Cm revanth: భారత్ సమ్మిట్ వేదికగా తెలంగాణ సీఎం రేవంత్ రెడ్డి రాష్ట్ర ప్రగతిపై విశదీకరించారు. రైతులు, యువత, మహిళలు తమ ప్రభుత్వానికి కీలక భాగస్వాములని పేర్కొన్నారు. రాష్ట్రాన్ని అన్ని రంగాల్లో అగ్రగామిగా తీర్చిదిద్దేందుకు “తెలంగాణ రైజింగ్” దిశగా ముందడుగు వేస్తున్నామని తెలిపారు.
రైతులకు అండగా
వ్యవసాయానికి పెద్దపీట వేసినట్లు సీఎం వెల్లడించారు. రైతులకు కనీస మద్దతు ధరతో పాటు వరి క్వింటాల్‌కు అదనంగా రూ.500 బోనస్ ఇస్తున్నామని చెప్పారు. రైతు బీమా, పంటల బీమా ద్వారా భద్రత కల్పిస్తున్నామన్నారు.
యువతకు అవకాశాలు
విద్య, ఉపాధిపై ప్రత్యేక దృష్టి సారించినట్టు తెలిపారు. ‘యంగ్ ఇండియా స్కిల్స్ యూనివర్సిటీ’ ఏర్పాటు చేసి, 60,000 ప్రభుత్వ ఉద్యోగాల భర్తీ, ఐదు లక్షల మందికి ‘రాజీవ్ యువ వికాసం’ ద్వారా మద్దతు అందించామని వివరించారు.
మహిళా సాధికారతకు బలమైన చర్యలు
67 లక్షల మహిళా స్వయం సహాయక సంఘాలను బలోపేతం చేసినట్టు చెప్పారు. మహిళలకు సౌర విద్యుత్ కంపెనీలు, ఎలక్ట్రిక్ బస్సుల నిర్వహణ బాధ్యతలు అప్పగించినట్టు వివరించారు. ఆర్టీసీ బస్సుల్లో ఉచిత ప్రయాణం, గ్యాస్ సబ్సిడీతో మహిళలకు మద్దతుగా నిలుస్తున్నామని తెలిపారు.
విద్య, వైద్యం, మౌలిక వసతుల అభివృద్ధి
రూ.10 లక్షల వరకు వైద్య ఖర్చులు భరించే రాజీవ్ ఆరోగ్యశ్రీను అమలు చేస్తున్నట్టు తెలిపారు. మూసీ నదిని పునరుజ్జీవనం చేసి, హైదరాబాద్‌కు గ్లోబల్ నగర రూపు అందించేందుకు రీజినల్ రింగ్ రోడ్డు, మెట్రో విస్తరణ వంటి ప్రాజెక్టులను చేపట్టామన్నారు.
సామాజిక న్యాయం, పారదర్శక పాలన
కుల గణన చేపట్టిన తొలి రాష్ట్రంగా గర్విస్తున్నామని తెలిపారు. ఎస్సీ కోటా వర్గీకరణను అమలు చేయడం, థర్డ్ జెండర్ నియామకం వంటి చర్యలు చేపట్టామన్నారు. ప్రతివారం ప్రజావాణి నిర్వహణ ద్వారా నేరుగా ప్రజల ఫిర్యాదులు పరిష్కరిస్తున్నట్టు వివరించారు.
పెట్టుబడుల ఆకర్షణ
అంతర్జాతీయ స్థాయిలో పెట్టుబడులు ఆకర్షించేందుకు దావోస్, అమెరికా, జపాన్ పర్యటనల ద్వారా రూ.2.5 లక్షల కోట్ల పెట్టుబడులు సాధించామని తెలిపారు. యువతకు ప్రైవేట్ రంగ ఉద్యోగాల్లో అవకాశాలు పెరుగుతున్నాయని చెప్పారు.
‘తెలంగాణ రైజింగ్’కు బ్రాండ్ అంబాసిడర్లుగా మారండి
ప్రపంచవ్యాప్తంగా ఉన్న ప్రతినిధులు రాష్ట్ర అభివృద్ధి గాథను ప్రపంచానికి చాటి చెప్పాలని, తెలంగాణను ముందుకు నడిపించేందుకు అందరూ భాగస్వాములు కావాలని సీఎం పిలుపునిచ్చారు.