Road Accident: మహబూబ్నగర్ జిల్లా, హన్వాడ మండలం పిల్లిగుండు సమీపంలో 167వ నంబర్ జాతీయ రహదారిపై ఈరోజు తెల్లవారుజామున ఒక ఘోర రోడ్డు ప్రమాదం జరిగింది. ఈ ప్రమాదంలో ఇథనాల్ ట్యాంకర్ ను వేరే లారీ బలంగా ఢీ కొట్టింది. ప్రమాదం జరిగిన వెంటనే ఇథనాల్ ట్యాంకర్ కావడంతో మంటలు భారీగా చెలరేగి, క్షణాల్లోనే ఆ ప్రాంతమంతా దట్టమైన పొగతో కమ్ముకుంది.
ఈ భయంకరమైన అగ్నిప్రమాదంలో ట్యాంకర్ డ్రైవర్ వాహనం నుండి బయటకు రాలేకపోయాడు. దీంతో ఆ డ్రైవర్ సజీవదహనం అయ్యాడు. ఇది చూసిన స్థానికులు భయాందోళన చెందారు. అయితే, ప్రమాదానికి గురైన మరో లారీలోని డ్రైవర్ను అటుగా వెళ్తున్న ప్రయాణికులు, స్థానికులు సాహసంతో వెంటనే రక్షించగలిగారు.
ప్రమాద తీవ్రత, మంటలు చూసి వెంటనే అగ్నిమాపక సిబ్బందికి సమాచారం అందించారు. సమాచారం అందుకున్న అగ్నిమాపక దళం హుటాహుటిన మూడు ఫైరింజన్లతో ఘటనాస్థలికి చేరుకుంది. మంటలు అదుపులోకి రావడం కష్టమవడంతో, దాదాపు మూడు గంటలపాటు శ్రమించి వారు మంటలను పూర్తిగా అదుపు చేశారు. ప్రమాదం జరిగిన తీరుపై పోలీసులు కేసు నమోదు చేసి దర్యాప్తు చేస్తున్నారు. ఇథనాల్ వంటి అత్యంత ప్రమాదకరమైన రసాయనాలు తీసుకెళ్లే ట్యాంకర్ల విషయంలో డ్రైవర్లు మరింత అప్రమత్తంగా ఉండాలని అధికారులు సూచిస్తున్నారు.