NIA Investigation: దుబాయ్ నుంచి ఇజ్రాయెల్‌లోని టెల్ అవీవ్ వెళ్తున్న ఫ్లైదుబాయ్ విమానంలో 174 మంది ప్రయాణికుల ప్రాణాలను కాపాడి, అంతర్జాతీయంగా ప్రశంసలు అందుకున్న భారతీయ పైలట్ కెప్టెన్ స్మిత్ మచ్ఛర్‌పై (Smit Machchhar) జరిగిన హత్యాయత్నం, విమానం హైజాక్ కుట్ర కేసులో జాతీయ దర్యాప్తు సంస్థ (NIA) దూకుడు పెంచింది. ఈ ఉగ్ర కుట్ర వెనుక ఉన్న లోతైన నెట్‌వర్క్‌ను ఛేదించేందుకు త్వరలోనే యూఏఈ (UAE)కి తమ ప్రత్యేక దర్యాప్తు బృందాన్ని పంపేందుకు కేంద్ర ప్రభుత్వ అనుమతిని కోరాలని ఎన్ఐఏ నిర్ణయించింది.
బాధితుడు భారత పౌరుడు కావడం, విమానాన్ని కూల్చేయడం లేదా హైజాక్ చేయాలనే స్పష్టమైన ఉద్దేశంతో దాడి జరగడం, దీనికి జాతీయ, అంతర్జాతీయ స్థాయిలో తీవ్ర ప్రభావాలు ముడిపడి ఉండటంతో ఎన్ఐఏ రంగంలోకి దిగింది. కేంద్ర హోంమంత్రిత్వ శాఖ ఆదేశాల మేరకు ఎన్ఐఏ ఇప్పటికే ‘యాంటీ హైజాకింగ్ చట్టం-2016’ తో పాటు ఉగ్రవాద నిరోధక చట్టం (UAPA) కింద ఎఫ్‌ఐఆర్ నమోదు చేసింది.
యూఏఈలో ఎన్ఐఏ బృందం చేపట్టే కీలక చర్యలు..
కో-పైలట్ జరిపిన గొడ్డలి దాడిలో తల, చేతులకు తీవ్ర గాయాలై ప్రస్తుతం యూఏఈలోని ఆస్పత్రిలో చికిత్స పొందుతున్న భారతీయ పైలట్ కెప్టెన్ స్మిత్ మచ్ఛర్‌ను ఎన్ఐఏ బృందం కలిసి ఆయన వాంగ్మూలాన్ని (స్టేట్‌మెంట్) అధికారికంగా నమోదు చేయనుంది.
ఉగ్రవాది హమామ్ అల్-హమ్మామి విచారణ..
ఈ కేసులో అరెస్టయిన ఒమన్ దేశానికి చెందిన కో-పైలట్ హమామ్ అల్-హమ్మామిని (Hamam al-Hammami) నేరుగా ప్రశ్నించేందుకు (Access) యూఏఈ అధికారుల అనుమతిని ఎన్ఐఏ కోరనుంది.
యూఏఈ దర్యాప్తు వివరాల సేకరణ..
సంఘటన విదేశీ గడ్డపై, గగనతలంలో జరిగినందున యూఏఈ భద్రతా ఏజెన్సీలు ఇప్పటివరకు సేకరించిన సాంకేతిక ఆధారాలు, నిందితుడి కాల్ డేటా, అతడి డిజిటల్ డివైజ్‌ల వివరాలను ఎన్ఐఏ అధికారులు సేకరించనున్నారు.
సెప్టెంబర్ 30న ఆకాశంలో అసలేం జరిగింది?..
సెప్టెంబర్ 30న ఉదయం 7:05 గంటలకు (గల్ఫ్ కాలమానం) 174 మంది ప్రయాణికులు, ఆరుగురు సిబ్బందితో ఫ్లైదుబాయ్ విమానం (FZ-1073 – బోయింగ్ 737 మ్యాక్స్ 8) టెల్ అవీవ్ లక్ష్యంగా దుబాయ్ నుంచి బయలుదేరింది:
కాక్‌పిట్ గొడ్డలితో రక్తపాతం..
