Rahul Gandhi: హైదరాబాద్ వేదికగా జరిగిన అంతర్జాతీయ సదస్సు ‘భారత్ సమ్మిట్-2026’ (Bharat Summit-2026) ముగింపు వేడుకల్లో లోక్‌సభ ప్రతిపక్ష నేత రాహుల్ గాంధీ కేంద్ర ప్రభుత్వ వైఖరిపై తీవ్రస్థాయిలో విరుచుకుపడ్డారు. సదస్సుకు హాజరుకావాల్సిన విదేశీ ప్రతినిధులు, జర్నలిస్టుల వీసాలను చివరి నిమిషంలో రద్దు చేయడంపై ఆయన మండిపడ్డారు. ప్రజాస్వామ్య విలువలను కాలరాస్తూ అసమ్మతి గొంతులను నొక్కేయడం సరికాదని ఆగ్రహం వ్యక్తం చేసిన రాహుల్ గాంధీ.. వీసా రద్దు కారణంగా సదస్సుకు రాలేకపోయిన నార్వే జర్నలిస్టుకు భారతదేశం తరఫున బహిరంగంగా క్షమాపణలు చెప్పడం ఇప్పుడు జాతీయ, అంతర్జాతీయ స్థాయిలో హాట్ టాపిక్‌గా మారింది!
వీసా రద్దు వివాదం – నార్వే జర్నలిస్టుకు రాహుల్ సారీ!
సదస్సుకు హాజరుకావాల్సిన నార్వే జర్నలిస్ట్ హెల్లీ లింగ్ స్వెండ్‌సెన్ (Helle Lyng Svendsen) తో పాటు వంద మందికి పైగా అంతర్జాతీయ ప్రతినిధుల వీసాలను కేంద్రం చివరి నిమిషంలో రద్దు చేయడంపై రాహుల్ గాంధీ స్పందించారు.
-
ప్రధాని మోదీని ప్రశ్నించినందుకేనా? గతంలో ప్రధాని నరేంద్ర మోదీ నార్వేలోని ఓస్లో పర్యటనకు వెళ్లినప్పుడు ప్రశ్నలు అడిగినందుకే ఇప్పుడు తన వీసా రద్దు చేశారని జర్నలిస్ట్ స్వెండ్‌సెన్ ఆరోపించారు.
-
భారత్ తరఫున క్షమాపణ: ఈ ఘటనపై రాహుల్ గాంధీ తీవ్ర విచారం వ్యక్తం చేస్తూ.. సదస్సుకు రాలేకపోయిన నార్వే జర్నలిస్ట్ స్వెండ్‌సెన్‌కు భారతదేశం తరఫున నేను క్షమాపణలు చెబుతున్నాను అని ప్రకటించారు. ప్రజాస్వామ్య విలువలను కాపాడుకోవాల్సిన బాధ్యత అందరిపై ఉందని ఆయన స్పష్టం చేశారు.
వారు అరుస్తారు, ఇతరుల మాట వినరు!.. బీజేపీపై రాహుల్ ఫైర్..
ముగింపు సభలో ప్రసంగిస్తూ బీజేపీ అనుసరిస్తున్న విధానాలను రాహుల్ గాంధీ ఫాసిస్ట్ ధోరణిగా అభివర్ణించారు. ఫాసిస్ట్ శక్తులు కేవలం అరుస్తాయి, కేకలు వేస్తాయి, కానీ ఇతరుల మాట అస్సలు వినవు. ప్రజాస్వామ్యంలో చర్చలకు, భిన్నాభిప్రాయాలకు కచ్చితంగా స్థానం ఉండాలి” అని ఆయన అన్నారు.
విద్వేష రాజకీయాలను ప్రేమ, కరుణ అనే ఆయుధాలతోనే ఎదుర్కొని జయిస్తామని రాహుల్ స్పష్టం చేశారు. ప్రపంచ శాంతి, ప్రజాస్వామ్య పరిరక్షణ కోసం వివిధ దేశాల ప్రతినిధులు ఏకతాటిపైకి రావాలని పిలుపునిచ్చారు.
6 లక్షల మంది గిగ్ వర్కర్లకు తెలంగాణ ప్రభుత్వం భరోసా..
అంతకుముందు హైటెక్ సిటీలోని జయభేరి గ్రౌండ్స్‌లో ముఖ్యమంత్రి రేవంత్ రెడ్డితో కలిసి రాహుల్ గాంధీ ‘తెలంగాణ గిగ్ వర్కర్ల సామాజిక భద్రత, సంక్షేమ చట్టాన్ని’ ప్రారంభించారు. భారత్ జోడో యాత్రలో కార్మికులకు తాను ఇచ్చిన మాటను తెలంగాణ ప్రభుత్వం నిలబెట్టుకుందని అభినందించిన ఆయన.. రాష్ట్రంలోని సుమారు 6 లక్షల మంది గిగ్, ప్లాట్‌ఫారమ్ వర్కర్లకు బీమా రక్షణ, సంక్షేమ బోర్డు ద్వారా అండగా ఉంటామని భరోసా ఇచ్చారు.