Bittu Tabahi: ‘మేరా భారత్ మహాన్’ అని నినాదాలు చేయడం సులువే.. కానీ పౌర స్పృహ (Civic Sense), పరిసరాల పరిశుభ్రత దగ్గరకు వచ్చేసరికి సమాజంగా మనం ఎక్కడ ఉన్నామనే చేదు నిజాన్ని మరోసారి కళ్లకు కట్టింది ఓ వైరల్ వీడియో. పట్టుమని 25 ఏళ్లు కూడా లేని ఓ సాధారణ యువకుడు ఒంటిచేత్తో ఎనిమిది నెలలు శ్రమించి టన్నుల కొద్దీ వ్యర్థాలను బయటకు తీసి ఓ నదిని స్వచ్ఛంగా మారిస్తే.. స్థానికులు మాత్రం కొద్ది వారాల్లోనే దాన్ని మళ్లీ ప్లాస్టిక్ డంపింగ్ యార్డ్‌గా మార్చేశారు.
తాను ప్రాణం పెట్టి క్లీన్ చేసిన నది మళ్లీ చెత్త కుప్పలతో ఊపిరాడక కొట్టుమిట్టాడుతుండటం చూసి పర్యావరణ కార్యకర్త, కంటెంట్ క్రియేటర్ సురేంద్ర సింగ్ చౌదరి అలియాస్ ‘బిట్టు తబాహీ’ (Bittu Tabahi) తీవ్ర భావోద్వేగానికి లోనయ్యాడు. ఆవేదనతో అతడు సోషల్ మీడియాలో పెట్టిన వీడియో ప్రస్తుతం దేశవ్యాప్తంగా తీవ్ర చర్చనీయాంశంగా మారింది.
ఎనిమిది నెలల పాటు ఒంటరి పోరాటం – అజ్నార్ నది ప్రక్షాళన..
మధ్యప్రదేశ్‌లోని రాజ్‌గఢ్ జిల్లాలో ప్రవహించే అజ్నార్ నది తీరంలో కొన్నేళ్లుగా పేరుకుపోయిన ప్లాస్టిక్ కాలుష్యాన్ని చూసి చలించిపోయిన 20 ఏళ్ల బిట్టు తబాహీ.. దాన్ని ఎలాగైనా పరిశుభ్రంగా మార్చాలని నడుం బిగించాడు.. ఎలాంటి అత్యాధునిక యంత్రాలు, జేసీబీలు లేకుండా.. కనీస రక్షణ పరికరాలతో ఒక్కడే ఎనిమిది నెలల పాటు నదిలోకి దిగి టన్నుల కొద్దీ ప్లాస్టిక్ సంచులు, వ్యర్థాలను వెలికితీశాడు.
కొద్ది వారాల్లోనే మళ్లీ పాత రూపం..
అయితే ఇంత కష్టపడి నది ఒడ్డును స్వచ్ఛంగా మార్చిన కొద్దిరోజులకే.. స్థానికులు మళ్లీ యథేచ్ఛగా నదిలోకి, వంతెన పైనుంచి ప్లాస్టిక్ కవర్లు, పూజా సామగ్రి, మురుగు వ్యర్థాలను పారబోశారు. వంతెన కింద నీటిపై తేలియాడుతున్న టన్నుల కొద్దీ చెత్తను చూసి బిట్టు హతాశుడయ్యాడు.
నా 8 నెలల శ్రమ ఇలా బూడిదలో పోసిన పన్నీరవుతుందని ఊహించలేదు..
నది దుస్థితిని చూపిస్తూ మంగళవారం ఇన్‌స్టాగ్రామ్‌లో వీడియో షేర్ చేసిన బిట్టు.. “నేను పడ్డ 8 నెలల కష్టమంతా ఇలా కొద్ది రోజుల్లోనే వ్యర్థమవుతుందని కలలో కూడా అనుకోలేదు” అని ఎమోషనల్ క్యాప్షన్ రాశాడు.
ఈత రాకపోయినా తగ్గేదేలే..