విమానం జోర్డాన్-సౌదీ అరేబియా సరిహద్దులో ప్రయాణిస్తున్న సమయంలో.. కో-పైలట్ హమామ్ అల్-హమ్మామి కాక్‌పిట్‌లోని అత్యవసర క్రాష్ యాక్స్ (గొడ్డలి)తో కెప్టెన్ స్మిత్ మచ్ఛర్‌పై మెరుపుదాడి చేశాడు. స్మిత్ తల, చేతులపై తీవ్రంగా నరికి కాక్‌పిట్‌పై పూర్తి నియంత్రణ సాధించేందుకు యత్నించాడు.
రక్తమోడుతున్నా చాకచక్యంగా వ్యవహరించిన స్మిత్..
శరీరం నుంచి తీవ్ర రక్తస్రావం జరుగుతున్నప్పటికీ స్మిత్ ఏమాత్రం ధైర్యం కోల్పోలేదు. ప్రాణాలను పణంగా పెట్టి కాక్‌పిట్ డోర్‌ను అన్‌లాక్ చేశాడు. వెంటనే ప్రయాణికులు, క్యాబిన్ సిబ్బంది కాక్‌పిట్‌లోకి దూసుకొచ్చి ఉగ్ర కో-పైలట్‌ను పట్టుకుని బంధించారు.
సౌదీలో ఎమర్జెన్సీ ల్యాండింగ్..
ఆ తర్వాత విమానంలో ప్రయాణిస్తున్న రిజర్వ్ పైలట్లు విమానాన్ని తమ ఆధీనంలోకి తీసుకుని సౌదీ అరేబియాలో సురక్షితంగా ఎమర్జెన్సీ ల్యాండింగ్ చేయడంతో పెను ప్రమాదం తప్పింది.
9/11 తరహా దాడికి ప్లాన్ – ఆస్ట్రేలియాలో రాడికలైజేషన్..
యూఏఈ అటార్నీ జనరల్ కౌన్సిలర్ డాక్టర్ హమద్ సైఫ్ అల్-షమ్సీ ఈ దాడి వెనుక ఉన్న షాకింగ్ నిజాలను వెల్లడించారు. అమెరికాలో జరిగిన 2001 సెప్టెంబర్ 11 (9/11) నాటి ట్విన్ టవర్స్ ఉగ్రదాడి తరహాలోనే.. ఈ విమానాన్ని హైజాక్ చేసి నేరుగా టెల్ అవీవ్‌లోని బెన్ గురియన్ అంతర్జాతీయ విమానాశ్రయ టెర్మినల్‌పైకి వేగంగా తీసుకెళ్లి ఢీకొట్టించి భారీ మారణహోమం సృష్టించాలనేది నిందితుడి ప్రధాన కుట్ర. 2017లో ఆస్ట్రేలియాలో చదువుకుంటున్న సమయంలోనే అల్-హమ్మామి తీవ్రవాద భావజాలానికి ఆకర్షితుడైనట్లు (రాడికలైజ్ అయినట్లు) ప్రాథమిక విచారణలో తేలింది.
కెప్టెన్ స్మిత్‌కు అంతర్జాతీయ ప్రశంసలు – ఇజ్రాయెల్ అత్యున్నత పురస్కారం:
రెండో 9/11 తరహా పెను విధ్వంసాన్ని అడ్డుకున్న భారత కెప్టెన్ స్మిత్ మచ్ఛర్ సాహసాన్ని భారత ప్రధాని నరేంద్ర మోదీ, ఇజ్రాయెల్ ప్రధాని బెంజమిన్ నెతన్యాహు సహా ప్రపంచ దేశాల అధినేతలు కొనియాడారు.
ఆయన చూపిన అసాధారణ తెగువ, వృత్తిపరమైన అంకితభావానికి గుర్తింపుగా ఇజ్రాయెల్ ప్రభుత్వం కెప్టెన్ స్మిత్‌కు తమ దేశ అత్యున్నత పౌర పురస్కారమైన ‘ప్రెసిడెన్షియల్ అవార్డ్ ఫర్ సివిలియన్ హీరోయిజం’ (Presidential Award for Civilian Heroism) ప్రకటించింది. కేంద్రం అనుమతి రాగానే భారత ఎన్ఐఏ అధికారులు యూఏఈ వెళ్లి విచారణ ప్రక్రియను ముమ్మరం చేయనున్నారు.