Nagarjuna 100 Film: టాలీవుడ్ కింగ్ అక్కినేని నాగార్జున తన సినీ కెరీర్‌లోనే అత్యంత ప్రతిష్టాత్మకమైన 100వ చిత్రంపై పూర్తి దృష్టి సారించారు. ప్రస్తుతం ‘కింగ్ 100’ అనే వర్కింగ్ టైటిల్‌తో రూపొందుతున్న ఈ ల్యాండ్‌మార్క్ చిత్రాన్ని అన్నపూర్ణ స్టూడియోస్ బ్యానర్‌పై భారీ స్థాయిలో నిర్మించేందుకు సన్నాహాలు చేస్తున్నారు.
ఈ చిత్రం పూర్తిగా ‘రాజకీయ నేపథ్యం (పొలిటికల్ బ్యాక్‌డ్రాప్)’లో తెరకెక్కనుందని ఇండస్ట్రీ వర్గాల సమాచారం. నాగార్జున ఈ సినిమాలో ద్విపాత్రాభినయం చేయబోతున్నారని, అందులో ఒక పాత్ర సాధారణ వ్యక్తిగా, మరొకటి రాజకీయ నాయకుడిగా కనిపిస్తారని గట్టిగా వినిపిస్తోంది. అంతేకాదు, ఈ సినిమాలో ముఖ్యమంత్రి పాత్రలో మరో స్టార్ హీరో అతిథి పాత్ర (క్యామియో) పోషించే అవకాశం కూడా ఉందని గుసగుసలు వినిపిస్తున్నాయి.
Also Read: Yellamma: వేణు యెల్దండి ‘ఎల్లమ్మ’ చిత్రంలో హీరోగా రాక్‌స్టార్ దేవి శ్రీ ప్రసాద్?
అనుష్క రీ-ఎంట్రీ: అభిమానులకు పండుగే
నాగార్జున 100వ చిత్రంలో హీరోయిన్ల ఎంపికపై నెలకొన్న సందిగ్ధతకు దాదాపు తెరపడినట్లు కనిపిస్తోంది. మొదట సీనియర్ నటి టబు కీలక పాత్రలో నటించనున్నారనే వార్తలు వచ్చినా, ఆ తర్వాత ఆమె ఆరోగ్య సమస్యల కారణంగా తప్పుకున్నారని సమాచారం. లేడీ సూపర్‌స్టార్ నయనతార పేరు కూడా పరిశీలించిన తర్వాత, తాజాగా అనుష్క శెట్టి మరో ముఖ్యపాత్రలో నటించేందుకు గ్రీన్ సిగ్నల్ ఇచ్చినట్లు తెలుస్తోంది.
నాగార్జున – అనుష్క శెట్టి కాంబినేషన్‌కు అభిమానుల్లో ఒక ప్రత్యేకమైన క్రేజ్ ఉంది. ‘సూపర్’ చిత్రంతో అనుష్కను నాగార్జున పరిచయం చేయడం, ఆ తర్వాత ‘బాస్’, ‘డాన్’, ‘ఢమరుకం’, ‘సోగ్గాడే చిన్నినాయనా’ వంటి అనేక విజయవంతమైన చిత్రాలలో వీరి కెమిస్ట్రీ బాగా పండటం తెలిసిందే. ఈ పాత హిట్ జోడీ మళ్లీ వెండితెరపైకి వస్తే అభిమానులకు పండుగే అని సినీ విశ్లేషకులు చెబుతున్నారు.
ఈ ప్రతిష్టాత్మక చిత్రానికి దర్శకుడు ఆర్.కార్తీక్ దర్శకత్వం వహించనున్నారు. చిత్రానికి “లాటరీ కింగ్” అనే టైటిల్ పరిశీలనలో ఉన్నట్లు కూడా సమాచారం. అనుష్క అభిమానులు ఆమె పర్‌ఫార్మెన్స్ కోసం ఉత్సాహంగా ఎదురుచూస్తుండగా, ఈ ప్రాజెక్ట్ వివరాలపై అధికారిక ప్రకటన త్వరలో వెలువడే అవకాశం ఉంది.