Harish Rao: తెలంగాణ ముఖ్యమంత్రి రేవంత్ రెడ్డిపై మాజీ మంత్రి, బీఆర్‌ఎస్ నేత హరీష్ రావు ఘాటు విమర్శలు చేశారు. ఆయన రేవంత్ రెడ్డిని ‘చీఫ్ మినిస్టర్ కాదు, కటింగ్ మాస్టర్’ అంటూ ఎద్దేవా చేశారు.
ముఖ్యమంత్రి పనేంటి? కటింగ్ చేయడమే!
రేవంత్ రెడ్డి జేబులో కత్తెర పెట్టుకుని తిరుగుతున్నారని హరీష్ రావు విమర్శించారు. ముఖ్యమంత్రిగా ఆయన చేసే పని రెండే రెండు అని ఆయన అన్నారు:
1. మాజీ సీఎం కేసీఆర్ మొదలుపెట్టిన పనులకు వెళ్లి రిబ్బన్ కట్ చేయడం.
2. లేదా, కేసీఆర్ ఇచ్చిన పథకాలను కట్ చేయడం.
Also Read: Rain Alert: తెలుగు రాష్ట్రాల్లో భారీ వర్షాలు.. ఆ జిల్లాలకు ఆరెంజ్ అలర్ట్
కాళేశ్వరం ప్రాజెక్టు కూలిపోయిందని సీఎం రేవంత్ అంటున్నారని, మరి అలాంటప్పుడు మల్లన్నసాగర్ నుంచి హైదరాబాద్ నగరానికి నీళ్లు ఎలా వస్తున్నాయని హరీష్ రావు ప్రశ్నించారు. “కేసీఆర్ కష్టపడి కట్టిన ప్రాజెక్టు కాళేశ్వరం. మరి మల్లన్నసాగర్ ప్రాజెక్టును సీఎం రేవంత్ నాన్న కట్టారా? అందుకే నీళ్లు తీసుకువెళ్తున్నారా?” అంటూ ఆగ్రహం వ్యక్తం చేశారు. ఇకపై రేవంత్ రెడ్డి మాటలను ప్రజలు నమ్మరని ఆయన స్పష్టం చేశారు.
బీజేపీపై సవాళ్లు, కాంగ్రెస్ హామీలపై నిలదీత
హరీష్ రావు తెలంగాణ బీజేపీ ఎంపీలకు సవాల్ విసిరారు. “వడ్ల కొనుగోలుకు ఒక నీతి, గోధుమల కొనుగోలుకు ఇంకో నీతా? అని అడిగే ధైర్యం బీజేపీ ఎంపీలకు ఉందా?” అని నిలదీశారు. బీజేపీ అంటే తెలంగాణను మోసం చేసిన పార్టీ అని, వారిది ‘సబ్‌కా సాత్ సబ్‌కా వికాస్’ కాదు, ‘పూరా బక్వాస్’ అని ఘాటుగా విమర్శించారు. ప్రాంతీయ పార్టీలు బలంగా ఉంటేనే కేంద్రం మెడలు వంచి పనులు చేయించుకోవచ్చని, ఇప్పుడు ఏపీలో టీడీపీ అదే చేస్తుందని గుర్తు చేశారు.
సీఎం రేవంత్ రెడ్డి కేవలం కేరళ, కర్ణాటక, ఢిల్లీ తిరగడానికే సరిపోతున్నారని, రాష్ట్రంలో ‘ఆర్ఆర్ టాక్స్’ (RR Tax) నడుస్తోందని ఆరోపించారు. తమ కార్యకర్తలపై పోలీసులు అక్రమ కేసులు పెడుతున్నారని, తమ ప్రభుత్వం మళ్లీ వచ్చాక ఆ పోలీసుల పని పడతామని హెచ్చరించారు.
ఆరు గ్యారెంటీలు బక్వాస్: బీఆర్‌ఎస్ పోరాటం ఖాయం
కాంగ్రెస్ ప్రభుత్వం ఇచ్చిన ఆరు గ్యారెంటీలు, ప్రామిసరీ నోట్లు, బాండ్ పేపర్లకు విలువ లేకుండా పోయిందని హరీష్ రావు అన్నారు.
* పింఛన్ల కోత: రేవంత్ రెడ్డి కొత్త పింఛన్లు ఇవ్వకపోగా, ఏకంగా 2 లక్షల పింఛన్లు తీసేశారు మరియు రెండు నెలల పింఛన్ డబ్బులు కూడా ఇవ్వలేదని ఆరోపించారు.
* కళ్యాణ లక్ష్మి అప్పు: కళ్యాణ లక్ష్మీ పథకంలో 8 లక్షల తులాల బంగారం కాంగ్రెస్ పార్టీ బాకీ పడిందని పేర్కొన్నారు.
* ఉద్యోగాలు ఏవి?: నిరుద్యోగ యువతకు 2 లక్షల ఉద్యోగాలు ఇస్తామని చెప్పి, కనీసం 20 వేల ఉద్యోగాలు కూడా ఇవ్వలేదని మండిపడ్డారు.
“రేవంత్ రెడ్డి ఎన్నికల ముందు రజినీకాంత్ లాగా మాట్లాడి, ఇప్పుడు గజినీకాంత్ లాగా మరచిపోయారు,” అని హరీష్ రావు ఎద్దేవా చేశారు. ప్రజలకు ఇచ్చే పథకాలకు డబ్బులు లేవు గానీ, హైదరాబాద్‌లో రోడ్లు, మూసీ సుందరీకరణ వంటి పనులకు మాత్రం నిధులు ఉంటాయని విమర్శించారు.
రైతులకు యూరియా కూడా సరఫరా చేయలేని చేతగాని ప్రభుత్వం కాంగ్రెస్ అని ఆయన అన్నారు. సంగారెడ్డి జిల్లాలో కేసీఆర్ మొదలుపెట్టిన సంగమేశ్వర బసవేశ్వర ప్రాజెక్టు కోసం త్వరలో పెద్ద పోరాటం చేస్తామని ప్రకటించారు.
“కాంగ్రెస్ పోవాలి, కేసీఆర్ రావాలి” అని జనాలు కోరుకుంటున్నారని, రాబోయే స్థానిక సంస్థల ఎన్నికల్లో అన్ని జిల్లాల్లో బీఆర్‌ఎస్ గెలవడం ఖాయం అని హరీష్ రావు ధీమా వ్యక్తం చేశారు. కాంగ్రెస్ నాయకులు ఓటు అడగడానికి వస్తే, ప్రజలు వారి హామీలపై నిలదీయాలని ఆయన పిలుపునిచ్చారు.