delhi: భారత సైన్యం నిర్వహించిన ‘ఆపరేషన్ సిందూర్’ అనంతరం తప్పుడు సమాచారం ప్రచారం చేసిన టర్కీ ప్రభుత్వ ప్రసార సంస్థ టీఆర్టీ వరల్డ్ కు చెందిన ఎక్స్ (పూర్వం ట్విట్టర్) ఖాతాను భారత్ బుధవారం నిలిపివేసింది. ఈ చర్య, దేశ భద్రతకు సంబంధించి వచ్చిన ఓ కీలక పరిణామంగా భావించబడుతోంది.
పాకిస్థాన్ భారత గగనతలంలోకి చొరబడేందుకు టర్కీ తయారు చేసిన డ్రోన్లను ఉపయోగించినట్టు ఫోరెన్సిక్ నివేదికలు వెల్లడించాయి. ఇదే సమయంలో పాకిస్థాన్ చేసే చొరబాటు యత్నాలను భారత రక్షణ దళాలు సమర్థంగా తిప్పికొట్టాయి. దేశ భూభాగానికి ఎలాంటి నష్టం జరగకుండా రక్షించగలిగాయి.
ఇదే సందర్భంలో, చైనా ప్రభుత్వ మీడియా సంస్థలు అయిన గ్లోబల్ టైమ్స్ జిన్హువా ఎక్స్ ఖాతాలను కూడా భారత ప్రభుత్వం నిలిపివేసింది. ఈ ఖాతాలన్నీ భారత సైన్యం మరియు అంతర్గత వ్యవహారాలపై తప్పుదారి పట్టించే, ధృవీకరించని సమాచారం ప్రచారం చేస్తున్నట్టు కేంద్రం ఆరోపించింది.
ప్రస్తుతం ఈ ఖాతాలను యాక్సెస్ చేయడానికి ప్రయత్నించినపుడు, “ఖాతా నిలిపివేయబడింది. చట్టపరమైన డిమాండ్కు ప్రతిస్పందనగా @trtworld భారతదేశంలో నిలిపివేయబడింది” అనే సందేశం కనిపిస్తోంది.
ఇందుకు మూలంగా నిలిచిన ఆపరేషన్ సిందూర్, పాకిస్థాన్ మరియు పాక్ ఆక్రమిత కాశ్మీర్లో ఉగ్రవాద శిబిరాలపై భారత్ నిర్వహించిన టార్గెట్ వైమానిక దాడులే. ఈ దాడుల అనంతరం *టీఆర్టీ వరల్డ్* వంటి విదేశీ మీడియా సంస్థలు తప్పుడు కథనాలను ప్రచారం చేశాయని అధికార వర్గాలు పేర్కొన్నాయి.