Anirudh Reddy: తెలంగాణ కాంగ్రెస్ పార్టీలో అంతర్గత విభేదాలు మరోసారి బయటపడ్డాయి. జడ్చర్ల ఎమ్మెల్యే అనిరుధ్ రెడ్డి ముఖ్యమంత్రి, పీసీసీ చీఫ్ రేవంత్ రెడ్డి తీరుపై వివాదాస్పద వ్యాఖ్యలు చేశారు. మాజీ ఎమ్మెల్యే ఎర్ర శేఖర్‌ను పార్టీలోకి తిరిగి ఆహ్వానించే ప్రయత్నాలు జరుగుతున్నాయనే వార్తలపై ఆయన తీవ్రంగా స్పందించారు.
“ఎమ్మెల్యే పదవి కోసం నన్ను కూడా చంపొచ్చు”
ఎర్ర శేఖర్ కాంగ్రెస్‌లో చేరిక గురించి అనిరుధ్ రెడ్డి మాట్లాడుతూ.. సంచలన ఆరోపణలు చేశారు. “సర్పంచ్ పదవి కోసం సొంత తమ్ముడిని హత్య చేసిన చరిత్ర ఎర్ర శేఖర్‌ది. రేపు ఎమ్మెల్యే పదవి కోసం నన్ను కూడా చంపడానికి వెనుకాడకపోవచ్చు” అంటూ అనిరుధ్ రెడ్డి అనుమానం వ్యక్తం చేశారు.
ఈ ప్రాంతంలో ఇప్పటివరకు ఫ్యాక్షన్ రాజకీయాలు లేవని, అలాంటి వారిని పార్టీలోకి తీసుకురావడం సరికాదని ఆయన అన్నారు. తన భద్రత గురించి కూడా ఆయన ఆందోళన వ్యక్తం చేశారు.
“పార్టీకి మోసం చేసిన వారికి మళ్లీ ఎంట్రీ లేదు”
గతంలో పార్టీకి మోసం చేసి, డబ్బులు (మూటలు) తీసుకొని వెళ్లిపోయిన వారికి తిరిగి కాంగ్రెస్‌లో చోటు ఉండబోదని అనిరుధ్ రెడ్డి స్పష్టం చేశారు. హత్యలు చేసే వారికి, పార్టీకి ద్రోహం చేసిన వారికి కాంగ్రెస్ పార్టీలో స్థానం ఇవ్వొద్దని ఆయన అధిష్టానాన్ని కోరారు.
మొత్తంగా, ఎర్ర శేఖర్ చేరిక విషయంలో ముఖ్యమంత్రి రేవంత్ రెడ్డి నిర్ణయంపై జడ్చర్ల ఎమ్మెల్యే అనిరుధ్ రెడ్డి బహిరంగంగానే తీవ్ర వ్యతిరేకత చూపడం ఇప్పుడు రాజకీయ వర్గాల్లో హాట్ టాపిక్‌గా మారింది. ఈ వివాదం కాంగ్రెస్ పార్టీలో ఎలాంటి మలుపు తిరుగుతుందో చూడాలి.