BreastFeeding: నవజాత శిశువుల ఆరోగ్యకరమైన ఎదుగుదలకు తల్లిపాలు (Breastfeeding) ఎంతో అవసరం. ఇది బిడ్డకు రోగనిరోధక శక్తిని అందించడమే కాకుండా, శారీరక, మానసిక వికాసానికి అమృతంలా పనిచేస్తుంది. అయితే, దురదృష్టవశాత్తూ మన సమాజంలో తల్లిపాలు ఇవ్వడంపై అనేక రకాల అపోహలు, నమ్మకాలు ప్రచారంలో ఉన్నాయి. వీటిని చాలామంది ఎలాంటి ఆలోచన లేకుండా నమ్మేస్తుంటారు. కానీ, వీటికి ఎలాంటి శాస్త్రీయ ఆధారాలు లేవు. మరి ఆ అపోహల వెనుక ఉన్న అసలు నిజాలేంటో ఇప్పుడు క్షుణ్ణంగా తెలుసుకుందాం.
అపోహ 1: తల్లి అనారోగ్యంతో ఉంటే పాలు ఇవ్వకూడదు
నిజం: తల్లికి ఏదైనా చిన్నపాటి అనారోగ్యం (జలుబు, జ్వరం వంటివి) వస్తే బిడ్డకు పాలు ఇవ్వకూడదని చాలామంది భావిస్తారు. కానీ ఇది పూర్తిగా తప్పు. తల్లికి వచ్చిన వ్యాధి రకం మరియు తీవ్రతపైనే ఇది ఆధారపడి ఉంటుంది. చాలా సందర్భాలలో సాధారణ జబ్బుల వల్ల తల్లిపాలు ఆపాల్సిన అవసరం లేదు. దీనిపై పూర్తి స్పష్టత కోసం ఒకసారి వైద్యులను సంప్రదించి సలహా తీసుకోవడం ఉత్తమం.
అపోహ 2: తల్లిపాలు తాగే పిల్లలకు బయటి ఆహారం అలవాటు చేయడం కష్టం
నిజం: తల్లిపాలు తాగే పిల్లలకు ఏడాది దాటిన తర్వాత బయటి ఆహార పదార్థాలను అలవాటు చేయడం కష్టమవుతుందని చెప్పడానికి ఎలాంటి ఆధారాలు లేవు. నిజానికి, కనీసం రెండు సంవత్సరాల వయస్సు వచ్చేంత వరకు బిడ్డకు తల్లిపాలు అందించడం వల్ల అటు తల్లికి, ఇటు బిడ్డకు ఇద్దరికీ ఎన్నో ఆరోగ్య ప్రయోజనాలు చేకూరుతాయని వైద్య శాస్త్రం నిరూపించింది.
అపోహ 3: బ్రెస్ట్ఫీడింగ్ అనేది చాలా సులభమైన ప్రక్రియ
నిజం: పిల్లలు పుట్టడమే పాలు తాగడం నేర్చుకుని పుడతారని, కాబట్టి పాలు ఇవ్వడం చాలా సులభమని అనుకుంటారు. కానీ ఇందులో పూర్తిగా నిజం లేదు. బిడ్డకు సరిగ్గా పాలు పట్టడానికి సరైన పద్ధతి (Technique) చాలా ముఖ్యం. పాలు ఇచ్చేటప్పుడు తల్లి కూర్చునే భంగిమ (Position), బిడ్డ తల్లి రొమ్మును సరిగ్గా నోటితో పట్టుకుంటున్నాడా (Latch) లేదా అనే విషయాలపై అవగాహన అవసరం. దీనికోసం నవవధువులకు కొంత సమయం, సాధన అవసరమవుతాయి.
అపోహ 4: పాలు ఇచ్చే ముందు నిపుల్స్ను కడగడం తప్పనిసరి
నిజం: బిడ్డ పుట్టినప్పటి నుంచే తల్లి యొక్క శరీర వాసనను, స్వరాన్ని గుర్తుపట్టగలదు. నిపుల్స్ (చనుమొనల) భాగం నుండి సహజంగా విడుదలయ్యే కొన్ని స్రావాలు బిడ్డకు మేలు చేసే ‘మంచి బ్యాక్టీరియా’ (Good Bacteria)ను కలిగి ఉంటాయి. వీటివల్ల శిశువుకు ఎలాంటి హాని జరగదు. కాబట్టి పాలు ఇచ్చే ప్రతిసారీ వాటిని ప్రత్యేకంగా కడగాల్సిన అవసరం లేదు.
అపోహ 5: వ్యాయామం చేయడం వల్ల తల్లిపాలపై ప్రభావం పడుతుంది
నిజం: ప్రసవం తర్వాత తల్లులు వ్యాయామం (Exercise) చేయడం వల్ల తల్లిపాల ఉత్పత్తిపై ఎలాంటి ప్రతికూల ప్రభావం పడదు. వ్యాయామం చేయడం వల్ల పాలు తగ్గిపోతాయని లేదా పాల రుచి మారిపోతుందని అనుకోవడం కేవలం భ్రమ మాత్రమే.
అపోహ 6: పాలు ఇచ్చే తల్లులు కేవలం చప్పని (సాధారణ) ఆహారమే తినాలి
నిజం: బ్రెస్ట్ఫీడింగ్ చేసే తల్లులు మసాలాలు లేని కేవలం సాదా ఆహారమే తీసుకోవాలనేది ఒక పెద్ద అపోహ. బాలింతలు అన్ని పోషకాలు ఉన్న సమతుల్య ఆహారం (Balanced Diet) తీసుకోవడం చాలా ముఖ్యం. అంతేకాకుండా, శిశువు తల్లి గర్భంలో ఉన్నప్పటి నుంచే తల్లి తినే ఆహార రుచులను, అలవాట్లను అర్థం చేసుకునే ప్రక్రియ మొదలవుతుంది. కాబట్టి పరిమితంగా అన్ని రకాల పోషకాహారాలను తీసుకోవచ్చు.
అపోహ 7: కాన్పు అయిన వెంటనే పాలు ఇవ్వకపోతే.. తర్వాత ఇవ్వడం అస్సలు సాధ్యం కాదు
నిజం: బిడ్డ పుట్టిన వెంటనే తల్లిపాలు ఇవ్వడం ప్రారంభించడం వల్ల ఆ ప్రక్రియ సులువవుతుందనేది నిజమే. కానీ, ఒకవేళ ఏదైనా కారణం చేత వెంటనే పాలు ఇవ్వడం కుదరకపోతే, ఇక ఎప్పటికీ పాలు ఇవ్వలేరనడం ముమ్మాటికీ అబద్ధం. ఆ తర్వాత కూడా తల్లి, బిడ్డల మధ్య ‘స్కిన్-టు-స్కిన్ కాంటాక్ట్’ (చర్మ స్పర్శ)ను పెంచడం ద్వారా శిశువుకు పాలు పట్టడం అలవాటు చేయవచ్చు.