Ayodhya Places: అయోధ్య అనగానే మనకు వెంటనే గుర్తుకొచ్చేది శ్రీరాముని పవిత్ర జన్మస్థలం. రామ్‌లాలా ఆలయం ప్రారంభమైన తర్వాత ఈ పుణ్యక్షేత్రం మరింత మహిమాన్వితంగా మారింది. ప్రతి ఏటా లక్షలాది మంది భక్తులు రామాలయాన్ని సందర్శించడానికి వస్తారు. కానీ, అయోధ్య కేవలం రామాలయానికి మాత్రమే పరిమితం కాదు. ఇక్కడ ఇంకా ఎన్నో చారిత్రక, మతపరమైన ప్రదేశాలు ఉన్నాయి. ఈ ప్రదేశాలు మీ యాత్రను మరింత మధురానుభూతిగా మారుస్తాయి.
మీరు త్వరలో అయోధ్య యాత్ర ప్లాన్ చేస్తుంటే, రామ్‌లాలా దర్శనంతో పాటు ఈ ఆరు ప్రసిద్ధ ప్రదేశాలను తప్పకుండా సందర్శించండి.
1. హనుమాన్‌గర్హి ఆలయం
రామ్‌లాలా ఆలయాన్ని సందర్శించిన తర్వాత, మీరు తప్పకుండా చూడాల్సిన ప్రదేశం హనుమాన్‌గర్హి ఆలయం. ఇది హనుమంతుడికి అంకితం చేయబడిన ఆలయం. ఈ ఆలయాన్ని సందర్శించిన తర్వాతే రామ్‌లాలా దర్శనం పూర్తి అవుతుందని భక్తుల విశ్వాసం. ఈ ఆలయానికి చేరుకోవాలంటే 76 మెట్లు ఎక్కాలి.
2. కనక్ భవన్
ఈ ఆలయం శ్రీరాముడు సీతకు పెళ్లి కానుకగా ఇచ్చిన బంగారు భవనాన్ని సూచిస్తుంది. ఈ ఆలయం మొత్తం బంగారు పూతతో, అత్యంత వైభవంగా ఉంటుంది. దీని అందం మరియు ఆధ్యాత్మికత దీనిని అయోధ్యలో తప్పకుండా చూడాల్సిన ప్రదేశాలలో ఒకటిగా మార్చాయి.
3. సరయు ఘాట్
అయోధ్యకు జీవనాడి సరయు నది. ఈ నదిలో స్నానం చేయడం వల్ల పాపాలు పోతాయని భక్తులు నమ్ముతారు. సాయంకాలం సమయంలో ఇక్కడ జరిగే గంగా హారతి ఎంతో అద్భుతంగా ఉంటుంది. ఆ దృశ్యాన్ని చూసేందుకు రెండు కళ్ళు సరిపోవు.
4. మణి పర్వతం
మణి పర్వతానికి ఒక ప్రత్యేకమైన మత విశ్వాసం ఉంది. రామాయణం ప్రకారం, హనుమంతుడు సంజీవని పర్వతాన్ని తీసుకువెళ్తున్నప్పుడు దానిలో ఒక భాగం ఇక్కడ పడిందని నమ్ముతారు. ఈ ప్రదేశం మతపరంగానే కాకుండా, పచ్చని ప్రకృతితో కూడా కనువిందు చేస్తుంది.
5. దశరథ్ మహల్
శ్రీరాముని తండ్రి, మహారాజ దశరథుని నివాసం ఈ దశరథ్ మహల్. ఇది అయోధ్యలోని ముఖ్యమైన చారిత్రక ప్రదేశాలలో ఒకటి. ఇక్కడ రామాయణంలోని అనేక దృశ్యాలను చూడవచ్చు. ఈ భవనం రామ జన్మభూమికి చాలా దగ్గరగా ఉంటుంది.
6. త్రేతా కే ఠాకూర్ మందిర్
ఈ ఆలయాన్ని శ్రీరాముని పట్టాభిషేకం జరిగిన ప్రదేశంగా భావిస్తారు. ఇక్కడ ఉన్న పురాతన రాముని విగ్రహాలు భక్తులకు ఆధ్యాత్మిక శాంతిని, ప్రశాంతతను అందిస్తాయి. ఈ ప్రదేశంలో ఉన్న పవిత్రమైన వాతావరణం మనసుకు ఎంతో ఆనందాన్ని ఇస్తుంది.
అయోధ్య కేవలం ఒక పుణ్యక్షేత్రం మాత్రమే కాదు, ఒక చారిత్రక మరియు ఆధ్యాత్మిక కేంద్రం. మీ యాత్రను పూర్తి చేయాలనుకుంటే, రామ్‌లాలా దర్శనంతో పాటు ఈ ఆరు ప్రదేశాలను తప్పకుండా సందర్శించండి. ఈ ప్రదేశాలన్నీ మీకు ఒక గొప్ప అనుభూతిని అందిస్తాయి.