Mobile Side Effects: నేటి కాలంలో పిల్లల జీవితంలో మొబైల్ ఫోన్ ఒక ముఖ్యమైన భాగంగా మారింది. చదువుల నుంచి ఆటల వరకు, స్నేహితులతో సంభాషణల నుంచి సమాచారం తెలుసుకోవడం వరకు, ప్రతీదీ మొబైల్‌తో ముడిపడి ఉంది. అయితే, ఈ అలవాటు వ్యసనంగా మారి రాత్రిపూట కూడా మొబైల్ చూస్తూ గడపడం పిల్లల ఆరోగ్యాన్ని తీవ్రంగా దెబ్బతీస్తుంది. తల్లిదండ్రులు తమ పిల్లలను ప్రశాంతంగా లేదా బిజీగా ఉంచడానికి మొబైల్ ఫోన్లు ఇస్తుంటారు. కానీ, ఈ అలవాటు క్రమంగా వారి భవిష్యత్తుపై తీవ్ర ప్రభావం చూపుతుంది. రాత్రి ఆలస్యంగా మొబైల్ వాడడం వల్ల కలిగే ఐదు ముఖ్యమైన దుష్ప్రభావాలు ఇక్కడ ఉన్నాయి.
1. నిద్ర సమస్యలు
మొబైల్ స్క్రీన్ల నుంచి వెలువడే నీలి కాంతి (బ్లూ లైట్) మెదడులో నిద్రకు సహాయపడే మెలటోనిన్ అనే హార్మోన్‌ ఉత్పత్తిని తగ్గిస్తుంది. దీనివల్ల పిల్లలకు నిద్ర పట్టడం కష్టమవుతుంది. తగినంత నిద్ర లేకపోవడం వల్ల వారి ఆరోగ్యంపై చాలా ప్రతికూల ప్రభావాలుంటాయి.
2. కంటి చూపు బలహీనపడటం
నిరంతరంగా స్క్రీన్ చూడటం వల్ల కళ్లు పొడిబారి, నొప్పి లేదా చికాకు వంటి సమస్యలు వస్తాయి. ముఖ్యంగా రాత్రిపూట మొబైల్ వాడడం వల్ల కంటి చూపు బలహీనపడే ప్రమాదం పెరుగుతుంది. ఇది పిల్లల భవిష్యత్తులో దృష్టి సమస్యలకు దారితీస్తుంది.
3. మెదడుపై ఒత్తిడి
అర్థరాత్రి వరకు వీడియో గేమ్స్ ఆడటం లేదా సోషల్ మీడియాను చూడటం వల్ల పిల్లల మెదడుకు విశ్రాంతి దొరకదు. ఇది మెదడుపై ఒత్తిడిని పెంచుతుంది. దీనివల్ల చిరాకు, కోపం వంటి భావాలు పెరుగుతాయి. అలాగే చదువుపై ఏకాగ్రత పెట్టడం కూడా కష్టమవుతుంది.
Also Read: Turmeric Milk: పసుపు పాలు తాగితే ఎన్ని లాభాలో తెలుసా..?
4. శారీరక అలసట, రోగనిరోధక శక్తి తగ్గిపోవడం
తగినంత నిద్ర లేకపోతే శరీరం అలసిపోతుంది, ఇది రోగనిరోధక శక్తిని బలహీనపరుస్తుంది. దీనివల్ల పిల్లలు తరచుగా అనారోగ్యం బారిన పడతారు. వారి శరీరంలోని జీవక్రియలు కూడా సక్రమంగా పనిచేయవు.
5. చదువులో వెనుకబాటు
రాత్రిపూట మొబైల్ ఎక్కువగా వాడడం వల్ల ఉదయం లేవగానే అలసటగా ఉంటుంది. దీనివల్ల స్కూల్లో లేదా ఇంట్లో చదువుపై దృష్టి పెట్టలేరు. ఈ అలవాటు వారి అకడమిక్ పనితీరును తగ్గిస్తుంది. ఫలితంగా ఆత్మవిశ్వాసం కూడా సన్నగిల్లుతుంది.
ఈ ఐదు దుష్ప్రభావాలను దృష్టిలో పెట్టుకుని తల్లిదండ్రులు తమ పిల్లల మొబైల్ వాడకాన్ని నియంత్రించడం చాలా అవసరం. వారి భవిష్యత్తు ఆరోగ్యంగా ఉండాలంటే ఈ సమస్యపై తక్షణం చర్యలు తీసుకోవాలి.