Donald Trump: అమెరికా అధ్యక్షుడు డొనాల్డ్ ట్రంప్, భారత్‌తో త్వరలో అత్యంత పెద్ద వాణిజ్య ఒప్పందం కుదుర్చుకోనున్నట్లు ప్రకటించారు. వైట్‌హౌస్‌లో జరిగిన ఒక కార్యక్రమంలో ఆయన ఈ విషయాన్ని వెల్లడించారు. ఇటీవల చైనాతో వాణిజ్య ఒప్పందంపై సంతకాలు జరిగిన నేపథ్యంలో ట్రంప్ ఈ వ్యాఖ్యలు చేయడం అంతర్జాతీయ వాణిజ్య వర్గాల్లో ఆసక్తిని రేకెత్తించింది.
“ప్రతి ఒక్కరూ మాతో ఒప్పందం చేసుకోవాలని కోరుకుంటున్నారు. నిన్ననే మేము చైనాతో వాణిజ్య ఒప్పందంపై సంతకం చేశాం. కొన్ని గొప్ప దేశాలతో ఒప్పందాలు జరగనున్నాయి. బహుశా భారత్‌తో అతిపెద్ద ఒప్పందం కుదరవచ్చు” అని ట్రంప్ అన్నారు. అయితే, చైనాతో జరిగిన ఒప్పందం వివరాలను ఆయన స్పష్టంగా వెల్లడించలేదు. అన్ని దేశాలతో వాణిజ్య ఒప్పందాలు కుదుర్చుకోవాలనే ఉద్దేశ్యం తమకు లేదని కూడా ట్రంప్ ఈ సందర్భంగా స్పష్టం చేశారు.
ఏప్రిల్‌లో అమెరికా పలు దేశాలపై సుంకాలు (టారిఫ్‌లు) విధించిన సంగతి తెలిసిందే. ఆ తర్వాత కొంతకాలం పాటు ఈ సుంకాల అమలుకు అమెరికా విరామం ప్రకటించింది. ఈ నేపథ్యంలో, అగ్రరాజ్యంతో ద్వైపాక్షిక వాణిజ్య ఒప్పందం కుదుర్చుకోవడంపై భారత్ ప్రత్యేకంగా దృష్టి పెట్టింది.
Also Read: Jasprit Bumrah: ఇంగ్లాండ్‌తో రెండో టెస్టుకు జస్‌ప్రీత్‌ బుమ్రా దూరం?
మోదీ పర్యటన, చర్చల పురోగతి
ఇటీవల భారత ప్రధాని నరేంద్ర మోదీ అమెరికా పర్యటన సందర్భంగా ఇరు దేశాల మధ్య వాణిజ్య ఒప్పందం కోసం అడుగులు పడ్డాయి. పరస్పర ప్రయోజనాలను దృష్టిలో ఉంచుకొని ఒప్పందం చేసుకోవడానికి ఇరు దేశాధినేతలు అంగీకరించారు. ఈ క్రమంలో, భారత కేంద్ర వాణిజ్య, పరిశ్రమల శాఖ మంత్రి పీయూష్ గోయల్, అమెరికా వాణిజ్య మంత్రి హోవార్డ్ లుట్నిక్‌తో సమావేశమై చర్చలు జరిపారు.
Donald Trump: ఈ ఏడాది సెప్టెంబర్ లేదా అక్టోబర్ నాటికి తొలి దశ ఒప్పందాన్ని పూర్తి చేయాలని ఇరు దేశాలు లక్ష్యంగా పెట్టుకున్నాయి. అమెరికా-భారత్ మధ్య వాణిజ్య ఒప్పందం త్వరలో జరుగుతుందని, ఇది రెండు దేశాలకూ అనుకూలంగా ఉంటుందని హోవార్డ్ లుట్నిక్ ఈ నెల ప్రారంభంలో జరిగిన అమెరికా-భారత్ వ్యూహాత్మక భాగస్వామ్య ఫోరంలో కూడా చెప్పారు. చైనాతో కొత్త ఒప్పందం తర్వాత, భారత్‌తో డీల్ గురించి ట్రంప్ చేసిన వ్యాఖ్యలు ప్రపంచ వాణిజ్య సంబంధాలను మరింత ఆసక్తికరంగా మార్చాయి.