KTR: హైదరాబాద్లోని సరూర్నగర్ ఇండోర్ స్టేడియంలో జరిగిన బీఆర్ఎస్ ‘యువ సంగ్రామ సభ’ తెలంగాణ రాజకీయాల్లో తీవ్ర దుమారం రేపుతోంది. ఈ సభలో బీఆర్ఎస్ వర్కింగ్ ప్రెసిడెంట్ కేటీఆర్ పాల్గొని, కాంగ్రెస్ ప్రభుత్వంపై, ముఖ్యంగా సీఎం రేవంత్ రెడ్డి ఇంకా రాహుల్ గాంధీ లక్ష్యంగా తీవ్రస్థాయిలో విరుచుకుపడ్డారు. ఎన్నికల ముందు నిరుద్యోగులకు ఇచ్చిన హామీలను కాంగ్రెస్ ప్రభుత్వం పూర్తిగా అటకెక్కించిందని ఆయన మండిపడ్డారు.
1. కేటీఆర్ పొలిటికల్ సవాల్: 70 వేల ఉద్యోగాలు నిరూపిస్తే రాజీనామా!
కాంగ్రెస్ ప్రభుత్వం అధికారంలోకి వచ్చిన తర్వాత కొత్తగా 70 వేల ఉద్యోగాల నోటిఫికేషన్లు ఇచ్చి, భర్తీ చేసినట్లు అధికారికంగా నిరూపిస్తే.. తాను శాశ్వతంగా రాజకీయాల నుంచి తప్పుకుంటానని కేటీఆర్ సంచలన సవాల్ విసిరారు.
ఆ విషయాన్ని రుజువు చేస్తే రేవంత్ రెడ్డితో పాటు రాహుల్ గాంధీకి కూడా జై కొడతానన్నారు. గత బీఆర్ఎస్ ప్రభుత్వం ఇచ్చిన నోటిఫికేషన్లను, పూర్తి చేసిన ఉద్యోగాల ప్రక్రియను తమ ఖాతాలో వేసుకుంటూ కాంగ్రెస్ నేతలు డబ్బా కొట్టుకుంటున్నారని ఆరోపించారు.
2. మొహబ్బత్ కా దుకాణ్ కాదు.. అది మోసాల దుకాణం
ఎన్నికల ముందు రాహుల్ గాంధీ అశోక్ నగర్కు వచ్చి నిరుద్యోగులతో ‘చాయ్ పే చర్చ’ చేసిన విషయాన్ని కేటీఆర్ గుర్తుచేశారు. రాహుల్ గాంధీది ప్రేమ దుకాణం (మొహబ్బత్ కా దుకాణ్) కాదని, అది నిఖార్సైన ‘మోసాల దుకాణం’ అని ఎద్దేవా చేశారు.
ఎన్నికల ముందు యువతకు ఆశ చూపి గద్దెనెక్కిన కాంగ్రెస్.. తాము ప్రాగ్దాఫ్ చేసిన 2 లక్షల ఉద్యోగాల హామీని, జాబ్ క్యాలెండర్ను ఎందుకు అమలు చేయడం లేదని నిలదీశారు. క్యాలెండర్లు మారుతున్నా నిరుద్యోగుల బతుకులు మారడం లేదన్నారు.
3. యూత్ డిక్లరేషన్ కాదు.. కాంగ్రెస్కు ‘డెత్ డిక్లరేషన్’!
ప్రియాంకా గాంధీ, రాహుల్ గాంధీ సమక్షంలో ప్రకటించిన ‘యూత్ డిక్లరేషన్’ కేవలం ఒక పెద్ద బూటకమని కేటీఆర్ తేల్చిచెప్పారు. నిరుద్యోగులకు నెలకు ఇస్తామన్న రూ. 4,000 భృతి, యువతులకు ఎలక్ట్రిక్ స్కూటీల వాగ్దానం ఏ తీరానికి చేరాయని ప్రశ్నించారు.
నిరుద్యోగ యువతను నట్టేట ముంచినందుకు గాను.. రాబోయే రోజుల్లో అదే యువత కాంగ్రెస్ పార్టీకి రాజకీయంగా ‘డెత్ డిక్లరేషన్’ (రాజకీయ పతనం) రాసేందుకు సిద్ధంగా ఉన్నారని హెచ్చరించారు. తెలంగాణలో ఇప్పుడు నోటిఫికేషన్లు లేవని.. కేవలం ‘లూటిఫికేషన్లే’ నడుస్తున్నాయని ధ్వజమెత్తారు.
4. ఓటుకు నోటు.. ఇప్పుడేమో వెన్నుపోటు!
-
రేవంత్ రెడ్డిపై వ్యంగ్యాస్త్రాలు: నాడు ఓటుకు నోటు కేసులో దొరికిన రేవంత్ రెడ్డి, నేడు అధికారం ఇచ్చి గెలిపించిన ఓటర్లకే వెన్నుపోటు పొడుస్తున్నారని కేటీఆర్ ఆరోపించారు.
-
హిట్లర్ కంటే దారుణంగా..: అదనంగా 20 వేల ఉద్యోగాలు అడిగితే నిరుద్యోగులను కించపరిచేలా మాట్లాడటం రేవంత్ రెడ్డి అహంకారానికి నిదర్శనమన్నారు. రేవంత్ రెడ్డికి పదవి ఇచ్చింది తెలంగాణ యువతకు ఉద్యోగాలు ఇవ్వడానికా లేక రాహుల్ గాంధీని పీఎం చేయడం కోసమా అని ప్రశ్నించారు. రేవంత్ రెడ్డి క్లైమాక్స్ హిట్లర్ కంటే దారుణంగా ఉంటుందని హెచ్చరించారు.
“రేవంత్ రెడ్డీ.. ఇప్పటిదాకా ఒక లెక్క, ఈ యువ సంగ్రామ సభ నుంచి మరో లెక్క. యువ గళాలు గర్జిస్తే కుర్చీలు కూలిపోవడం ఖాయం. తెలంగాణ ఏమైనా మీ అయ్యా జాగీరా?” అని కేటీఆర్ తీవ్ర పదజాలంతో హెచ్చరించారు. యువత తరఫున బీఆర్ఎస్ పోరాటం ఇకపై మరింత ఉధృతం అవుతుందని స్పష్టం చేశారు.