Mumbai: ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయంలో డైరెక్టరేట్ ఆఫ్ రెవెన్యూ ఇంటెలిజెన్స్ అధికారులు ఒక పెద్ద డ్రగ్స్ స్మగ్లింగ్ ముఠా గుట్టు రట్టు చేశారు. కొలంబో నుంచి వచ్చిన ఒక మహిళా ప్రయాణీకురాలిని తనిఖీ చేయగా, ఏకంగా 4.7 కిలోల కొకైన్‌ను స్వాధీనం చేసుకున్నారు. అంతర్జాతీయ మార్కెట్‌లో దీని విలువ సుమారు రూ. 47 కోట్లు ఉంటుందని అధికారులు అంచనా వేశారు. ఈ మహిళ కాఫీ ప్యాకెట్లలో తెల్లటి పొడి రూపంలో ఉన్న ఈ కొకైన్‌ను చాలా రహస్యంగా దాచి తీసుకొచ్చింది. ఈ తొమ్మిది పౌచులను అధికారులు గుర్తించి, పరీక్షించగా అది కొకైన్ అని తేలింది.
ఈ కేసులో డ్రగ్స్ తీసుకొచ్చిన మహిళతో పాటు, ఆమెకు సహకరించిన మరో నలుగురిని కూడా డీఆర్‌ఐ అధికారులు అదుపులోకి తీసుకున్నారు. మొత్తం ఐదుగురు నిందితులను నార్కోటిక్ డ్రగ్స్ అండ్ సైకోట్రోపిక్ సబ్‌స్టాన్సెస్ చట్టం, 1985 నిబంధనల కింద అరెస్టు చేసి, కఠిన చర్యలు తీసుకున్నారు. ఆర్థిక మంత్రిత్వ శాఖ ఈ విషయాన్ని శనివారం అధికారికంగా వెల్లడించింది. భారీ మొత్తంలో కొకైన్ పట్టుబడటం, అంతర్జాతీయ స్మగ్లింగ్ నెట్‌వర్క్‌ను ఛేదించడంపై అధికారులు తమ సంతృప్తిని వ్యక్తం చేశారు.
ఇటీవల కాలంలో డ్రగ్స్ స్మగ్లర్లు కొత్త పద్ధతులను ఉపయోగిస్తూ, చట్టాన్ని తప్పించుకోవడానికి ప్రయత్నిస్తున్నట్లు డీఆర్‌ఐ అధికారులు తెలిపారు. ముఖ్యంగా మహిళలను కొరియర్‌లుగా వాడుకోవడం, అలాగే ఆహార పదార్థాలలో లేదా కొన్ని సీక్రెట్ ప్రదేశాలలో మాదక ద్రవ్యాలను దాచి రవాణా చేయడం వంటివి జరుగుతున్నాయని వెల్లడించారు. అయినప్పటికీ, ఎయిర్ పోర్టుల్లో నిఘా పెంచడం ద్వారా ఇలాంటి స్మగ్లింగ్ ప్రయత్నాలను సమర్థవంతంగా అడ్డుకోగలుగుతున్నామని అధికారులు స్పష్టం చేశారు. ఈ అరెస్టుతో డ్రగ్స్ మాఫియాకు గట్టి హెచ్చరిక పంపినట్లయింది.