KTR: మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ గారు కాంగ్రెస్ పార్టీపై మరోసారి తీవ్ర స్థాయిలో విరుచుకుపడ్డారు. తెలంగాణ రాష్ట్ర ఏర్పాటు ఉద్యమం మొదలుకొని నేటి వరకు కాంగ్రెస్ పార్టీనే రాష్ట్రానికి పెద్ద విలన్లా వ్యవహరించిందని ఆయన తీవ్రంగా ఆరోపించారు. కేసీఆర్ మొదలుపెట్టిన దీక్షా స్ఫూర్తితోనే తాము ఇంకా పోరాటాన్ని కొనసాగిస్తున్నామని కేటీఆర్ స్పష్టం చేశారు.
కేసీఆర్ పేరు లేకుండా రేవంత్ రెడ్డి మాట్లాడగలరా?
తెలంగాణ భవన్లో మీడియా సమావేశంలో మాట్లాడిన కేటీఆర్, ముఖ్యమంత్రి రేవంత్ రెడ్డిని నేరుగా ప్రశ్నించారు. సీఎం రేవంత్ రెడ్డి గారు మా నాయకుడు కేసీఆర్ పేరు లేకుండా ఒక్క ప్రసంగమైనా చేశారా? అని ఛాలెంజ్ చేశారు. కేసీఆర్పై విమర్శలు చేస్తూనే రేవంత్ రెడ్డి తన ప్రసంగాలను మొదలుపెట్టడంపై ఆయన ఈ వ్యాఖ్యలు చేశారు.
సైలెంట్గా ఉన్న తుపాకీ: కేసీఆర్ గురించి కీలక వ్యాఖ్య
కేసీఆర్ గారు సంవత్సరంన్నర కాలంగా బయట కనిపించడం లేదు అని కొందరు చేస్తున్న విమర్శలపై కేటీఆర్ గట్టి కౌంటర్ ఇచ్చారు. గోడకు వేలాడదీసిన తుపాకీ కూడా నిశ్శబ్దంగానే ఉంటుంది. అయినా, నాయకుడు ఎప్పటికైనా నాయకుడే అంటూ కేసీఆర్ బలం, పట్టుదల గురించి కీలక వ్యాఖ్యలు చేశారు. సమయం వచ్చినప్పుడు కేసీఆర్ గారు మళ్లీ తన పాత్ర పోషిస్తారని పరోక్షంగా తెలిపారు.
పార్టీ మారిన ఎమ్మెల్యేలపై కేటీఆర్ సవాల్
పార్టీ మారి కాంగ్రెస్లో చేరిన ఎమ్మెల్యేలపైనా కేటీఆర్ తీవ్రంగా మండిపడ్డారు. పార్టీ మారిన ఆ పది మంది ఎమ్మెల్యేలు ధైర్యంగా తమ పదవులకు రాజీనామా చేసి, మళ్లీ ఎన్నికల్లో పోటీ చేస్తే సంగతి తెలుస్తుంది” అని ఆయన సవాలు విసిరారు.
చివరగా, రాష్ట్రంలోని కాంగ్రెస్ ప్రభుత్వంపై కేటీఆర్ ఆందోళన వ్యక్తం చేశారు. తెలంగాణ తల్లిని అవమానించే ప్రయత్నం కాంగ్రెస్ చేస్తోంది. తెలంగాణ తల్లి విగ్రహాన్ని తీసి, దాని స్థానంలో కాంగ్రెస్ తల్లిని పెట్టారు” అంటూ అధికార పార్టీ తీరుపై ఆయన ఆగ్రహం వ్యక్తం చేశారు. తెలంగాణ ప్రజల మనోభావాలను దెబ్బతీసే విధంగా కాంగ్రెస్ పార్టీ వ్యవహరిస్తోందని ఆయన విమర్శించారు.