Supreme Court: తెలంగాణ రాజకీయాల్లో కీలకంగా మారిన బీఆర్ఎస్ (BRS) నుంచి కాంగ్రెస్‌లో చేరిన ఎమ్మెల్యేల అనర్హత పిటిషన్లపై సోమవారం (నేడు) సుప్రీంకోర్టులో విచారణ జరగనుంది. ఎమ్మెల్యేల పార్టీ ఫిరాయింపులపై చర్యలు తీసుకోవాలని కోరుతూ బీఆర్ఎస్ దాఖలు చేసిన పిటిషన్లు, స్పీకర్ కార్యాలయం దాఖలు చేసిన గడువు పెంపు అభ్యర్థన, బీఆర్ఎస్ వర్కింగ్ ప్రెసిడెంట్ కేటీఆర్ దాఖలు చేసిన కోర్టు ధిక్కార పిటిషన్… ఈ మొత్తం అంశాలపై సర్వోన్నత న్యాయస్థానం నేడు విచారణ చేపట్టనుంది.
గడువు ముగిసినా.. తేలని విచారణ
పార్టీ ఫిరాయించిన 10 మంది ఎమ్మెల్యేలపై చర్యలు తీసుకోవాలని కోరుతూ బీఆర్ఎస్ దాఖలు చేసిన పిటిషన్లపై విచారణను పూర్తి చేయడానికి అసెంబ్లీ స్పీకర్‌కు సుప్రీంకోర్టు గతంలో అక్టోబర్‌ 31 వరకు గడువు విధించిన విషయం తెలిసిందే. అంతకుముందు, జూలై 31న కూడా మూడు నెలల్లో చర్యలు తీసుకోవాలని సుప్రీంకోర్టు ఆదేశించింది.
అయితే, ఆ గడువు ముగిసినప్పటికీ విచారణ పూర్తి కాలేదు. దీనిపై స్పీకర్ కార్యాలయం.. అసెంబ్లీ కార్యక్రమాలు, అంతర్జాతీయ సదస్సులు, విదేశీ పర్యటనల కారణంగా స్పీకర్ బిజీగా ఉన్నారని పేర్కొంటూ, విచారణ పూర్తి చేయడానికి మరో 8 వారాల సమయం కావాలని కోర్టును అభ్యర్థించింది.
కేటీఆర్ కోర్టు ధిక్కార పిటిషన్
స్పీకర్ ఉద్దేశపూర్వకంగానే విచారణలో జాప్యం చేస్తున్నారని ఆరోపిస్తూ బీఆర్ఎస్ వర్కింగ్ ప్రెసిడెంట్ కేటీఆర్ సుప్రీంకోర్టులో కోర్టు ధిక్కార పిటిషన్ దాఖలు చేశారు. మరోవైపు, అనర్హత వేటు వేయాలని కోరుతూ బీఆర్ఎస్ ఎమ్మెల్యే పాడి కౌశిక్‌ రెడ్డి కూడా మరొక పిటిషన్ వేశారు.
ఇది కూడా చదవండి: Sabarimala Ayyappa: శబరిమల పూజరిని ఎవరు నియమిస్తారు?
బీఆర్ఎస్ ప్రధాన అభ్యంతరాలు:
సుప్రీంకోర్టు ఆదేశించిన మూడు నెలల గడువును ఉద్దేశపూర్వకంగా ఉల్లంఘించడం. ఆరోపణలు ఎదుర్కొంటున్న ఎమ్మెల్యేలలో ముఖ్యులు అయిన దానం నాగేందర్‌, కడియం శ్రీహరి వంటి వారిని స్పీకర్ ఇంతవరకు విచారించకపోవడం. కేవలం 8 మంది ఎమ్మెల్యేల విచారణ మాత్రమే స్పీకర్ ప్రారంభించారని, మిగిలిన వారిపై చర్యలు తీసుకోలేదని బీఆర్ఎస్ న్యాయవాది వాదించనున్నారు.
సీజేఐ ధర్మాసనంలో విచారణ
ఈ పిటిషన్లన్నింటినీ కలిపి నేడు ప్రధాన న్యాయమూర్తి జస్టిస్‌ బీఆర్‌ గవాయి, జస్టిస్‌ వినోద్‌ చంద్రన్‌, జస్టిస్‌ అంజారియాలతో కూడిన ధర్మాసనం విచారించనుంది.
ఉత్కంఠకు కారణాలు:
స్పీకర్ కార్యాలయం కోరిన అదనపు గడువును సుప్రీంకోర్టు అనుమతిస్తుందా? లేక నిర్ణీత గడువులోగా విచారణ పూర్తి చేయాలని కఠినంగా ఆదేశిస్తుందా? అనేది కీలకం. సీజేఐ జస్టిస్‌ గవాయి ఈ నెల 24న పదవీ విరమణ చేయనున్న నేపథ్యంలో, ఈ కేసుపై ఆయనే తుది నిర్ణయం తీసుకుంటారా? లేదా కేసును తదుపరి ధర్మాసనానికి బదిలీ చేస్తారా? అనే దానిపై సర్వత్రా ఉత్కంఠ నెలకొంది. ఈ రోజు సుప్రీంకోర్టు వెలువరించే తీర్పు తెలంగాణ రాజకీయాల భవిష్యత్తును, ఫిరాయింపుల చట్టం అమలును ప్రభావితం చేయనుంది.