అయితే ఆ నిరాశలోనూ అతడు వెనకడుగు వేయలేదు. చేతులకు గ్లౌజులు తొడుక్కుని, బూట్లు వేసుకుని.. తనకు అసలు సరిగ్గా ఈత రాదని తెలిసినప్పటికీ ప్రాణాలను లెక్కచేయకుండా మళ్లీ నీటిలోకి దిగాడు. ఒక్కొక్క ప్లాస్టిక్ సంచీని ఒడ్డుకు లాగుతూ మళ్లీ క్లీనింగ్ పని మొదలుపెట్టాడు.
సలహాలు కోరిన కుర్రాడు..
ఈ నదిని మరింత సమర్థవంతంగా, త్వరగా ఎలా క్లీన్ చేయవచ్చో తనకు తగిన ఐడియాలు, సలహాలు ఇవ్వాలని నెటిజన్లను కోరాడు.
దేశవ్యాప్తంగా ప్రశంసలు – ఆనంద్ మహీంద్రా, బోయాన్ స్లాట్ అభినందనలు..
బిట్టు తబాహీ కేవలం అజ్నార్ నదికే పరిమితం కాలేదు. దేశంలోని పలు ప్రాంతాల్లో భారీ క్లీనప్ డ్రైవ్‌లు నిర్వహించి గుర్తింపు పొందాడు:
యమునా, గుర్గావ్ క్లీనింగ్:
ఇటీవల సెప్టెంబర్‌లో ఢిల్లీలోని యమునా నది పరిసరాల నుంచి 585 కేజీల వ్యర్థాలను తొలగించాడు. గుర్గావ్‌లోని ఖేడ్కీ దౌలా ప్రాంతంలో ఏకంగా 2,435 కేజీల చెత్తను క్లియర్ చేశాడు. నోయిడాతో కలిపి త్రి-నగరాల ప్రక్షాళన ఉద్యమం చేపట్టాడు.
తురహళ్లి ఫారెస్ట్ మిషన్:
బెంగళూరు కనకపుర రోడ్డు సమీపంలోని తురహళ్లి అడవులను 100 మంది వాలంటీర్లతో కలిసి ప్లాస్టిక్ రహితంగా మార్చాడు.
గ్లోబల్ గుర్తింపు & జాబ్ ఆఫర్:
బిట్టు నిస్వార్థ సేవను చూసి ప్రముఖ పారిశ్రామికవేత్త ఆనంద్ మహీంద్రా గతంలోనే ‘ఎక్స్’ వేదికగా ప్రత్యేకంగా అభినందించారు. ప్రపంచ ప్రసిద్ధ నెదర్లాండ్స్ పర్యావరణ సంస్థ ‘ది ఓషన్ క్లీనప్’ ఫౌండర్ బోయాన్ స్లాట్ సైతం బిట్టు పనితనాన్ని మెచ్చుకోవడమే కాకుండా తమ సంస్థలో ఉద్యోగ అవకాశాన్ని కూడా ప్రతిపాదించారు.
సోషల్ మీడియాలో ఆగ్రహం – ‘సివిక్ సెన్స్ అనేది నేరంగా మారిందా?’..
బిట్టు షేర్ చేసిన తాజా వీడియో వైరల్ కావడంతో నెటిజన్లు తీవ్ర ఆగ్రహం వ్యక్తం చేస్తున్నారు:
ఒక్క వ్యక్తి ఎన్నిసార్లు క్లీన్ చేస్తాడు? నిరంతరం చెత్త వేసే సమాజం మారకపోతే పర్యావరణం ఎలా బాగుపడుతుంది? అని నెటిజన్లు ప్రశ్నిస్తున్నారు.
నువ్వు నిజమైన హీరో బ్రదర్.. కానీ మన దేశంలో పౌర స్పృహ (Civic Sense) అనేది కనుమరుగైంది. పర్యావరణాన్ని ప్రేమించని వారికి కఠిన జరిమానాలు వేయాలి అని కామెంట్లు పెడుతున్నారు. నదుల్లో చెత్త వేసే వారిపై స్థానిక మున్సిపల్ అధికారులు భారీ జరిమానాలు విధిస్తే తప్ప ఈ పరిస్థితి మారదని ప్రజలు డిమాండ్ చేస్తున్నారు.
View this post on Instagram