K Rammohan Naid: పశ్చిమ బెంగాల్ రాష్ట్రంలో విమాన కనెక్టివిటీని గణనీయంగా పెంచే దిశగా కేంద్ర ప్రభుత్వం భారీ ముందడుగు వేసింది. రాబోయే రెండేళ్ల వ్యవధిలోనే పశ్చిమ బెంగాల్‌లో నాలుగు సరికొత్త విమానాశ్రయాలను అభివృద్ధి చేయనున్నట్లు కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు ప్రకటించారు.
-
చర్రా (పురూలియా జిల్లా – Charra in Purulia):రెండో ప్రపంచ యుద్ధ కాలం నాటి ఎయిర్‌స్ట్రిప్ కలిగిన ఈ ప్రాంతం అభివృద్ధి చెందితే పురూలియా పారిశ్రామిక ప్రాంతంతో పాటు అయోధ్యా హిల్స్ వంటి ప్రముఖ పర్యాటక ప్రాంతాలకు కనెక్టివిటీ భారీగా పెరుగుతుంది.
-
కలైకుండ (పశ్చిమ మేదినీపూర్ జిల్లా – Kalaikunda in Paschim Medinipur):పారిశ్రామిక వాడలకు, విద్యా సంస్థలకు నెలవైన పశ్చిమ మేదినీపూర్ ప్రాంత వాసులకు ఈ విమానాశ్రయం అందుబాటులోకి రానుంది.
-
బాలూర్‌ఘాట్ (దక్షిణ దినాజ్‌పూర్ జిల్లా – Balurghat in Dakshin Dinajpur):ఉత్తర బెంగాల్, దక్షిణ బెంగాల్ ప్రాంతాల మధ్య రాకపోకలను సులభతరం చేసేందుకు ఇది అత్యంత కీలకం కానుంది.
-
హసిమారా (అలీపుర్‌దువార్ జిల్లా – Hasimara in Alipurduar):డూయార్స్ (Dooars) అటవీ ప్రాంతం, ప్రముఖ పర్యాటక కేంద్రాలకు దేశీయ, విదేశీ పర్యాటకుల రాకపోకలను ప్రోత్సహించేందుకు ఇక్కడ సివిల్ ఎన్‌క్లేవ్ ఏర్పాటు కానుంది. రాష్ట్ర ప్రభుత్వం భూమి కేటాయింపులు, మౌలిక సదుపాయాలను సమకూర్చనుండగా.. ఎయిర్‌పోర్ట్స్ అథారిటీ ఆఫ్ ఇండియా (AAI) రన్‌వేలు, టెర్మినల్ నిర్మాణాలు, విమాన రాకపోకల నిర్వహణ బాధ్యతలను పర్యవేక్షించనుంది.
కోల్‌కతాకు రెండో ఎయిర్పోర్ట్ అవసరం – కేంద్రం ఆకాంక్ష..
తూర్పు భారతదేశంలో పెరుగుతున్న విమానయాన రవాణా డిమాండ్‌ను తట్టుకోవడానికి కోల్‌కతా నగరానికి రెండో విమానాశ్రయం (Second Airport for Kolkata) తప్పనిసరిగా ఉండాలని కేంద్రం భావిస్తోందని రామ్మోహన్ నాయుడు స్పష్టం చేశారు. దీనికి సంబంధించి భూ సేకరణ, ఇతర సాధ్యాసాధ్యాలపై రాష్ట్ర ప్రభుత్వం చొరవ చూపాలని సూచించారు.
ఉడాన్ ద్వారా ₹29,000 కోట్ల భారీ వ్యయం..
పశ్చిమ బెంగాల్‌లో పౌర విమానయాన నెట్‌వర్క్‌ను విస్తరించేందుకు రాబోయే పదేళ్లలో ‘ఉడాన్’ పథకం కింద ఏకంగా రూ. 29,000 కోట్లు ఖర్చు చేయనున్నట్లు మంత్రి ప్రకటించారు.రాష్ట్రంలో ఏవియేషన్ రంగంలోకి ప్రైవేట్ పెట్టుబడులను పెద్ద ఎత్తున ఆకర్షించేందుకు పశ్చిమ బెంగాల్ ప్రభుత్వం తక్షణమే ఒక సమగ్రమైన నూతన పౌర విమానయాన విధానాన్ని (New Civil Aviation Policy) తీసుకురావాలని రామ్మోహన్ నాయుడు విజ్ఞప్తి చేశారు. ఈ సరికొత్త ప్రాజెక్టులతో పశ్చిమ బెంగాల్‌లో పర్యాటకం ఊపందుకోవడమే కాకుండా, స్థానిక యువతకు భారీగా ఉపాధి అవకాశాలు లభిస్తాయని కేంద్ర పౌర విమానయాన శాఖ ధీమా వ్యక్తం చేసింది.