China Floods: చైనాలో సంభవించిన భారీ వర్షాలు, వరదల కారణంగా 34 మంది మరణించారు. ఈ మరణాలు ప్రధానంగా బీజింగ్ దాని పరిసర ప్రాంతాలలో సంభవించాయి. బీజింగ్ రాజధాని నగరం, ముఖ్యంగా మియున్ (Miyun), యాన్కింగ్ (Yanqing) జిల్లాలతో పాటు, పొరుగున ఉన్న హెబీ (Hebei) ప్రావిన్స్లో కూడా ఈ నష్టం జరిగింది. బీజింగ్లోని మియున్ జిల్లాలో 28 మంది, యాన్కింగ్లో ఇద్దరు మరణించగా, హెబీ ప్రావిన్స్లోని లువాన్పింగ్ కౌంటీలో కొండచరియలు విరిగిపడటంతో నలుగురు మరణించారు. దీంతో మొత్తం మృతుల సంఖ్య 34కి చేరింది. ఇంకా ఎనిమిది మంది గల్లంతైనట్లు సమాచారం. భారీ వర్షాల కారణంగా వరదలు, కొండచరియలు విరిగిపడటం, రోడ్లు ధ్వంసం కావడం, విద్యుత్ సరఫరాకు అంతరాయం కలగడం వంటివి జరిగాయి. అనేక వాహనాలు కొట్టుకుపోయాయి.
Also Read: USA: న్యూయార్క్లో కాల్పుల .. ఐదుగురి మృతి
బీజింగ్ పరిధిలో 80,000 మందికి పైగా ప్రజలను సురక్షిత ప్రాంతాలకు తరలించారు. మియున్ జిల్లా నుంచే దాదాపు 6,400 మందిని తరలించారు. టియాంజిన్ నగరంలోని జిజౌ (Jizhou) నుంచి 10,000 మందిని తరలించారు. బీజింగ్లో 1959 తర్వాత ఇదే అతి భారీ వర్షపాతం అని అధికారులు తెలిపారు. కొన్ని ప్రాంతాల్లో ఒకే రోజులో 25 సెంటీమీటర్ల (10 అంగుళాలు) వరకు వర్షపాతం నమోదైంది. చైనాలో తరచుగా వర్షాకాలంలో వరదలు వస్తుంటాయి, అయితే ఈసారి బీజింగ్ వంటి ప్రధాన నగరంలో ఇంత భారీ స్థాయిలో నష్టం జరగడం ఆందోళన కలిగిస్తోంది. చైనా అధ్యక్షుడు జి జిన్పింగ్ అత్యవసర సహాయక చర్యలు చేపట్టాలని ఆదేశించారు.