కిరణ్ అబ్బవరం హీరోగా నటించిన తాజా చిత్రం ‘క’. సుజీత్, సందీప్ దర్శకత్వంలో తెరకెక్కిన ఈ సినిమా ట్రైలర్ ఇవాళ విడుదలైంది. చింతా వరలక్ష్మి సమర్పణలో శ్రీచక్రాస్ ఎంటర్టైన్మెంట్స్ బ్యానర్ పై చింతా గోపాలకృష్ణ రెడ్డి నిర్మాణంలో రూపుదిద్దుకుంది. నయన్ సారిక, తన్వి రామ్ కథా నాయికలు. దీపాపళి కానుకగా అక్టోబర్ 31న క సినిమా విడుదల కానుంది. ఈ సినిమా ట్రైలర్ 2 నిమిషాల 45 సెకండ్ల నిడివి ఉంది. చుట్టూ కొండల మధ్య ఉన్న కృష్ణగిరి అనే అందమైన ఊరిలో పోస్ట్ మ్యాన్ గా పనిచేస్తుంటాడు అభినయ వాసుదేవ్. మధ్యాహ్నమే చీకటి పడే ఆ ఊరు భౌగోళికంగా ఎంతో ప్రత్యేకం.
అక్కడ సత్యభామ అనే అందమైన అమ్మాయితో అతడు ప్రేమలో పడతాడు. ఉత్తరాలు పంచే క్రమంలో 1979 ఏప్రిల్ 22న అభిషేక్ పేరుతో వచ్చిన ఉత్తరం వాసుదేవ్ జీవితాన్ని మలుపు తిప్పుతుంది. ఆ ఉత్తరంలో ఏముందో చెప్పమంటూ.. ఓ ముసుగు వ్యక్తి వాసుదేవ్ను బెదిరిస్తాడు. ఆ ఉత్తరంలో ఏముంది?, వాసుదేవ్ను ఆ ముసుగు వ్యక్తి, ఆయనను గ్యాంగ్ ఎందుకు వెంటాడుతుంది..? అనేది ఆసక్తికరంగా ఉంది. ఉత్కంఠకు గురిచేసే సన్నివేశాలతో ట్రైలర్ ఆద్యంతం ఆకట్టుకునేలా సాగింది. కిరణ్ అబ్బవరం నటన, సంభాషణలు, యాక్షన్ సన్నివేశాలు సినిమాపై పెంచేలా ఉన్నాయి.