ED Entry in IBOMMA Case: తెలుగు సినిమా పరిశ్రమకు కోట్ల రూపాయల నష్టం కలిగించిన ప్రముఖ పైరసీ వెబ్సైట్ ‘ఐబొమ్మ’ (iBOMMA) మాస్టర్మైండ్ ఇమ్మడి రవి కేసులో ఎన్ఫోర్స్మెంట్ డైరెక్టరేట్ (ఈడీ) రంగంలోకి దిగింది. ఈ కేసులో పెద్ద ఎత్తున మనీ లాండరింగ్ జరిగిందని అనుమానిస్తున్న ఈడీ, దీనిపై పూర్తి స్థాయి దర్యాప్తు చేపట్టేందుకు సిద్ధమైంది.
ఐబొమ్మ ద్వారా రవి అక్రమంగా సంపాదించిన సుమారు రూ.20 కోట్లకు పైగా ఆదాయాన్ని విదేశీ మార్గాల ద్వారా లీగల్ చేసినట్లుగా పోలీసులు అనుమానిస్తున్నారు.
కేసు వివరాలు కోరిన ఈడీ
ఈ వ్యవహారంలో మనీ లాండరింగ్ కోణంపై దృష్టి సారించిన ఈడీ, కేసు వివరాలు మరియు ఆర్థిక లావాదేవీల రికార్డులు అందించాలని హైదరాబాద్ సిటీ పోలీస్ కమిషనర్ (సీపీ) వి.సి. సజ్జనార్కు లేఖ రాసింది. హైదరాబాద్ సైబర్ క్రైమ్ పోలీసులు అందించిన సమాచారం ఆధారంగా, ఈడీ ఇప్పుడు PMLA (Prevention of Money Laundering Act) చట్టం కింద దర్యాప్తు ప్రారంభించనుంది.
విదేశీ ఖాతాల నుంచి గోప్యంగా నిధులు
పోలీసుల దర్యాప్తులో ఇమ్మడి రవి ఆర్థిక లావాదేవీల తీరు చూసి అధికారులు నివ్వెరపోయారు.విదేశీ బ్యాంకుల నుంచి రవి NRE (Non-Resident External) ఖాతాకు పెద్ద మొత్తంలో నిధులు బదిలీ అయ్యాయి. ముఖ్యంగా ఫ్రాన్స్, దుబాయ్, స్విట్జర్లాండ్లోని బ్యాంకుల నుంచి డబ్బు ట్రాన్స్ఫర్ చేసినట్లు గుర్తించారు.
ఇది కూడా చదవండి: Prashant Kishor: ఓటమి బాధ్యత నాదే.. బీహార్ అసెంబ్లీ ఎన్నికలపై పీకే
నెలకు సుమారు రూ.15 లక్షలు క్రిప్టో వాలెట్ల నుంచి కూడా రవి ఖాతాలకు ట్రాన్స్ఫర్లు జరిగాయని తేలింది. పైరసీ ద్వారా వచ్చిన అక్రమ ఆదాయాలను డిజిటల్ కరెన్సీల ద్వారా దాచిపెట్టి, తిరిగి లీగల్ ఛానెల్లకు మార్చినట్టు పోలీసులు అనుమానిస్తున్నారు. ఇప్పటికే హైదరాబాద్ పోలీసులు రవికి సంబంధించిన 35 బ్యాంక్ ఖాతాలను గుర్తించి, వాటి నుంచి రూ.3.5 కోట్లకు పైగా డబ్బును ఫ్రీజ్ చేశారు.
పైరసీ కింగ్పిన్ వివరాలు
విశాఖపట్నం వాసి అయిన ఇమ్మడి రవి కంప్యూటర్ సైన్స్ నేపథ్యం ఉన్న వ్యక్తి. తెలుగు సినిమాలతో పాటు ఇతర ప్రాంతీయ చిత్రాలు, OTT కంటెంట్ను రిలీజ్ రోజునే పైరేట్ చేసి అప్లోడ్ చేసేవాడు.
ఇమ్మడి రవి iBomma తో పాటు, 65 మిరర్ సైట్లు మరియు Bappam TV వంటి ఎక్స్టెన్షన్ల ద్వారా తన పైరసీ సామ్రాజ్యాన్ని నడిపాడు. ఈ సైట్లపై అక్రమ బెట్టింగ్ ప్లాట్ఫారమ్లకు లింక్లు ఇచ్చి, యూజర్లను డైవర్ట్ చేసి మరింత డబ్బు సంపాదించినట్లు పోలీసులు ఆరోపించారు. రవి, క్లౌడ్ఫ్లేర్ వంటి CDNలను ఉపయోగించి సర్వర్లను అమెరికా, నెదర్లాండ్స్, స్విట్జర్లాండ్ల మధ్య మార్చుకుంటూ ట్రాక్ అవ్వకుండా జాగ్రత్త పడ్డాడు. రవి భారతీయ పౌరసత్వాన్ని వదిలేసి, సెయింట్ కిట్స్ పౌరుడిగా మారిపోయాడు మరియు ఫ్రాన్స్లో నివసిస్తున్నాడు. దుబాయ్, థాయ్లాండ్, USA మధ్య తిరుగుతూ ఉండేవాడు.
పోలీసుల చర్యలు
నవంబర్ 14న హైదరాబాద్కు వచ్చిన రవిని కూకట్పల్లి పోలీసులు అరెస్టు చేశారు. పోలీసులు అతని నుంచి మల్టిపుల్ మొబైల్లు, ల్యాప్టాప్లు, హార్డ్ డిస్కులు, పెన్ డ్రైవ్లు, పాస్బుక్లు సహా అనేక కీలక సామాగ్రిని స్వాధీనం చేసుకున్నారు. రవి పాస్పోర్ట్ మరియు ఫారిన్ అకౌంట్స్ వివరాలను కూడా స్వాధీనం చేసుకున్న పోలీసులు, అంతర్జాతీయ ఏజెన్సీలతో సమన్వయం చేసుకుంటూ దర్యాప్తు కొనసాగిస్తున్నారు. ఈడీ దర్యాప్తుతో పైరసీ వెనుక ఉన్న ఆర్థిక లావాదేవీలు, అంతర్జాతీయ నెట్వర్క్పై మరిన్ని కీలక విషయాలు వెలుగులోకి వచ్చే అవకాశం ఉంది.