Chandrababu: జగన్‌ది ఫ్యాక్షన్‌ మనస్తత్వం.. హిట్‌ అండ్‌ రన్‌ పాలిటిక్స్‌ చేస్తున్నారు

రాష్ట్రంలో నామినేషన్లు భారీగా నమోదవుతుంటే ఓర్వలేక వైఎస్సార్‌సీపీ కార్యకర్తలు పలుచోట్ల దాడులకు తెగబడ్డారని చంద్రబాబు పేర్కొన్నారు. “పుంగనూరు, రాయచోటి, పులివెందుల, దర్శి, కనిగిరి, పత్తికొండ వంటి ప్రాంతాల్లో ఎన్డీయే కూటమి శ్రేణులపై దాడులు చేశారు. రాయచోటిలో అంతర్రాష్ట్ర కిరాయి గూండాలను తీసుకొచ్చి గొడవలు సృష్టించారు. దర్శిలో పోలీసులపైనే దాడులకు తెగబడ్డారు. బుర్కాలు వేసుకుని వచ్చి నామినేషన్ పత్రాలను లాక్కెళ్లే స్థాయికి దిగజారారు. ఎన్నికల్లో హింస సృష్టించి, రాష్ట్రంలో శాంతిభద్రతలు లేవంటూ ప్రెసిడెంట్ రూల్ తీసుకురావాలనేది వారి కుట్ర” అని సీఎం ఆగ్రహం వ్యక్తం చేశారు. 2021 స్థానిక ఎన్నికల్లో బెదిరింపులతో ఏకగ్రీవాలు చేసుకున్న చరిత్ర వారిదని గుర్తుచేశారు.

వైఎస్ జగన్మోహన్ రెడ్డి పాలనంతా విధ్వంసమేనని చంద్రబాబు విమర్శించారు. “కాంగ్రెస్‌ను చూశాను, వైఎస్సార్‌ను చూశాను.. కానీ జగన్ తీరు పూర్తిగా భిన్నం. తన మాట వినకపోతే శత్రువులుగా చూసే ఫ్యాక్షన్ మనస్తత్వం ఆయనది. బాబాయి వివేకా హత్య కేసులో డ్రామాలు ఆడి నిందలు నాపై వేశారు. న్యాయం కోసం పోరాడుతున్న సొంత చెల్లెలిపైనే ఆరోపణలు చేశారు. చివరికి ఆస్తుల వివాదంలో కన్నతల్లిని సైతం కోర్టుకు ఈడ్చిన వ్యక్తి జగన్. ఆయనకు రాజకీయ విలువలు లేవు, కుటుంబ నైతికతా లేదు” అని మండిపడ్డారు.

ప్రతిపక్ష నేతగా వైఎస్ జగన్ వ్యవహరిస్తున్న తీరును చంద్రబాబు ఎండగట్టారు. “ప్రజల్లో సమస్యలు వచ్చినప్పుడు బెంగళూరు నుంచి వస్తారు.. మూడు గంటల పాటు ప్రెస్‌మీట్ పెడతారు, అధికారులను లేదా గవర్నర్‌ను కలిసి మళ్లీ బెంగళూరు వెళ్లిపోతారు. అసెంబ్లీకి రారు. ఆయన అన్నగా ఫెయిలయ్యారు, మేనమామగా ఫెయిలయ్యారు, సీఎంగా ఫెయిలయ్యారు, ఇప్పుడు బాధ్యతాయుతమైన ప్రతిపక్ష నేతగా కూడా పూర్తిగా విఫలమయ్యారు” అని సీఎం స్పష్టం చేశారు.

స్థానిక సంస్థల ఎన్నికల్లో శాంతిభద్రతలకు విఘాతం కలిగిస్తూ రాష్ట్రాన్ని కించపరిచేలా వైఎస్సార్‌సీపీ వ్యవహరిస్తోందని సీఎం చంద్రబాబు ఆరోపించారు. రాష్ట్ర అభివృద్ధికి అడ్డంకిగా మారిన ఫ్యాక్షన్ మనస్తత్వాన్ని, చట్టవిరుద్ధ చర్యలను ప్రభుత్వం ఎంతమాత్రం ఉపేక్షించబోదని ఆయన తేల్చిచెప్పారు.