Air chief marshal: చరిత్ర సృష్టించిన ‘ఆపరేషన్ సిందూర్’ వివరాలను ఎయిర్‌ఫోర్స్ చీఫ్ ఎయిర్ చీఫ్ మార్షల్ అమర్ ప్రీత్ సింగ్ (AP Singh) తాజాగా వెల్లడించారు. వాయుసేన అధిపతి ఎయిర్ చీఫ్ మార్షల్ అమర్ ప్రీత్ సింగ్ (AP Singh) ‘ఆపరేషన్ సిందూర్’కు సంబంధించిన సంచలన విషయాలను తాజాగా వెల్లడించారు. ఈ చారిత్రక ఆపరేషన్‌తో భారత వాయుసేన (IAF) తన శక్తి, కచ్చితత్వాన్ని ప్రపంచానికి రుజువు చేసిందని ఆయన స్పష్టం చేశారు. ఆపరేషన్ సిందూర్ ద్వారా పాకిస్తాన్‌కు తగిన గుణపాఠం చెప్పామని, ఇది భవిష్యత్ పోరాటాలకు గొప్ప స్ఫూర్తిని ఇస్తుందని ఏపీ సింగ్ పేర్కొన్నారు.
జమ్మూ కాశ్మీర్‌లోని పహల్గామ్‌లో జరిగిన ఉగ్రదాడికి ప్రతీకారంగా భారత సైన్యం **’ఆపరేషన్ సిందూర్’**ను చేపట్టింది. ఈ ఆపరేషన్‌లో భాగంగా, భారత యుద్ధ విమానాలు పాకిస్తాన్ భూభాగంలోకి సుమారు 300 కిలోమీటర్ల దూరం వరకు చొచ్చుకెళ్లి లక్ష్యాలను గురిచూసి కచ్చితంగా ఛేదించాయి. ఈ ధాటికి పాకిస్తాన్ మోకాళ్లపై కూర్చోవాల్సి వచ్చిందని ఏపీ సింగ్ తెలిపారు. ఈ చర్య ద్వారా ఉగ్రవాదులు తమ అమాయక ప్రజలను చంపినందుకు మూల్యం చెల్లించుకోవడం ప్రపంచం చూసిందని ఆయన అన్నారు.
Also Read: Aadhaar: ఆధార్ కార్డు కొత్త ఛార్జీలు.. ఇకపై రూ. 700 కట్టాల్సిందే
‘ఆపరేషన్ సిందూర్’ సమయంలో భారత సైన్యం పాకిస్తాన్‌కు చెందిన పది ఫైటర్ జెట్‌లను ధ్వంసం చేసిందని, వీటిలో అమెరికా తయారీ F-16, చైనీస్ J-17 యుద్ధ విమానాలు ఉన్నట్లు ఏపీ సింగ్ స్పష్టం చేశారు. పాకిస్తాన్‌కు చెందిన అవాక్ విమానాన్ని కూడా ధ్వంసం చేశామని తెలిపారు. తమ యుద్ధ విమానాలు ధ్వంసమయ్యాయని పాకిస్తాన్ చేసిన తప్పుడు ప్రచారాన్ని ఆయన బలంగా ఖండించారు. అంతేకాకుండా, యుద్ధ విరామానికి కారణం అమెరికా అధ్యక్షుడు డొనాల్డ్ ట్రంప్ జోక్యం కాదని, తమ దాడి తరువాత పాకిస్తానే స్వయంగా భారత్‌ను శాంతి కోసం అభ్యర్థించిందని ఏపీ సింగ్ వెల్లడించారు. ఈ దాడి విషయంలో కేంద్ర ప్రభుత్వం సైన్యానికి పూర్తి స్వేచ్ఛనిచ్చింది అని ఆయన తెలియజేశారు.
రాబోయే యుద్ధాలు మునుపటి కన్నా భిన్నంగా ఉంటాయని, వాటి కోసం సిద్ధంగా ఉండాలని ఏపీ సింగ్ అన్నారు. భవిష్యత్తు సవాళ్లను ఎదుర్కోవడానికి, రక్షణ రంగంలో స్వావలంబన (Self-reliance) సాధించే లక్ష్యంతో త్రివిధ దళాలు కలిసి ‘సుదర్శన చక్ర’ అనే క్షిపణిని తయారుచేసే పనిని ఇప్పటికే ప్రారంభించాయని కూడా ఆయన పేర్కొన్నారు. ఇతర దేశాలతో ఘర్షణలు తలెత్తినప్పుడు వాటిని ఎలా ఎదుర్కోవాలి, పరిష్కరించుకోవాలనే విషయాలను ప్రపంచ దేశాలు భారత్ నుంచి నేర్చుకోవాలని కూడా ఆయన సూచించారు.