Kavitha: కరీంనగర్ జిల్లాలో పర్యటించిన కవిత, రైతుల సమస్యలపై గళం విప్పారు. ముఖ్యంగా మొంథా తుఫాను కారణంగా దెబ్బతిన్న రైతుల పరిస్థితిని ఆమె దగ్గరుండి చూశారు. తిమ్మాపూర్ మండలం మక్తపల్లి గ్రామంలోని ధాన్యం కొనుగోలు కేంద్రాన్ని పరిశీలించిన తర్వాత ఆమె మీడియాతో మాట్లాడారు.
రైతుల దయనీయ స్థితి: కవిత మాట్లాడుతూ, కొనుగోలు కేంద్రాల్లో నెలల తరబడి ధాన్యం కొనుగోలు జరగడం లేదని ఆగ్రహం వ్యక్తం చేశారు. దీనికి తోడు వర్షాలు పడడంతో రైతుల పరిస్థితి మరింత దయనీయంగా మారిందని అన్నారు. మక్తపల్లిలో రైతులు నెల రోజులుగా ధాన్యం కుప్పలు పోసి ఉంచారని, అవి పూర్తిగా తడిసిపోయి, మొలకెత్తడం, బూజు పట్టడం జరిగిందని ఆమె తెలిపారు. ఇంత జరుగుతున్నా అధికారులు, కలెక్టర్ ఎందుకు కొనుగోలు కేంద్రాలను ప్రారంభించలేదని ఆమె ప్రశ్నించారు.
పరిహారం రూ. 50 వేలు ఉండాలి: రైతులను మానవతా దృక్పథంతో ప్రభుత్వం ఆదుకోవాలని కవిత కోరారు. ప్రభుత్వం ఎకరాకు రూ. 10 వేలు పరిహారం ఇస్తామని అంటుండగా, అది ఏమాత్రం సరిపోదని ఆమె అన్నారు. రైతులకు నిజమైన మేలు జరగాలంటే ఎకరాకు రూ. 50 వేల నష్టపరిహారం ఇవ్వాలని ఆమె గట్టిగా డిమాండ్ చేశారు.
కొనుగోళ్లపై స్పష్టమైన ఆదేశాలు ఇవ్వాలి: మొలకెత్తినా, బూజు పట్టినా, తేమ శాతం ఎక్కువగా ఉన్నా సరే, ఆ ధాన్యాన్ని కొనుగోలు చేసేలా మిల్లర్లకు ప్రభుత్వం వెంటనే ఆదేశాలు ఇవ్వాలని కవిత డిమాండ్ చేశారు. భూమి పత్రాలు లేవనే నెపంతో కౌలు రైతుల ధాన్యాన్ని కొనడం లేదని, దీనిపై ప్రభుత్వం చర్యలు తీసుకోవాలని ఆమె కోరారు.
ప్రభుత్వంపై విమర్శలు: కాంగ్రెస్ ప్రభుత్వం రైతులకు ఎన్నో హామీలు ఇచ్చి అధికారంలోకి వచ్చిందని, కానీ ఇప్పటివరకు పంట నష్టాన్ని అంచనా వేయలేదని కవిత విమర్శించారు. ప్రభుత్వం, కలెక్టర్, అధికారులు వెంటనే రంగంలోకి దిగి నష్టాన్ని లెక్క కట్టాలని డిమాండ్ చేశారు. అలాగే, ప్రభుత్వం ఇస్తామన్న బోనస్ కూడా ఇవ్వలేదని, బీహార్ ఎన్నికల కారణంగా కూలీలు రాక అదనపు కూలి చెల్లించాల్సి వస్తుందని రైతులు పడుతున్న కష్టాన్ని ఆమె వివరించారు. ఈ సమస్యలన్నిటిని దృష్టిలో ఉంచుకుని, డైరెక్టుగా మిల్లర్లే ధాన్యం కొనుగోలు చేసేలా ప్రభుత్వం చర్యలు తీసుకోవాలని ఆమె కోరారు.