YS Jagan: వైఎస్సార్‌సీపీ అధినేత, ఆంధ్రప్రదేశ్ మాజీ ముఖ్యమంత్రి వైఎస్ జగన్మోహన్ రెడ్డి తన సోదరి, ఏపీ పీసీసీ చీఫ్ వైఎస్ షర్మిలకు రాసిన ఒక లేఖ రాజకీయ వర్గాల్లో తీవ్ర చర్చనీయాంశంగా మారింది. షర్మిల కుమార్తె అంజలి వివాహ వేదికకు సంబంధించి బెంగళూరులోని తన నివాసాన్ని ఉపయోగించాలనే ప్రతిపాదనపై భద్రతా కారణాల దృష్ట్యా జగన్ అభ్యంతరం వ్యక్తం చేశారు. ఈ మేరకు ఈ నెల 9వ తేదీనే (అక్టోబర్ 9న) ఆయన షర్మిలకు వ్యక్తిగతంగా లేఖ రాసిన విషయం తాజాగా వెలుగులోకి వచ్చింది.
వివాదాలున్నా అంజలి సంతోషమే ముఖ్యం
షర్మిలకు రాసిన ఆ లేఖలో జగన్ పలు కీలక అంశాలను ప్రస్తావించారు. గత ఏడేళ్లుగా తమ మధ్య ఎలాంటి మనస్పర్థలు, వివాదాలు తలెత్తినప్పటికీ.. అంజలి జీవితాంతం ప్రేమ, సంతోషాలతో నిండు నూరేళ్లు వర్ధిల్లాలని తాను మనస్ఫూర్తిగా కోరుకుంటున్నట్లు ఆయన పేర్కొన్నారు. మేనకోడలి పెళ్లి వార్త తనకు ఎంతగానో సంతోషాన్ని ఇచ్చిందని లేఖ ప్రారంభంలో వెల్లడించారు.
బెంగళూరు నివాసంలో భద్రతా సమస్యలు
బెంగళూరులోని తన నివాసంలో వివాహం జరిపించాలని షర్మిల భావిస్తున్నట్లు తెలిసిందని, అయితే ప్రస్తుతం తాను అక్కడే నివసిస్తున్నందున అక్కడ పెళ్లి జరిపించడం వల్ల తీవ్ర భద్రతా సమస్యలు, వ్యక్తిగత గోప్యతకు భంగం వాటిల్లే ప్రమాదం ఉందని జగన్ స్పష్టం చేశారు. వివాహం వంటి పెద్ద వేడుకకు పెద్ద సంఖ్యలో అతిథులతో పాటు క్యాటరింగ్ సిబ్బంది, డెకరేటర్లు, ఈవెంట్ మేనేజర్లు, ఫోటోగ్రాఫర్లు, వీడియోగ్రాఫర్లు వంటి వేలాది మంది బయటి వ్యక్తులు వస్తుంటారని తెలిపారు.
ఆ పరిసరాల దృశ్యాలు, ఫోటోలు బయటకు రావడం వల్ల భద్రతాపరంగా తీవ్ర సమస్యలు వస్తాయని వివరించారు. ఈ నిర్ణయం తీసుకోవడం తనకు తేలిక కాదని, ఒకవేళ తన సొంత కుమార్తెలు హర్ష లేదా వర్ష పెళ్లిళ్లయినా తాను ఇలాంటి నిర్ణయమే తీసుకునేవాడినని జగన్ పేర్కొన్నారు.
మరో వేదికను ఎంచుకోండి.. లోటస్ పాండ్‌లో చేసుకోండి
గతంలో రాజా రెడ్డి వివాహానికి చేసినట్లు కన్వెన్షన్ సెంటర్ లేదా ఏదైనా డెస్టినేషన్ వెడ్డింగ్ వేదికను ఎంచుకోవాలని షర్మిలకు జగన్ సూచించారు. ఒకవేళ ప్రైవేట్ నివాసంలోనే వేడుక నిర్వహించాలనుకుంటే.. హైదరాబాద్‌లోని తన లోటస్ పాండ్ ప్రాపర్టీని వినియోగించుకోవచ్చని, ఆ ఆఫర్ ఇప్పటికీ అమలులోనే ఉందని లేఖలో గుర్తుచేశారు. తన ఆందోళనలను పరిగణనలోకి తీసుకొని కుటుంబ భద్రత దృష్ట్యా ప్రత్యామ్నాయ వేదికను ఎంపిక చేసుకోవాలని వైఎస్ జగన్ విజ్ఞప్తి చేశారు.
మేనకోడలు అంజలి వివాహంపై ఆనందం వ్యక్తం చేస్తూనే, భద్రతా కారణాల దృష్ట్యా బెంగళూరులోని తన ఇంట్లో పెళ్లికి అంగీకరించలేనని వైఎస్ జగన్ స్పష్టం చేశారు. దీనికి బదులుగా హైదరాబాద్ లోటస్ పాండ్ ప్రాపర్టీలో లేదా ఇతర కన్వెన్షన్ హాల్స్‌లో వివాహం నిర్వహించుకోవాలని ఆయన షర్మిలకు లేఖ ద్వారా సూచించారు.