AP SEC: ఆంధ్రప్రదేశ్‌లో జరుగుతున్న స్థానిక సంస్థల ఎన్నికల ప్రక్రియలో పారదర్శకతను మరింత పెంచేందుకు రాష్ట్ర ఎన్నికల సంఘం (AP SEC) అత్యంత కీలక నిర్ణయం తీసుకుంది. ఎన్నికల బరిలో నిలిచిన అభ్యర్థుల నామినేషన్ పత్రాలు, అఫిడవిట్లను అధికారిక వెబ్‌సైట్‌లో ఆన్‌లైన్ ద్వారా ప్రజలందరికీ అందుబాటులో ఉంచుతున్నట్లు ఎస్‌ఈసీ హైకోర్టుకు నివేదించింది. స్థానిక సంస్థల ఎన్నికల్లో పోటీ చేసే అభ్యర్థుల వివరాలను ప్రజలు తెలుసుకునేలా ప్రత్యేక పోర్టల్‌ను సిద్ధం చేసినట్లు వెల్లడించింది.
అభ్యర్థులు దాఖలు చేసిన నామినేషన్ పత్రాలు, ఆస్తులు-అప్పులు, క్రిమినల్ కేసుల వివరాలతో కూడిన అఫిడవిట్లను ఏమాత్రం ఆలస్యం చేయకుండా వెంటనే పోర్టల్‌లో అప్‌లోడ్ చేయాలని క్షేత్రస్థాయి ఎన్నికల అధికారులకు ఎస్‌ఈసీ స్పష్టమైన ఆదేశాలు జారీ చేసింది. పోలింగ్ తేదీ కంటే ముందే అభ్యర్థుల పూర్వాపరాలు, వారి అర్హతలు ఓటర్లకు స్పష్టంగా తెలియాలనే ఉద్దేశంతోనే ఈ చర్యలు చేపట్టినట్లు కోర్టుకు తెలిపింది. దీనివల్ల ఓటర్లు తమ డివిజన్ లేదా వార్డుల్లో పోటీ చేస్తున్న అభ్యర్థుల పూర్తి సమాచారాన్ని ఇంట్లో కూర్చునే ఒక్క క్లిక్‌తో పరిశీలించే అవకాశం లభించనుంది.