Asia Cup 2025: ఆసియా కప్ 2025 ముందు టీమ్ ఇండియాలో పెద్ద మార్పులు చోటు చేసుకునే అవకాశాలు కనిపిస్తున్నాయి. హెడ్ కోచ్‌గా బాధ్యతలు చేపట్టిన గౌతమ్ గంభీర్, జట్టులో కొత్త వ్యూహాలతో ముందుకు వెళ్తున్నారు. ముఖ్యంగా అన్ని ఫార్మాట్లకు ఒకే కెప్టెన్ ఉండాలని ఆయన భావిస్తున్నారు.
గిల్‌కు కెప్టెన్సీ?
ప్రస్తుతం టీ20 ఫార్మాట్‌కు సూర్యకుమార్ యాదవ్ కెప్టెన్‌గా ఉన్నప్పటికీ, గంభీర్ ఆలోచనల ప్రకారం శుభ్‌మన్ గిల్‌కు బాధ్యతలు అప్పగించే అవకాశం ఉందని జాతీయ మీడియాలో వార్తలు వస్తున్నాయి. టెస్టులు, వన్డేల్లో అద్భుతంగా రాణించిన గిల్‌కు కెప్టెన్సీ ఇచ్చి, జట్టులో ఒకే విధమైన సంస్కృతిని తీసుకురావాలని గంభీర్ అనుకుంటున్నాడని సమాచారం. ఆసియా కప్ తర్వాత ఈ మార్పు జరిగే అవకాశముందని క్రీడా విశ్లేషకులు భావిస్తున్నారు.
ఓపెనింగ్ కాంబినేషన్‌పై పోటీ
గంభీర్ కోచ్‌గా వచ్చాక సంజు శాంసన్, అభిషేక్ శర్మలతో ఓపెనింగ్ కాంబినేషన్‌ను స్థిరపరిచారు. వీరిద్దరూ దూకుడు శైలి ఆటతో జట్టుకు మంచి ఆరంభాలు అందిస్తున్నారు. అయితే గిల్ తిరిగి టీ20 జట్టులోకి వస్తే, శాంసన్ స్థానం ప్రమాదంలో పడే అవకాశముందని పలువురు నిపుణులు అంటున్నారు. యశస్వి జైస్వాల్ కూడా పోటీలో ఉండటంతో, ఓపెనింగ్ స్థానానికి గట్టి పోటీ ఏర్పడింది.
ఇది కూడా చదవండి: Gold Price Today: మహిళలకు గుడ్ న్యూస్.. భారీగా దిగొచ్చిన బంగారం ధరలు.. తులం ఎంతంటే.?
“ఫినిషర్” అనే పదం ఇక లేనే లేదు!
గంభీర్ ఆలోచనల్లో మరో కీలక అంశం “ఒకే ఫినిషర్” అనే కాన్సెప్ట్‌ను తొలగించడం. జట్టులో ప్రతి ఆటగాడు ఏ స్థానంలోనైనా ఆడేందుకు సిద్ధంగా ఉండాలని ఆయన నమ్మకం. ఉదాహరణకు, పవర్ హిట్టర్ శివమ్ దూబేను కేవలం ఫినిషర్‌గా కాకుండా టాప్ ఆర్డర్‌లోనూ ఉపయోగించవచ్చని గంభీర్ భావిస్తున్నారు. ఇది టీ20 క్రికెట్‌లో ఆధునిక ధోరణులకు అనుగుణంగా ఉండబోతోందని నిపుణులు అభిప్రాయపడుతున్నారు.
గంభీర్ విజన్ – కొత్త బ్రాండ్ ఆఫ్ టీ20
భారత జట్టు “కాలానికి తగ్గట్లుగా కదలడం లేదు” అనే విమర్శలు వచ్చిన నేపథ్యంలో, గంభీర్ కొత్త దార్శనికతతో జట్టును రీబ్రాండ్ చేయాలని భావిస్తున్నారు. ఆటగాళ్లకు కేవలం స్థానాల ఆధారంగా కాకుండా నైపుణ్యాల ఆధారంగా పాత్రలు కేటాయించాలని ఆయన దృష్టి సారించారు.
ఆసియా కప్ 2025 – కీలక పరీక్ష
ఇక రాబోయే ఆసియా కప్ 2025లో గంభీర్ వ్యూహాలు ఎంత వరకు ఫలిస్తాయో చూడాలి. సూర్యకుమార్ యాదవ్ ఫిట్‌నెస్ పరీక్షలో ఉత్తీర్ణత సాధిస్తే ఆయన కెప్టెన్‌గా కొనసాగుతారని సమాచారం. అయితే, శుభ్‌మన్ గిల్‌కు కెప్టెన్సీ అప్పగించే నిర్ణయం ఎప్పుడైనా తీసుకోవచ్చనే ఊహాగానాలు క్రికెట్ వర్గాల్లో చర్చనీయాంశంగా మారాయి.