Ponnam Prabhakar: హైదరాబాద్ నగర రవాణా వ్యవస్థను నేరుగా అనుభవిస్తూ, ప్రజల అభిప్రాయాలు స్వయంగా తెలుసుకునే ఉద్దేశంతో మంత్రి పొన్నం ప్రభాకర్, మేయర్ గద్వాల విజయలక్ష్మి, రాజ్యసభ సభ్యుడు అనిల్ కుమార్ యాదవ్ కలిసి పంజాగుట్ట నుంచి లక్డికపూల్ వరకు ఆర్టీసీ బస్సులో సాధారణ ప్రయాణికుల్లా టికెట్ తీసుకొని ప్రయాణించారు.
ఈ ప్రయాణంలో మంత్రి ప్రత్యక్షంగా మహిళలతో ముచ్చటించారు. మహా లక్ష్మి పథకం అమలు తీరును అడిగి తెలుసుకున్నారు. దీనివల్ల మహిళలు నెలకు వేల రూపాయలు ఆదా చేసుకుంటున్నారని, వారి కుటుంబ ఆర్థిక స్థితిగతులకు ఇది ఎంతో ఉపశమనం ఇస్తోందని స్పందించారు.
మహిళలకు ప్రత్యేక పథకాలు – ఆర్థికంగా ముందుకు
మంత్రి మాట్లాడుతూ, “కోటి మంది మహిళలను కోటీశ్వరులుగా తీర్చిదిద్దాలన్నదే రాష్ట్ర ప్రభుత్వ లక్ష్యం” అని స్పష్టం చేశారు. మహిళా సంఘాలకు ఆర్థిక స్వావలంబన కోసం ప్రత్యేక పథకాలు అమలులో ఉన్నాయని తెలిపారు.
ఇది కూడా చదవండి: Spying For Pakistan: పాక్ గూఢ‌చారిగా ప‌నిచేస్తున్న విద్యార్థి హ‌ర్యానాలో అరెస్టు
మహిళల అభివృద్ధితోపాటు, సామాన్య ప్రజల జీవితాలలో మార్పు తీసుకురావడం లక్ష్యంగా కాంగ్రెస్ ప్రభుత్వం అడుగులు వేస్తోందని చెప్పారు. ఇందిరమ్మ ఇళ్ల మంజూరు, రూ. 500కి గ్యాస్ సిలిండర్, 200 యూనిట్ల ఉచిత విద్యుత్, సన్న బియ్యం పంపిణీ వంటి పథకాలు ప్రజలందరికీ అందుబాటులో ఉంటాయని వివరించారు.
నూతన బస్సులతో మెరుగైన రవాణా సేవలు
హైదరాబాద్ నగర రవాణా వ్యవస్థపై మంత్రి స్పందిస్తూ, ఇటీవల భారీ సంఖ్యలో కొత్త RTC బస్సులను ప్రవేశపెట్టామని, ప్రయాణికుల రద్దీని తగ్గించేందుకు చర్యలు తీసుకున్నామని చెప్పారు. బస్సుల్లో ప్రయాణించే ప్రతి మహిళ సురక్షితంగా, సౌకర్యవంతంగా ప్రయాణించేందుకు అవసరమైన ఏర్పాట్లు చేస్తున్నామని తెలిపారు.
ప్రజల్లోకి నేరుగా వెళ్లిన నేతలు – ప్రత్యక్షంగా అభిప్రాయాలు
ఈ ప్రయాణం ద్వారా నేతలు ప్రజల మధ్యకు వెళ్లి, ప్రభుత్వ పథకాల ప్రభావాన్ని ప్రత్యక్షంగా చూశారు. వారి అభిప్రాయాలను స్వయంగా తెలుసుకున్నారు. పాలన ప్రజల అవసరాలకు అనుగుణంగా ఉండాలన్న సంకల్పంతో, ప్రభుత్వ పథకాలను మరింత సమర్థవంతంగా అమలు చేయాలన్న దిశగా ఈ కార్యాచరణ ఒక ముందడుగు అని పేర్కొనవచ్చు.