Scam: తాను పెద్ద వ్యాపారవేత్తనని, కోటీశ్వరుడినని చెప్పుకుంటూ ఏకంగా 20 మంది మహిళా కానిస్టేబుళ్లను ప్రేమ, పెళ్లి, అధిక లాభాల పేరుతో మోసగించిన విక్రాంత్ తోమర్ అనే ఘరానా నిందితుడి వ్యవహారం ఢిల్లీలో తీవ్ర కలకలం రేపింది. ఉత్తరప్రదేశ్‌కు చెందిన ఈ నిందితుడు ఖరీదైన కార్లు, విలాసవంతమైన జీవనశైలిని ఎరగా చూపి సుమారు రూ.కోట్లలో డబ్బులు వసూలు చేసి చివరకు పోలీసులకు చిక్కాడు. కరోల్‌బాగ్ పోలీస్ స్టేషన్‌లో విధులు నిర్వహిస్తున్న ఓ మహిళా కానిస్టేబుల్ ధైర్యంగా ఫిర్యాదు చేయడంతో ఈ మోసాల నెట్‌వర్క్ వెలుగులోకి వచ్చింది.
బెట్టింగ్ వ్యాపారం పేరుతో రూ.24 లక్షలు లూటీ
బాధితురాలి ఫిర్యాదు ప్రకారం.. విక్రాంత్ తోమర్ ఆమెకు దగ్గరై తానో బడా బిజినెస్‌మ్యాన్‌నని, పెళ్లి చేసుకుంటానని నమ్మించాడు. అనంతరం ఆన్‌లైన్ బెట్టింగ్ ప్లాట్‌ఫామ్‌లలో పెట్టుబడి పెడితే తక్కువ సమయంలోనే భారీ లాభాలు పొందవచ్చంటూ ఆశ చూపించాడు. అతని మాయమాటలు నిజమని నమ్మిన ఆ మహిళా కానిస్టేబుల్ తన సొంత డబ్బు రూ.12 లక్షలతో పాటు, బ్యాంకు నుంచి మరో రూ.12 లక్షల పర్సనల్ లోన్ తీసుకుని మొత్తం రూ.24 లక్షలను విక్రాంత్‌కు అప్పగించింది. ఆ తర్వాత డబ్బు తిరిగి ఇవ్వకుండా తప్పించుకు తిరుగుతుండటంతో, అనుమానం వచ్చిన బాధితురాలు ఆరా తీయగా అతను అసలు వ్యాపారవేత్తే కాదని తేలడంతో వెంటనే పోలీసులను ఆశ్రయించింది.
విలాసవంతమైన సోషల్ మీడియా పోస్టులు.. అద్దె కార్లతో షో
కేసు నమోదు చేసుకున్న పోలీసులు లోతుగా దర్యాప్తు చేయగా షాకింగ్ నిజాలు బయటపడ్డాయి. కేవలం ఒక్కరే కాకుండా ఏకంగా 20 మంది మహిళా కానిస్టేబుళ్లు ఈ కిలాడీ చేతిలో మోసపోయినట్లు తేలింది. మహిళా పోలీసులను ఆకర్షించేందుకు నిందితుడు లగ్జరీ రెస్టారెంట్లు, ఖరీదైన భవనాల్లో ఉన్నట్లుగా సోషల్ మీడియాలో ఫోటోలు, వీడియోలు పోస్ట్ చేసేవాడు. ఖరీదైన కార్లను అద్దెకు తీసుకుని వచ్చి వారిని లాంగ్ డ్రైవ్‌లకు తీసుకెళ్తూ తాను నిజమైన ధనవంతుడినని నమ్మించేవాడు.
సహజీవనం చేస్తున్న మహిళ కూడా కానిస్టేబులే!
ఈ కేసులో మరో ఆశ్చర్యకరమైన విషయం ఏమిటంటే.. నిందితుడు ప్రస్తుతం ఢిల్లీ పోలీస్ విభాగంలోనే పనిచేస్తున్న మరో మహిళా కానిస్టేబుల్‌తో సహజీవనం (లివ్-ఇన్ రిలేషన్) సాగిస్తున్నాడు. ఆమె ద్వారానే పోలీస్ డిపార్ట్‌మెంట్‌లోని ఇతర మహిళా కానిస్టేబుళ్ల వివరాలు, వారి ఫోన్ నంబర్లు, వ్యక్తిగత నేపథ్యాలను సేకరించి పక్కా ప్లాన్‌తో వల వేసినట్లు విచారణలో వెల్లడైంది. నిందితుడిని అదుపులోకి తీసుకున్న పోలీసులు అతని బ్యాంకు ఖాతాలను, మోసపోయిన మొత్తం నిధులను రికవరీ చేసేందుకు చర్యలు ప్రారంభించారు.
కోటీశ్వరుడినంటూ విలాసవంతమైన నాటకాలు ఆడి 20 మంది మహిళా కానిస్టేబుళ్లను బెట్టింగ్, పెళ్లి పేర్లతో మోసగించిన విక్రాంత్ తోమర్‌ను పోలీసులు గుర్తించారు. నిందితుడిపై కఠిన సెక్షన్ల కింద కేసు నమోదు చేసి, అతను కాజేసిన సొమ్మును రికవరీ చేసే దిశగా దర్యాప్తు ముమ్మరం చేశారు.