Team India: భారత క్రికెట్ చరిత్రలో ఒక చేదు అధ్యాయం నమోదైంది. దక్షిణాఫ్రికాతో జరిగిన తొలి టెస్ట్ మ్యాచ్లో కేవలం 124 పరుగుల స్వల్ప లక్ష్యాన్ని ఛేదించడంలో టీమిండియా దారుణంగా విఫలమైంది. మూడో రోజే ముగిసిన ఈ ఉత్కంఠ పోరులో దక్షిణాఫ్రికా జట్టు 30 పరుగుల తేడాతో సంచలన విజయం సాధించింది. భారత గడ్డపై దక్షిణాఫ్రికా సాధించిన అత్యంత అరుదైన టెస్ట్ విజయాల్లో ఇది ఒకటిగా నిలిచింది. 124 పరుగుల లక్ష్యం సులభంగానే కనిపిస్తున్నా, ఊహించని విధంగా టర్న్ అయిన పిచ్పై భారత బ్యాటర్లు నిలదొక్కుకోలేకపోయారు.
భారత్ కేవలం 93 పరుగులకే ఆలౌట్ కావడంతో, ప్రేక్షకులతో నిండిన ఈడెన్ గార్డెన్స్ స్టేడియం ఒక్కసారిగా నిశ్శబ్దంలో మునిగిపోయింది. ఆరంభంలోనే ఓపెనర్లు యశస్వి జైస్వాల్ (0), కేఎల్ రాహుల్ (1) తక్కువ స్కోరుకే అవుటయ్యారు. శుభ్మన్ గిల్ గాయం కారణంగా బ్యాటింగ్కు దూరమవ్వడం జట్టుకు పెద్ద దెబ్బ. మధ్యలో వాషింగ్టన్ సుందర్ (31), అక్షర్ పటేల్ (26), రవీంద్ర జడేజా (18) మాత్రమే కాస్త పోరాడారు. మిగిలిన బ్యాటర్లు సింగిల్ డిజిట్కే పరిమితమయ్యారు.
ఇది కూడా చదవండి: Ayyappa Swamy: అయ్యప్ప జ్ఞాన ముద్రలోనే ఎందుకు ఉంటారు?
దక్షిణాఫ్రికా విజయంలో వారి స్పిన్నర్ సైమన్ హార్మర్ కీలకపాత్ర పోషించాడు. రెండో ఇన్నింగ్స్లో అద్భుతమైన స్పెల్ వేసిన హార్మర్, భారత్ పతనాన్ని శాసించాడు. రెండు ఇన్నింగ్స్లలో కలిపి అతడు 8 వికెట్లు పడగొట్టాడు. కెప్టెన్ టెంబా బవుమా రెండో ఇన్నింగ్స్లో చేసిన విలువైన 55 పరుగులు కూడా సఫారీ జట్టుకు కీలక ఆధిక్యాన్ని అందించాయి. ఈ ఓటమితో భారత్ ఖాతాలో కొన్ని అనవసర రికార్డులు చేరాయి: టెస్ట్ క్రికెట్లో స్వదేశంలో భారత్ ఛేదించడంలో విఫలమైన అత్యంత స్వల్ప లక్ష్యాలలో ఇది ఒకటిగా నిలిచింది. 1997లో వెస్టిండీస్తో జరిగిన టెస్ట్ మ్యాచ్లో 120 పరుగుల లక్ష్యాన్ని ఛేదించడంలో విఫలమైన తర్వాత, ఇంత స్వల్ప లక్ష్యాన్ని ఛేదించడంలో భారత్ విఫలమవ్వడం ఇదే రెండోసారి. ఈ విజయంతో దక్షిణాఫ్రికా రెండు మ్యాచ్ల సిరీస్లో 1-0 ఆధిక్యంలో నిలిచింది. తదుపరి టెస్ట్ మ్యాచ్లో టీమిండియా ఎలా పుంజుకుంటుందో చూడాలి.