Danam nagendar: బీఆర్ఎస్ ఎమ్మెల్యేల అనర్హత పిటిషన్లపై జరుగుతున్న విచారణ మరింత ఉత్కంఠభరితంగా మారుతోంది. కాంగ్రెస్ పార్టీలో చేరారన్న ఆరోపణలపై స్పీకర్ గడ్డం ప్రసాద్ కుమార్ జారీ చేసిన నోటీసులకు ఖైరతాబాద్ ఎమ్మెల్యే దానం నాగేందర్ స్పందించేందుకు అదనపు గడువు కోరారు. ఇందుకోసం ఆయన స్పీకర్కు అధికారికంగా లేఖ రాసినట్లు సమాచారం.
2023 ఎన్నికల్లో బీఆర్ఎస్ తరఫున గెలిచిన దానం నాగేందర్, అనంతరం కాంగ్రెస్ పార్టీలోకి వెళ్లిన 10 మంది ఎమ్మెల్యేల జాబితాలో ఉన్నారు. వీరిపై బీఆర్ఎస్ వేసిన ఫిర్యాదుల మేరకు స్పీకర్ ఇప్పటికే ఎనిమిది మంది—కాళే యాదయ్య, కృష్ణ మోహన్ రెడ్డి, జీ. మహిపాల్ రెడ్డి, టి. ప్రకాశ్ గౌడ్, సంజయ్ కుమార్, అరికెపూడి గాంధీ, పోచారం శ్రీనివాస్ రెడ్డి, తెల్లం వెంకటరావుల వాదనలు పూర్తిచేసి తీర్పును రిజర్వులో పెట్టారు.
ఇక దానం నాగేందర్, కడియం శ్రీహరి కేసుల్లో నవంబర్ 20న స్పీకర్ మూడోసారి నోటీసులు జారీ చేసి 23వ తేదీలోగా సమాధానం ఇవ్వాలని ఆదేశించారు. అయితే ఇద్దరూ గడువు కోరడం రాజకీయంగా ఆసక్తికరంగా మారింది. తమ పార్టీని విడిచి వెళ్లలేదని, నియోజకవర్గ అభివృద్ధి కోసం ముఖ్యమంత్రి రేవంత్ రెడ్డిని మాత్రమే కలిశామని ఈ ఇద్దరు ఎమ్మెల్యేల వాదన.
అయితే, నాగేందర్ కాంగ్రెస్ టికెట్పై సికింద్రాబాద్ లోక్సభ స్థానానికి పోటీ చేసిన విషయం, అలాగే కడియం శ్రీహరి తన కుమార్తె కావ్యకు కాంగ్రెస్ తరఫున ప్రచారం చేసిన అంశాలను బీఆర్ఎస్ స్పీకర్ దృష్టికి తీసుకెళ్లింది.
ఇదిలా ఉండగా, అనర్హత పిటిషన్లపై మూడు నెలల్లో నిర్ణయం తీసుకోవాలన్న ఆదేశాలను పాటించకపోయారని పేర్కొంటూ నవంబర్ 17న సుప్రీంకోర్టు తెలంగాణ స్పీకర్కు ధిక్కరణ నోటీసులు జారీ చేసిన సంగతి తెలిసిందే. ఈ పరిణామాలతో మొత్తం వ్యవహారం మరింత వేడెక్కుతోంది.