Tragedy: కొద్ది రోజుల్లో పెళ్లి పీటలెక్కాల్సిన ఓ యువకుడిని విధి కబళించింది! పెళ్లి ఏర్పాట్లు, బంధుమిత్రుల సందడితో కళకళలాడాల్సిన ఆ ఇంట ఒక్కసారిగా విషాద ఛాయలు అలముకున్నాయి. కళ్లముందే చేతికందిన కొడుకు విగతజీవుడిగా మారడంతో తల్లిదండ్రులు, కుటుంబ సభ్యుల రోదనలు మిన్నంటాయి. బాపట్ల జిల్లా మార్టూరు పట్టణ పరిధిలోని ఆది జాంబవ కాలనీలో ఈ హృదయ విదారక ఘటన చోటుచేసుకుంది.
కొత్త పెళ్లికూతురు కోసం ఇల్లు ముస్తాబు చేస్తుండగా..
-
వచ్చే నెల 13న వివాహం: మార్టూరు ఆది జాంబవ కాలనీకి చెందిన పెద్దకర్ని యశ్వంత్ (22) అనే యువకుడికి వచ్చే నెల (డిసెంబర్) 13న వివాహం నిశ్చయమైంది. దీంతో కుటుంబ సభ్యులంతా పెళ్లి ఏర్పాట్లలో నిమగ్నమయ్యారు.
-
ఐరన్ పైపు విద్యుత్ తీగలకు తగిలి: కొత్త పెళ్లికూతురు అడుగుపెట్టబోయే తమ ఇల్లు అన్ని హంగులతో, సౌకర్యాలతో అందంగా ఉండాలని యశ్వంత్ ఎంతో ఆశపడ్డాడు. ఇందులో భాగంగానే స్వయంగా తానే ఇంటికి అవసరమైన మరమ్మతు పనులు ప్రారంభించాడు. ఈ పనులు చేస్తుండగా ప్రమాదవశాత్తు యశ్వంత్ చేతిలోని ఐరన్ పైపు పక్కనే ఉన్న విద్యుత్ తీగలకు తగిలింది.
-
అక్కడికక్కడే మృతి: క్షణాల వ్యవధిలో తీవ్రమైన విద్యుత్ షాక్కు గురైన యశ్వంత్ అక్కడికక్కడే కుప్పకూలిపోయాడు. కుటుంబ సభ్యుల కళ్ల ముందే ఈ ఘోరం జరగడంతో వారు తీవ్ర దిగ్భ్రాంతికి లోనయ్యారు. హుటాహుటిన ఆస్పత్రికి తరలించే ప్రయత్నం చేసినప్పటికీ, అప్పటికే యశ్వంత్ ప్రాణాలు కోల్పోయినట్లు వైద్యులు నిర్ధారించారు.
శోకసముద్రంలో ఆది జాంబవ కాలనీ!
