తీవ్ర సంక్షోభంలో కూరుకుపోయింది. సిబ్బంది కొరత, నిర్వహణ సమస్యల కారణంగా వందలాది విమాన సర్వీసులు రద్దవుతున్నాయి, ఆలస్యం అవుతున్నాయి. ఈ ప్రభావం దేశంలోని ప్రధాన ఎయిర్పోర్టులపై పడి, వేలాది మంది ప్రయాణికులు తీవ్ర ఇబ్బందులకు గురవుతున్నారు.
ఈ సంక్షోభం హైదరాబాద్లోని రాజీవ్ గాంధీ అంతర్జాతీయ విమానాశ్రయం (శంషాబాద్)పై కూడా తీవ్రంగా పడింది. ఇండిగో ఎయిర్లైన్స్ అధికారులు ఒక్క శంషాబాద్ నుంచే ఏకంగా 69 విమాన సర్వీసులను రద్దు చేసినట్టు ప్రకటించారు.
శంషాబాద్లో పడిగాపులు: 69 సర్వీసులు రద్దు!
రద్దు అయిన విమానాల్లో.. 26 విమానాలు ఇతర రాష్ట్రాల నుంచి శంషాబాద్కు రావాల్సినవి ఉన్నాయి. 3 విమానాలు శంషాబాద్ నుంచి ఇతర రాష్ట్రాలకు వెళ్లవలసినవి ఉన్నాయి. ఒక్కసారిగా భారీ సంఖ్యలో విమానాలు రద్దు కావడంతో శంషాబాద్ ఎయిర్పోర్టులో ప్రయాణికులు పడిగాపులు కాస్తున్నారు. తమ గమ్యస్థానాలకు చేరలేక, ఎయిర్పోర్టులోనే చిక్కుకుపోయి తీవ్ర ఆందోళన వ్యక్తం చేస్తున్నారు.
ముందు సమాచారం ఇవ్వకుండా… ప్రయాణికులను వంచన!
ప్రయాణికుల ఆగ్రహానికి ప్రధాన కారణం.. ముందుగా సమాచారం ఇవ్వకపోవడం. తమ విమానాలు రద్దయిన విషయం తెలుసుకున్న ప్రయాణికులు ఇండిగో కౌంటర్ల వద్ద ఆందోళనకు దిగారు. టికెట్ల రీఫండ్ లేదా ప్రత్యామ్నాయ ఏర్పాట్ల గురించి ఇండిగో సిబ్బందిని అడిగినా, వారికి సరైన సమాధానం దొరకడం లేదు. దీంతో ప్రయాణికులు గందరగోళం, ఆగ్రహంతో కౌంటర్ల వద్ద బారులు తీరారు.
ఇది కూడా చదవండి: Harish Rao: హోంగార్డుల సమస్యలు.. నెరవేరని హామీల పర్వం
ముందుగా ఒక మెసేజ్ లేదా ఈమెయిల్ పంపితే, ఎయిర్పోర్టుకు వచ్చి ఇబ్బంది పడేవాళ్లం కాదు కదా? వందలాది మంది ప్రయాణికుల సమయాన్ని, డబ్బును వృథా చేస్తూ ఇండిగో ఏ బాధ్యతా లేకుండా వ్యవహరించడం దారుణం అని ఒక ప్రయాణికుడు ఆగ్రహం వ్యక్తం చేశారు.
డీజీసీఏ నిబంధనలు విరమించుకున్నా తిప్పలు తప్పవా?
గత కొద్ది రోజులుగా ఇండిగో సిబ్బంది కొరతకు, విమానాల రద్దుకు డైరెక్టరేట్ జనరల్ ఆఫ్ సివిల్ ఏవియేషన్ (DGCA) నిబంధనలను కారణంగా చూపుతూ వచ్చారు. అయితే, దేశవ్యాప్తంగా డీజీసీఏ నిబంధనలు కొన్నింటిని ఉపసంహరించుకున్నప్పటికీ, ఇండిగో ప్రయాణికుల తిప్పలు మాత్రం తగ్గడం లేదు.
దేశంలోని ప్రధాన ఎయిర్పోర్టులలో ఈ సంక్షోభం నాలుగో రోజు కూడా కొనసాగుతూనే ఉంది. ఈ అనూహ్య రద్దుల కారణంగా తమ ప్రయాణ ప్లాన్లు పూర్తిగా చెడిపోయాయని, అత్యవసర పనులు కూడా రద్దు చేసుకోవాల్సి వచ్చిందని ప్రయాణికులు వాపోతున్నారు.
ఇండిగో యాజమాన్యం తక్షణమే ఈ సంక్షోభంపై స్పందించాలి. రద్దైన విమానాలకు సంబంధించి ప్రయాణికులకు తగిన ప్రత్యామ్నాయ ఏర్పాట్లు చేసి, జరిగిన అసౌకర్యానికి క్షమాపణ చెప్పి, పరిహారం అందించాలని డిమాండ్ చేయాల్సిన అవసరం ఉంది.