ChatGPT: ఇప్పటివరకు మనం ఏదైనా వస్తువు కొనాలంటే చాట్‌జీపీటీని (ChatGPT) “ఏ ఫోన్ బెస్ట్?”, “తక్కువ ధరలో ఎక్కడ దొరుకుతుంది?” అని అడిగి, ఆ తర్వాత మనమే వెబ్‌సైట్‌లోకి వెళ్లి కార్డు వివరాలు కొట్టి పేమెంట్ చేసేవాళ్లం. కానీ ఆ పనిని కూడా ఇకపై ఏఐ (AI) ఏజెంట్లకే అప్పగించేలా టెక్ దిగ్గజం ఓపెన్‌ఏఐ (OpenAI) మరో సంచలన ఫీచర్‌ను తీసుకొచ్చింది!
నవంబర్ 13న అధికారికంగా ‘చాట్‌జీపీటీ వాలెట్’ (ChatGPT Wallet) ను లాంచ్ చేసింది. వీసా (Visa), మాస్టర్‌కార్డ్ (Mastercard), అమెరికన్ ఎక్స్‌ప్రెస్ (American Express) వంటి దిగ్గజ పేమెంట్ సంస్థలతో కలిసి రూపొందించిన ఈ వాలెట్ ద్వారా.. ఇకపై మన తరఫున ఏఐ ఏజెంట్లే ఆన్‌లైన్‌లో షాపింగ్ చేసి పేమెంట్ పూర్తి చేయనున్నాయి!
అసలు ‘చాట్‌జీపీటీ వాలెట్’ ఎలా పనిచేస్తుంది?
ప్రతి వారం సుమారు 120 కోట్ల (1.2 బిలియన్) మంది చాట్‌జీపీటీని వాడుతున్నారని, వారి షాపింగ్ అనుభవాన్ని మరింత సులభతరం చేయడానికే దీన్ని తెచ్చామని ఓపెన్‌ఏఐ తెలిపింది.
-
డాట్స్ (Dots) ఏఐ ఏజెంట్లు: చాట్‌జీపీటీలో ఉండే ‘డాట్స్’ అనే అటానమస్ ఏఐ ఏజెంట్లు మన ఆదేశాల మేరకు వస్తువులను వెతికి, కార్ట్‌లో యాడ్ చేసి పేమెంట్‌కు సిద్ధం చేస్తాయి.
-
ప్రతి కొనుగోలుకు మన పర్మిషన్ తప్పనిసరి: యూజర్లు ముందుగా తమ క్రెడిట్ లేదా డెబిట్ కార్డును వాలెట్‌లో యాడ్ చేయాలి. ఏఐ ఏజెంట్ ఏదైనా కొనే ముందు యూజర్‌కు ఒక నోటిఫికేషన్ వస్తుంది. అందులో ఏయే వస్తువులు కొంటున్నారు, మొత్తం బిల్లు ఎంత, ఏ కార్డు నుంచి డబ్బు కట్ అవుతుందనే వివరాలు కనిపిస్తాయి.
-
బయోమెట్రిక్ చెక్: యూజర్ అవన్నీ చెక్ చేసుకుని ఫేస్ ఐడీ (Face ID) లేదా ఫింగర్‌ప్రింట్ ద్వారా ఓకే చేస్తేనే పేమెంట్ పూర్తవుతుంది.
భద్రత ఎలా? మన కార్డు నంబర్ సేఫ్‌గా ఉంటుందా?
ఏఐ చేతికి పేమెంట్ బాధ్యత ఇస్తే మన కార్డు వివరాలు లీక్ అవుతాయేమో అన్న భయం అస్సలు అవసరం లేదని ఓపెన్‌ఏఐ స్పష్టం చేసింది.
-
డిజిటల్ టోకెన్ (Payment Token) టెక్నాలజీ: యూజర్ బయోమెట్రిక్ ఆమోదం తెలపగానే, పేమెంట్ నెట్‌వర్క్ మన అసలు కార్డు వివరాలకు బదులుగా ఒక తాత్కాలిక ‘డిజిటల్ టోకెన్’ (వేరే కార్డు నంబర్, సీవీవీ, ఎక్స్‌పైరీ తేదీతో) సృష్టిస్తుంది.
-
ఆ టోకెన్ ద్వారానే పేమెంట్ జరుగుతుంది కాబట్టి.. మన ఒరిజినల్ కార్డు నంబర్ గానీ, వివరాలు గానీ ఏఐ ఏజెంట్‌కు గానీ, షాపింగ్ వెబ్‌సైట్‌కు గానీ అస్సలు కనిపించవు!
-
అంతేకాదు, సాధారణ కార్డు వాడకంతో వచ్చే రివార్డ్ పాయింట్లు యథావిధిగా వస్తాయి. వస్తువు డ్యామేజ్ అయినా లేదా ఏదైనా వివాదం తలెత్తినా బ్యాంకుల రక్షణ కవచం వర్తిస్తుంది.
ప్రస్తుతం ఎవరికి అందుబాటులో ఉంది? వ్యాపారుల కోసం ‘కామర్స్ ప్లేబుక్’!
-
ఎవరికి అందుబాటులో ఉంది? ప్రస్తుతానికి ఈ ఫీచర్ అమెరికా (US)లోని 18 ఏళ్లు పైబడిన ChatGPT Pro సబ్‌స్క్రైబర్లకు మాత్రమే అందుబాటులోకి వచ్చింది. త్వరలోనే ఇతర దేశాలకు విస్తరించనున్నారు.
-
భవిష్యత్ ప్లాన్: రాబోయే రోజుల్లో “నెలకు ఇంత బడ్జెట్ లోపు, ఫలానా వస్తువులను నువ్వే కొనుగోలు చెయ్” అని ముందుగానే లిమిట్స్ పెట్టి పూర్తి షాపింగ్ బాధ్యతను ఏఐ ఏజెంట్లకు అప్పగించే ఫీచర్‌పై పనిచేస్తున్నట్లు ఓపెన్‌ఏఐ తెలిపింది.
-
వ్యాపారులకు గైడ్‌లైన్స్: ఏఐ ఏజెంట్లు వెబ్‌సైట్లలోకి వెళ్లి షాపింగ్ చేస్తున్నప్పుడు ఫైర్‌వాల్స్ లేదా ఫ్రాడ్ డిటెక్షన్ టూల్స్ వాటిని రోబోట్లుగా భావించి బ్లాక్ చేయకుండా ఉండేందుకు.. వ్యాపారులు, పేమెంట్ గేట్‌వేల (Stripe, Adyen మొదలైనవి) కోసం ఓపెన్‌ఏఐ ప్రత్యేకంగా ‘కామర్స్ ప్లేబుక్’ (Commerce Playbook) ను కూడా విడుదల చేసింది.