ISRO chairman: భారత అంతరిక్ష పరిశోధనా సంస్థ (ఇస్రో) చైర్మన్ వి. నారాయణన్ వెల్లడించిన ప్రకారం, దేశ భద్రత, సురక్షితత మరియు వ్యూహాత్మక ప్రయోజనాల పరిరక్షణకు పది ముఖ్యమైన ఉపగ్రహాలు నిరంతరం నిఘా విధుల్లో పాల్గొంటున్నాయి. త్రిపుర రాష్ట్రం అగర్తలాలో ఆదివారం నిర్వహించిన సెంట్రల్ అగ్రికల్చరల్ యూనివర్సిటీ (CAU) ఐదవ స్నాతకోత్సవంలో ఆయన ఈ విషయాలను పేర్కొన్నారు.
“దేశ భద్రతకు ఉపగ్రహాలు ఒక బలమైన కవచంలా పనిచేస్తున్నాయి. మనదేశానికి 7,000 కిలోమీటర్ల పొడవైన తీర ప్రాంతం ఉంది. దీన్ని నిరంతరం పర్యవేక్షించాల్సిన అవసరం ఉంది. ఆధునిక ఉపగ్రహాలు, డ్రోన్ సాంకేతికత వంటి పరికరాలు లేకుండా మనం వ్యూహాత్మక లక్ష్యాలను సాధించలేం,” అని నారాయణన్ అన్నారు.
ఈ పది ఉపగ్రహాలు దేశ సరిహద్దుల భద్రత, అంతర్గత భద్రత, సముద్ర జలాల సంరక్షణ వంటి అంశాలను గమనిస్తూ నిరంతరం సమాచారాన్ని అందిస్తున్నాయని, దాంతో అధికారులకు తక్షణ నిర్ణయాలు తీసుకునేందుకు సులభతరం అవుతోందని ఆయన వివరించారు.
ఇస్రో ఉపగ్రహాలు భద్రతా రంగంతో పాటు పౌర జీవితంలోనూ కీలక పాత్ర పోషిస్తున్నాయని ఆయన తెలిపారు. వ్యవసాయం, టెలీ-ఎడ్యుకేషన్, టెలీ-మెడిసిన్, వాతావరణ అంచనాలు, సహజ విపత్తుల సమయంలో నష్ట నివారణ వంటి సేవల్లో ఇవి ఉపయోగపడుతున్నాయని నారాయణన్ వివరించారు. ముఖ్యంగా విపత్తుల సమయంలో ప్రజల ప్రాణనష్టాన్ని తగ్గించడంలో ఉపగ్రహాల ఉపయోగం ఎంతో ఉందని చెప్పారు.
ఇక అంతరిక్ష రంగంలో భారత్ సాధించిన విజయాలను గుర్తు చేస్తూ, చంద్రయాన్-1 ద్వారా చంద్రుడిపై నీటి ఉనికిని కనుగొన్న తొలి దేశంగా భారత్ నిలిచిందని గర్వంగా చెప్పారు. ఇప్పటివరకు భారత్ 34 దేశాలకు చెందిన 433 ఉపగ్రహాలను విజయవంతంగా ప్రయోగించిందని పేర్కొన్నారు. ప్రస్తుతం అమెరికాతో కలిసి అత్యాధునిక భూమి చిత్రీకరణ ఉపగ్రహాన్ని నిర్మిస్తున్నామని, దానిని భారత్ నుంచే ప్రయోగించనున్నట్లు తెలిపారు. ఇది భద్రతా వ్యవస్థతో పాటు పౌర సేవల మరింత అభివృద్ధికి తోడ్పడుతుందన్న నమ్మకాన్ని ఆయన వ్యక్తం చేశారు.