Karur Stampede: తమిళనాడులోని కరూర్‌లో జరిగిన భయంకర తొక్కిసలాట ఘటనలో పోలీసులు కీలక చర్యలు తీసుకున్నారు. నటుడు విజయ్ నేతృత్వంలోని తమిళగ వెట్రి కళగం (టీవీకే) పార్టీ జిల్లా కార్యదర్శి వి.పి. మతియళగన్‌ను అరెస్ట్ చేశారు. ఈ ఘటనలో 41 మంది ప్రాణాలు కోల్పోయారు. మరో 110 మంది గాయపడ్డారు, వారిలో 11 మంది పరిస్థితి తీవ్రంగా ఉంది. ఇప్పటికే 51 మంది ఆస్పత్రి నుంచి డిశ్చార్జ్ అయ్యారు.
రాష్ట్రంలో తీవ్ర విషాదాన్ని నింపిన కరూర్ తొక్కిసలాట (Karur Stampede) ఘటనపై పోలీసులు దర్యాప్తును వేగవంతం చేశారు. ప్రముఖ నటుడు విజయ్ నేతృత్వంలోని తమిళ వెట్రి కళగం (టీవీకే) పార్టీకి చెందిన జిల్లా అధ్యక్షుడు మది అలగన్ (మతియళగన్)ను పోలీసులు సోమవారం అరెస్ట్ చేశారు. ఈ కేసులో ఆయన్ను ప్రధాన నిందితుడిగా చేర్చారు. ఇప్పటివరకు ఈ ఘటనకు సంబంధించి మొత్తం నలుగురిని అదుపులోకి తీసుకున్నారు.
ఈ నెల 27న కరూర్ జిల్లాలో టీవీకే నిర్వహించిన భారీ ర్యాలీలో ఈ దుర్ఘటన చోటుచేసుకుంది. టీవీకే అధ్యక్షుడు విజయ్‌ను చూసేందుకు, ఆయన ప్రసంగాన్ని వినేందుకు పెద్ద సంఖ్యలో ప్రజలు తరలిరావడంతో ఒక్కసారిగా తొక్కిసలాట జరిగింది. ఈ విషాదంలో చిన్నారులు, మహిళలు సహా 41 మంది ప్రాణాలు కోల్పోయారు. తొక్కిసలాట జరిగిన ప్రాంతంలో ర్యాలీని ఏర్పాటు చేసి, నిర్వహించిన బాధ్యత మది అలగన్‌దేనని పోలీసులు నిర్ధారించారు. జనసందోహం అదుపు తప్పే అవకాశం ఉందని పోలీసులు గతంలో టీవీకే నాయకులను పలుమార్లు హెచ్చరించినప్పటికీ, వారు ఆ హెచ్చరికలను పట్టించుకోకుండా ర్యాలీని కొనసాగించారని పోలీసులు ఆరోపించారు. అందుకే మతియళగన్‌పై నేరపూరిత హత్య అభియోగాలతో సహా పలు కేసులు నమోదు చేశారు.
Also Read: Pawan Kalyan: పవన్ కల్యాణ్: కర్ణాటకలో ‘ఓజీ’కి ఇబ్బందులున్నా.. ‘కాంతారా 1’కి ఆటంకాలు వద్దు
అలాగే, ఈ ఘటనకు సంబంధించి తప్పుడు సమాచారాన్ని (Fake News) ప్రచారం చేశారన్న ఆరోపణలపై యూట్యూబర్ ఫెలిక్స్ గెరాల్డ్‌తో పాటు మరో ముగ్గురు టీవీకే సభ్యులు – సహాయం (పెరుంబాక్కం), శివనేశ్వరన్ (మాంగాడు), శరత్ కుమార్ (అవడి)లను కూడా పోలీసులు అరెస్టు చేశారు.
తొక్కిసలాట ప్రమాద వశాత్తు జరిగింది కాదని, కుట్ర అని టీవీకే పార్టీ ఆరోపిస్తోంది. ఈ విషయంపై ఆ పార్టీ మద్రాస్ హైకోర్టులో పిటిషన్ కూడా దాఖలు చేసింది. దీనికి భిన్నంగా, డీజీపీ జి. వెంకటరామన్ మాట్లాడుతూ.. విజయ్ ఆలస్యంగా రావడం వల్ల జనం ఊహించిన దానికంటే ఎక్కువగా గుమిగూడి ప్రమాదం జరిగిందని తెలిపారు.
ఈ ఘటనపై పూర్తి స్థాయి విచారణ జరిపి దోషులను కఠినంగా శిక్షించేందుకు రిటైర్డ్ న్యాయమూర్తి అరుణ జగదీశన్ నేతృత్వంలో ఒక కమిషన్ ఏర్పాటు చేసి, కరూర్‌కు పంపించారు. సంఘటన జరిగిన సమయంలో జనం కిక్కిరిసిపోవడం, ఊపిరాడక కొందరు సొమ్మసిల్లి పడిపోవడం వంటి వీడియోలు సోషల్ మీడియాలో వైరల్ అయ్యాయి. జనం అధికంగా ఉండటం వల్ల అంబులెన్సులు సకాలంలో చేరుకోవడం కష్టమై, బాధితులను ఆసుపత్రికి తరలించడం ఆలస్యం అయ్యింది. పోలీసులు ఈ మొత్తం ఘటనపై ఎఫ్‌ఐఆర్ నమోదు చేసి, దర్యాప్తు కొనసాగిస్తున్నారు.