Stray Dog Verdict: ఢిల్లీలో పెరుగుతున్న వీధి కుక్కల సమస్యపై సుప్రీం కోర్టు ఈరోజు (శుక్రవారం) కీలక తీర్పు వెలువరించనుంది. గతంలో ఇచ్చిన తీర్పుపై జంతు ప్రేమికులు, ప్రభుత్వాల మధ్య నెలకొన్న వివాదానికి ఈరోజు ముగింపు లభించే అవకాశం ఉంది. ఈ కేసుపై త్రిసభ్య ధర్మాసనం ఈరోజు తీర్పును రిజర్వ్ చేసింది.
గతంలో, ఆగస్టు 11న, ద్విసభ్య ధర్మాసనం దేశ రాజధానిలోని వీధి కుక్కలన్నింటినీ షెల్టర్లకు తరలించాలని ఆదేశాలు జారీ చేసింది. ఈ ఆదేశాలు జంతు ప్రేమికులలో తీవ్ర ఆందోళన కలిగించాయి. షెల్టర్లు, వనరులు సరిపోనప్పుడు ఇది కుక్కల సంక్షేమానికి హాని కలిగిస్తుందని వారు వాదించారు. ఈ తీర్పుపై దేశవ్యాప్తంగా నిరసనలు వెల్లువెత్తాయి.
Also Read: South-North Koreas: మ‌రో రెండు దేశాల మధ్య యుద్ధఛాయ‌లు.. నార్త్‌, సౌత్ కొరియా దేశాల మధ్య ఉద్రిక్తం
వివిధ వర్గాల నుంచి అభ్యంతరాలు రావడంతో, సుప్రీం కోర్టు ఆగస్టు 14న మరోసారి కేసు విచారణ చేపట్టింది. ఈసారి ముగ్గురు సభ్యుల ధర్మాసనం దీనిని విచారించింది. ఢిల్లీ ప్రభుత్వం తరపున వాదించిన సాలిసిటర్ జనరల్, దేశంలో ప్రతిరోజూ సగటున 10,000 కుక్కకాటు కేసులు నమోదవుతున్నాయని, గత సంవత్సరంలో మొత్తం 37.15 లక్షల కేసులు వెలుగులోకి వచ్చాయని తెలిపారు. ఈ గణాంకాలు ప్రజల భద్రతకు వీధి కుక్కలు ఎంత ప్రమాదకరమో తెలియజేస్తున్నాయి. జంతు ప్రేమికుల తరపు న్యాయవాదులు, మునుపటి తీర్పులోని కొన్ని అంశాలపై స్టే విధించాలని కోరారు. ఇరుపక్షాల వాదనలు విన్న సుప్రీం కోర్టు, తీర్పును రిజర్వ్ చేసింది. ఈరోజు తుది ఆదేశాలు జారీ చేయనుంది.
సుప్రీం కోర్టు ఈ కేసు విచారణను ప్రత్యక్షంగా ప్రసారం చేయనుంది. ఈ నిర్ణయం ప్రజలకు న్యాయ వ్యవస్థపై మరింత అవగాహన కల్పిస్తుందని, పారదర్శకతను పెంచుతుందని భావిస్తున్నారు. ఈ తీర్పు ప్రజల భద్రత, జంతు సంక్షేమం రెండింటినీ బ్యాలెన్స్ చేస్తుందని అందరూ ఆశిస్తున్నారు.