Delhi Car Blast: దేశ రాజధాని ఢిల్లీలోని ప్రముఖ చారిత్రక కట్టడం రెడ్ ఫోర్ట్ (ఎర్రకోట) సమీపంలో చోటుచేసుకున్న కారు పేలుడు ఘటన దేశవ్యాప్తంగా తీవ్ర కలకలం సృష్టించింది. ఈ దుర్ఘటనలో ప్రాణనష్టం జరగడం పట్ల రక్షణ శాఖ మంత్రి రాజనాథ్ సింగ్ తీవ్ర విచారం వ్యక్తం చేశారు.
రక్షణ మంత్రి రాజనాథ్ సింగ్ స్పందన
ఈ ఘటన అత్యంత బాధాకరమైనదిగా, కలతపరిచేదిగా ఆయన అభివర్ణించారు. మరణించిన వారి కుటుంబాలకు ప్రగాఢ సానుభూతి తెలిపారు. రాజనాథ్ సింగ్ ట్విట్టర్‌లో స్పందిస్తూ, “ఢిల్లీలో జరిగిన కారు పేలుడు ఘటన అత్యంత బాధాకరమైంది, కలతపరిచేదిగానూ ఉంది. ఈ అత్యంత విషాద సమయంలో బాధిత కుటుంబాలకు నా హృదయపూర్వక సానుభూతి. గాయపడిన వారు త్వరగా కోలుకోవాలని ప్రార్థిస్తున్నాను” అని పేర్కొన్నారు.
ఇది కూడా చదవండి: Private Bus Fire Accident: 40 మంది ప్రయాణికులు.. హైదరాబాద్‌-విజయవాడ రహదారిపై బస్సు దగ్ధం
ఉగ్రవాద కోణంలో దర్యాప్తు
రెడ్ ఫోర్ట్ వంటి ప్రముఖ పర్యాటక కేంద్రం సమీపంలో ఇటువంటి ఘటన జరగడం భద్రతా వ్యవస్థపై పలు ప్రశ్నలు లేవనెత్తింది. దీని తీవ్రత దృష్ట్యా, భద్రతా విభాగాలు మరియు ఫోరెన్సిక్ టీమ్‌లు వెంటనే రంగంలోకి దిగి ప్రాంతాన్ని ముట్టడించి దర్యాప్తు ప్రారంభించాయి.
పేలుడుకు గల కారణాలు, పేలుడు స్వభావం మరియు ఉగ్రవాద కోణం వంటి అంశాలపై విచారణ జరుగుతోంది. పోలీసులు మరిన్ని వివరాల కోసం, ఆధారాల కోసం చురుకుగా గాలిస్తున్నారు. కేంద్ర హోంమంత్రిత్వశాఖ కూడా ఈ ఘటనపై సమగ్ర నివేదిక కోరినట్లు సమాచారం.
ఈ ఘటన ఢిల్లీ భద్రతా వ్యవస్థకు ఒక సవాలుగా మారింది. దేశ రాజధానిలో జరిగిన ఈ పేలుడుపై భద్రతా సంస్థలు మరింత అప్రమత్తంగా ఉండి, దర్యాప్తును వేగవంతం చేశాయి.