Thummala Nageswara Rao: ఖమ్మం నగర అభివృద్ధి దిశగా ప్రభుత్వం కీలకమైన అడుగులు వేస్తోందని రాష్ట్ర వ్యవసాయ శాఖ మంత్రి తుమ్మల నాగేశ్వరరావు తెలిపారు. మంగళవారం ఆయన ఖమ్మం నగరంలో పలు అభివృద్ధి పనులకు శంకుస్థాపన చేశారు. ఈ సందర్భంగా ప్రజలను ఉద్దేశించి మాట్లాడుతూ “రాజకీయ కక్షలతో ఎవరిపైనా కేసులు పెట్టొద్దని పోలీసులు సూచించాను. ప్రజలకు ఇబ్బందులు కలగకుండా, సమాజం ప్రశాంతంగా ఉండేలా ప్రతి ఒక్కరూ బాధ్యతగా వ్యవహరించాలి” అని మంత్రి స్పష్టం చేశారు.
తుమ్మల నాగేశ్వరరావు మాట్లాడుతూ “ఖమ్మం గతంలో చిన్న పంచాయతీగా ఉండేది, కేవలం నాలుగు వేల జనాభా మాత్రమే ఉండేది. ఇప్పుడు ఇది అభివృద్ధి చెందిన నగరంగా మారింది. నగర శుభ్రత, మౌలిక సదుపాయాల పరిరక్షణలో ప్రతి పౌరుడు భాగస్వామి కావాలి. మీ డివిజన్లలో అవసరాలు ఉంటే కమిషనర్ అభిషేక్ అగస్త్యను సంప్రదించండి. మన కార్పొరేషన్‌ను చూసి ఇతర పట్టణాలు నేర్చుకునే స్థాయికి తీసుకెళ్దాం” అని పిలుపునిచ్చారు.
రహదారి విస్తరణ పనులపై మాట్లాడుతూ “రోడ్ల వెడల్పు కోసం అవసరమైతే నాయకుల ఇళ్లనుండి కూడా కొంత భాగం తీసుకోవాల్సి వస్తుంది. అప్పట్లో బైపాస్ రోడ్డు వేయగా విమర్శలు ఎదుర్కొన్నాను, కానీ ఇప్పుడు అదే రోడ్డు కూడా జామ్ అవుతోంది. ఖమ్మం రోడ్ల అభివృద్ధికి సీఎం రేవంత్ రెడ్డి నుంచి మరో రెండు, మూడు వందల కోట్ల రూపాయలు తెచ్చే ప్రయత్నం చేస్తున్నాను” అని వెల్లడించారు.
ఇది కూడా చదవండి: Crime News: అప్పు చేసి కుమారుడికి 3 ల‌క్ష‌ల బైక్ కొనిస్తే..
పేదల సంక్షేమం గురించి మాట్లాడుతూ “గుడిసెల్లో జీవించే పేదలకు ఇళ్లు ఇవ్వడం నా బాధ్యత. పేదల అభ్యున్నతికి రాజకీయాలు సానుకూలంగా ఉండాలి, ఇబ్బంది పెట్టే విధంగా ఉండకూడదు” అని తుమ్మల అన్నారు.
అలాగే విద్య ప్రాధాన్యాన్ని ప్రస్తావిస్తూ “ఉన్నతమైన చదువులు చదివితే కుటుంబం పేదరికాన్ని విడిచిపెడుతుంది. భవిష్యత్తులో ఖమ్మం నగరంలోనే హైదరాబాద్, అమెరికా కంటే మంచి విద్యా సదుపాయాలు లభిస్తాయి” అని భరోసా ఇచ్చారు.
మొత్తం మీద, రాజకీయ విభేదాల కంటే ప్రజా సంక్షేమం, అభివృద్ధి, మరియు విద్యకు ప్రాధాన్యం ఇవ్వాలని తుమ్మల నాగేశ్వరరావు స్పష్టం చేశారు. ఖమ్మం నగరాన్ని అన్ని వసతులతో కూడిన సుందర నగరంగా తీర్చిదిద్దడమే తన ప్రధాన లక్ష్యమని ఆయన తెలిపారు.