Madhushravani Festival: భారతదేశం విభిన్న మతాలు, సంస్కృతులతో విలసిల్లుతున్న గొప్ప దేశం. ఇక్కడ అడుగడుగునా సరికొత్త పండుగలు, వాటికి సంబంధించిన ఆసక్తికరమైన ఆచార వ్యవహారాలు కనిపిస్తూ ఉంటాయి. అలాంటి ఒక ప్రత్యేకమైన పండుగను బీహార్లోని మిథిలాంచల్ ప్రాంతంలో ఎంతో భక్తిశ్రద్ధలతో జరుపుకుంటారు. దీనిని ‘మధుశ్రావణి వ్రతం’ (Madhushravani Vrat) అని పిలుస్తారు. వివాహమైన తర్వాత వచ్చే మొదటి శ్రావణ మాసంలో (సావన్) నూతన వధువు ఈ వ్రతాన్ని ఆచరించడం ఇక్కడి ఆనవాయితీ.
అసలు ‘మధుశ్రావణి పర్వదినం’ అంటే ఏంటి?
జ్యోతిష్య నిపుణుల ప్రకారం, మధుశ్రావణి అనేది కేవలం ఒక వ్రతం మాత్రమే కాదు.. అది మిథిల సంస్కృతికి అద్దం పట్టే ఒక పవిత్రమైన సాంప్రదాయం. పెళ్లయిన కొత్త కోడలు తన భర్త ఆయురారోగ్యాల కోసం, అఖండ సౌభాగ్యం కోసం ఈ కఠినమైన తపస్సును చేస్తుంది.
-
శివ-పార్వతుల పూజ: ఈ పండుగ పరమశివుడు, పార్వతీ దేవిల పట్ల ఉన్న అచంచలమైన భక్తికి, శ్రద్ధకు నిదర్శనంగా నిలుస్తుంది.
-
13 నుండి 15 రోజుల వ్రతం: ఈ వ్రతాన్ని దాదాపు 13 నుండి 15 రోజుల పాటు భక్తిశ్రద్ధలతో ఆచరిస్తారు. శ్రావణ మాసంలోని కృష్ణ పక్ష పంచమి తిథి నాడు ప్రారంభమయ్యే ఈ వ్రతం.. శ్రావణ శుక్ల పక్ష తృతీయ తిథి వరకు కొనసాగుతుంది.
-
నాగదేవత ఆరాధన: ఈ పూజలో శివపార్వతులతో పాటు నాగదేవతను, మనసా దేవిని కూడా ప్రత్యేకంగా ఆరాధిస్తారు.
కఠినమైన ‘టేమి దాగనా’ ఆచారం.. దాని అర్థం ఏంటి?
ఈ వ్రతం చేసే సమయంలో అత్యంత కఠినమైన, అత్యంత ముఖ్యమైన ఒక ఆచారాన్ని పాటిస్తారు. దానినే ‘టేమి దాగనా’ (Temi Dagna) అంటారు. దీనిని వ్రతం ముగిసే చివరి రోజున నిర్వహిస్తారు.
-
కాల్చే పద్ధతి: ‘టేమి’ అంటే పత్తి లేదా కాటన్ గుడ్డతో చేసిన ఒక ప్రత్యేకమైన వత్తి. దీనిని కర్పూరం లేదా నూనెలో ముంచి వెలిగిస్తారు.
-
మోకాళ్లకు స్పర్శ: మధుశ్రావణి పూజ చివరి రోజున, వెలుగుతున్న ఈ వత్తితో నూతన వధువు మోకాళ్లను మరియు పాదాలను తాకిస్తారు. ఆ సమయంలో వధువు కళ్లను తమలపాకులతో (పాన్ ఆకులు) మూసివేస్తారు.
-
నమ్మకం: ఈ ప్రక్రియ చేస్తున్నప్పుడు మహిళ కాళ్లు లేదా మోకాళ్లపై వేడి తగిలి బొబ్బలు (పొక్కులు) వస్తే.. ఆమె భర్త ఆయుష్షు అంతగా పెరుగుతుందని ఇక్కడి ప్రజలు బలంగా నమ్ముతారు.
సంకల్పానికి పరీక్ష!
ఈ సాంప్రదాయం నూతన వధువుకు కేవలం శారీరక కష్టాన్ని ఇవ్వడానికి పెట్టింది కాదు. రాబోయే వైవాహిక జీవితంలో ఎదురయ్యే కష్టసుఖాలను, ఒడిదుడుకులను చిరునవ్వుతో ఎదుర్కొనేలా ఆమె అంతర్గత సంకల్పాన్ని, ధైర్యాన్ని పరీక్షించడానికి చేసే ఒక ఆచారంగా దీనిని భావిస్తారు. ఈ ఆచారం నూతన వధువు ఓర్పుకు, భర్తపై ఆమెకున్న ప్రేమ ఇంక సమర్పణ భావానికి ప్రతీకగా నిలుస్తుంది.