Rajgopal Reddy: తెలంగాణలో మద్యం దుకాణాల టెండర్ల హడావిడి నడుస్తోంది. ఈ సమయంలోనే మునుగోడు ఎమ్మెల్యే కోమటిరెడ్డి రాజగోపాల్ రెడ్డి తన నియోజకవర్గంలో కొత్త నిబంధనలు తీసుకొచ్చారు. బెల్ట్ షాపులు మాయం కావాలన్నదే ఆయన ముఖ్య ఉద్దేశం.
రాజగోపాల్ రెడ్డి కొత్త రూల్స్ ఇవే:
రాజగోపాల్ రెడ్డి గెలిచిన వెంటనే మునుగోడు నియోజకవర్గంలో అక్రమంగా నడుస్తున్న ‘బెల్ట్ షాపులు’ లేకుండా చేశానని చెబుతున్నారు. ఇప్పుడు కొత్తగా దుకాణాలు తీసుకునే వారికి ఆయన కొన్ని సూచనలు చేశారు:
ఊరి బయటే షాపులు: మద్యం దుకాణాలను ఊరి మధ్యలో కాకుండా, ఊరి బయట మాత్రమే పెట్టుకోవాలి.
సిట్టింగ్‌కు నో: షాపుల దగ్గర కూర్చుని తాగేందుకు (సిట్టింగ్) అవకాశం ఇవ్వకూడదు.
బెల్ట్ షాపులకు అమ్మొద్దు: ఎట్టిపరిస్థితుల్లోనూ బెల్ట్ షాపులకు మద్యం అమ్మకూడదు.
ఎందుకిదంతా?
ఎమ్మెల్యే రాజగోపాల్ రెడ్డి ఈ రూల్స్ పెట్టడం వెనుక బలమైన కారణం ఉంది. ఎవరినీ ఇబ్బంది పెట్టడం తన లక్ష్యం కాదని, ముఖ్యంగా యువత మద్యానికి బానిసలు కాకూడదన్నదే తన ఆరాటమని ఆయన అంటున్నారు. మంచి సమాజం కోసం, ఆరోగ్యవంతమైన యువత కోసం ఈ నిర్ణయం తీసుకున్నట్లు తెలిపారు.
ఎక్సైజ్ ఆఫీసర్‌కు వినతి:
ఎమ్మెల్యే సూచనల మేరకు, ఆయన పార్టీ నాయకులు నల్గొండ ఎక్సైజ్ అధికారిని కలిశారు. ఎమ్మెల్యే పెట్టిన ఈ కొత్త నిబంధనలను పాటించేలా చర్యలు తీసుకోవాలని కోరుతూ ఆయనకు వినతిపత్రం కూడా ఇచ్చారు.