Amaravathi: ఆంధ్రప్రదేశ్లో జిల్లా పరిషత్ (ZPP) ఛైర్పర్సన్, వైస్ ఛైర్పర్సన్ ఎన్నికలకు సంబంధించి ఎన్డీయే కూటమి పార్టీల (టీడీపీ, జనసేన, బీజేపీ) మధ్య సీట్ల పంపిణీ కసరత్తు కొలిక్కి వచ్చింది. రాష్ట్రవ్యాప్తంగా కూటమి పార్టీలు విజయం సాధించిన 27 జిల్లా పరిషత్లలో పదవుల కేటాయింపుపై మూడు పార్టీల ముఖ్యనేతలు బుధ, గురువారాల్లో ముఖ్యమంత్రి చంద్రబాబు నాయుడు సమక్షంలో సుదీర్ఘంగా చర్చించి తుది నిర్ణయం తీసుకున్నారు. గురువారం రాత్రి టీడీపీ కేంద్ర కార్యాలయం తమ పార్టీ అభ్యర్థుల జాబితాను అధికారికంగా విడుదల చేయగా, పొత్తులో భాగంగా జనసేన, బీజేపీలకు దక్కిన స్థానాలపై స్పష్టత వచ్చింది.
కూటమి పార్టీల మధ్య జడ్పీ సీట్ల పంపిణీ ఇలా (మొత్తం 27 జిల్లాలు)..
| పార్టీ పేరు | జడ్పీ ఛైర్పర్సన్ పీఠాలు | జడ్పీ వైస్ ఛైర్పర్సన్ పీఠాలు | కేటాయించిన జిల్లాల వివరాలు |
| టీడీపీ (TDP) | 22 | 20 | మిగిలిన 22 జిల్లాల్లో ఛైర్పర్సన్, 20 జిల్లాల్లో వైస్ ఛైర్పర్సన్ స్థానాలు |
| జనసేన (Janasena) | 4 | 5 | ఛైర్పర్సన్: శ్రీకాకుళం, పార్వతీపురం మన్యం, అనకాపల్లి, కాకినాడ |
సామాజిక న్యాయానికి పెద్దపీట – టీడీపీ అభ్యర్థుల ఎంపికలో ముఖ్యాంశాలు..
-
ఛైర్పర్సన్ స్థానాలు (22): బీసీలకు 6, ఎస్సీలకు 5, ఎస్టీలకు 1, జనరల్ 9, ముస్లిం 1 చొప్పున కేటాయించారు. ఇందులో 12 స్థానాలు మహిళలకే దక్కాయి.
-
వైస్ ఛైర్పర్సన్ స్థానాలు (20): బీసీలకు 11, ఎస్సీలకు 1, ఎస్టీలకు 2, జనరల్ 4, ముస్లింలకు 2 చొప్పున కేటాయించగా, ఇందులో 11 స్థానాలు మహిళలకు ఇచ్చారు.
-
సర్దుబాటు ఫార్ములా: జనసేనకు జడ్పీ ఛైర్పర్సన్ పీఠాలు కేటాయించిన చోట, అప్పటివరకు టీడీపీ తరఫున ఛైర్పర్సన్ రేసులో పరిశీలించిన నేతలకు (పార్వతీపురం మన్యంలో వీరేశ్, కాకినాడలో పిల్లి అనంతలక్ష్మి) వైస్ ఛైర్పర్సన్లుగా అవకాశం కల్పించారు.
అభ్యర్థుల జాబితాలో ప్రత్యేక ఆకర్షణలు & జనసేన పరిశీలన పేర్లు..
-
ప్రముఖ నేతల కుమార్తెలకు ఛాన్స్: విజయనగరం జిల్లా జడ్పీ ఛైర్పర్సన్ అభ్యర్థిగా ఇటీవలే టీడీపీలో చేరిన మజ్జి శ్రీనివాసరావు (చిన్న శ్రీను) కుమార్తె మజ్జి సిరిసహస్రను ప్రకటించారు. అలాగే ఏలూరు జిల్లా జడ్పీ ఛైర్పర్సన్ అభ్యర్థిగా దెందులూరు ఎమ్మెల్యే చింతమనేని ప్రభాకర్ కుమార్తె నవ్యశ్రీ పేరు ఖరారైంది. ఎన్టీఆర్ జిల్లా ఛైర్పర్సన్ అభ్యర్థిగా ఎస్సీ వర్గానికి చెందిన ఎంటెక్ పట్టభద్రురాలు కోట పుల్లమ్మకు అవకాశం ఇచ్చారు.
-
జనసేన పరిశీలనలో ఉన్న పేర్లు: జనసేనకు దక్కిన 4 జడ్పీ పీఠాలకు సంబంధించి గురువారం అర్ధరాత్రి వరకు అధికారిక జాబితా విడుదల కానప్పటికీ.. శ్రీకాకుళం ఛైర్పర్సన్గా కొరికాన భవాని (ఎల్.ఎన్.పేట జడ్పీటీసీ), అనకాపల్లికి మోటారు నాగమణి (పరవాడ జడ్పీటీసీ), కాకినాడకు డాక్టర్ బుర్రా దివ్య సునీత్రాజ్ (పెద్దాపురం జడ్పీటీసీ), పార్వతీపురం మన్యం జిల్లాకు నిమ్మల నీలిమ (భామిని జడ్పీటీసీ) పేర్లు పరిశీలనలో ఉన్నట్లు సమాచారం.
