Abhishek Bachchan: బాలీవుడ్ నటుడు అభిషేక్ బచ్చన్ నటించిన తాజా చిత్రం ‘హౌస్‌ఫుల్ 5’ బాక్సాఫీస్ వద్ద విజయవంతంగా దూసుకెళ్తోంది. ఈ సినిమా ఇప్పటివరకు రూ.162 కోట్లకు పైగా వసూళ్లు రాబట్టింది. అయితే, ఈ విజయోత్సాహం మధ్యలో అభిషేక్ ఇన్‌స్టాగ్రామ్‌లో పంచుకున్న ఓ ఎమోషనల్ పోస్ట్ నెట్టింట తీవ్ర చర్చనీయాంశంగా మారింది. ఈ పోస్ట్‌లో ఆయన, “నేను ఒంటరిగా ఉండాలనుకుంటున్నాను. జనంతో దూరమై, నన్ను నేను వెతుక్కోవాలని ఉంది. ప్రియమైన వారికోసం అన్నీ త్యాగం చేశాను, ఇప్పుడు నాకు నా కోసం సమయం కావాలి” అని హిందీలో రాసుకొచ్చారు.
ఈ పోస్ట్ వెనుక ఆయన వ్యక్తిగత జీవితంలోని సమస్యలు, ముఖ్యంగా ఐశ్వర్య రాయ్‌తో విడాకుల ఊహాగానాలు ఉన్నాయా అనే సందేహాలు నెటిజన్లలో రేకెత్తిస్తున్నాయి. గత కొంతకాలంగా ఈ జంట విడిపోతున్నారనే పుకార్లు షికారు చేస్తున్న నేపథ్యంలో, ఈ పోస్ట్ మరింత ఆసక్తిని రేకెత్తించింది. అభిషేక్ తన బాధ్యతల నుంచి తప్పుకుని, అంతర్గత శాంతిని వెతకాలనే ఆలోచనలో ఉన్నట్లు ఈ పోస్ట్ సూచిస్తోంది. నెటిజన్లు దీనిపై భిన్నాభిప్రాయాలు వ్యక్తం చేస్తున్నారు. అభిషేక్ తదుపరి చిత్రం ‘రాజా శివాజీ’లో రితీశ్ దేశ్‌ముఖ్‌తో కలిసి నటిస్తున్నారు.