Tahira Kashyap: బాలీవుడ్ స్టార్ ఆయుష్మాన్ ఖురానా భార్య తహీరా కశ్యప్‌కు మరోసారి బ్రెస్ట్ క్యాన్సర్ సవాలు ఎదురైంది. గతంలో ఏడేళ్ల క్రితం క్యాన్సర్‌ను జయించిన తహీరా, తాజాగా ఈ వ్యాధి మళ్లీ తిరగబెట్టినట్లు వెల్లడించారు. దీంతో ఆమె మరోసారి ధైర్యంగా ఈ యుద్ధాన్ని ఎదుర్కొనేందుకు సిద్ధమవుతున్నారు. త్వరలోనే క్యాన్సర్ నుంచి పూర్తిగా కోలుకుంటానని తహీరా ఆశాభావం వ్యక్తం చేశారు. ఈ సందర్భంగా ఆమె ప్రజలకు కీలక సందేశం ఇచ్చారు. “ప్రతి ఒక్కరూ తప్పనిసరిగా క్యాన్సర్ పరీక్షలు చేయించుకోవాలి. ముందస్తు గుర్తింపే మనల్ని కాపాడుతుంది,” అని తహీరా విజ్ఞప్తి చేశారు.
డైరెక్టర్, రచయిత్రి, నిర్మాతగా బాలీవుడ్‌లో తనదైన ముద్ర వేసిన తహీరా, 2018లో తొలిసారి బ్రెస్ట్ క్యాన్సర్‌తో పోరాడి విజయం సాధించారు. అయితే, ఏడేళ్ల తర్వాత మళ్లీ ఈ వ్యాధి ఆమెను వెంటాడుతోంది. ఈ విషయాన్ని తహీరా స్వయంగా వెల్లడించడంతో, నెటిజన్లు ఆమె త్వరగా కోలుకోవాలని కోరుతూ సోషల్ మీడియాలో సందేశాలు పంచుతున్నారు. ఆయుష్మాన్ ఖురానా కుటుంబం కూడా ఈ కష్ట సమయంలో తహీరాకు అండగా నిలుస్తోంది. క్యాన్సర్‌పై అవగాహన కల్పించేందుకు తహీరా చేస్తున్న కృషిని అభిమానులు మెచ్చుకుంటున్నారు. “మీ ఆరోగ్యం మీ చేతుల్లోనే ఉంది” అని తహీరా పిలుపునిస్తూ, తన పోరాట స్ఫూర్తితో అందరికీ స్ఫూర్తిగా నిలుస్తున్నారు.