Missing Case: సికింద్రాబాద్ రైల్వే స్టేషన్లో మూడేళ్ల బాలుడు నిఖిల్ కిడ్నాప్ అయిన ఉదంతం నగరంలో తీవ్ర కలకలం రేపిన సంగతి తెలిసిందే. తన అమ్మమ్మతో కలిసి ఊరు వెళ్లేందుకు స్టేషన్కు వచ్చిన సదరు బాలుడిని, అర్ధరాత్రి వేళ గుర్తుతెలియని దుండగుడు అపహరించుకుపోయాడు. బాలుడి రక్షణ కోసం అమ్మమ్మ తన కొంగుకు నిఖిల్ను కట్టుకుని ప్లాట్ఫారమ్పై నిద్రించినప్పటికీ, నిందితుడు అత్యంత చాకచక్యంగా బాలుడిని ఎత్తుకెళ్లడం ఇక్కడి భద్రతా లోపాలను ఎత్తిచూపింది. ఈ దారుణానికి సంబంధించిన దృశ్యాలు రైల్వే స్టేషన్లోని సీసీటీవీ కెమెరాల్లో స్పష్టంగా రికార్డయ్యాయి.
ఈ కేసుకు సంబంధించి పోలీసులు జరిపిన ప్రాథమిక విచారణలో ఒక కీలక విషయం వెలుగుచూసింది. కిడ్నాప్కు పాల్పడటానికి ముందు నిందితుడు సికింద్రాబాద్ పరిసరాల్లోని ఒక ఓయో (OYO) రూమ్లో బస చేసినట్లు అధికారులు గుర్తించారు. అయితే, ఎలాంటి గుర్తింపు కార్డులు లేదా సరైన ఐడెంటిటీ ప్రూఫ్స్ ఇవ్వకుండానే నిందితుడు ఆ గదిని పొందినట్లు తెలిసింది. ఈ ఘటన జరిగి 12 రోజులు గడుస్తున్నా బాలుడి ఆచూకీ లభించకపోవడంతో తల్లిదండ్రులు తీవ్ర ఆందోళన చెందారు. సీసీటీవీ ఫుటేజీలో కిడ్నాపర్ ముఖం అంత స్పష్టంగా కనిపిస్తున్నా పోలీసులు అతడిని పట్టుకోలేకపోవడంపై కుటుంబ సభ్యులు మొదట తీవ్ర ఆగ్రహం, ఆవేదన వ్యక్తం చేశారు.
ఈ నేపథ్యంలో బాలుడి తల్లి హేమ కన్నీరుమున్నీరవుతూ పోలీసుల తీరుపై నిరసన వ్యక్తం చేశారు. తమకు ఆసరాగా ఎవరూ లేరని, తన తల్లితో కలిసి జీవిస్తున్నానని చెబుతూ.. బాబు కనిపించకుండా పోయి ఇన్ని రోజులవుతున్నా దర్యాప్తులో పురోగతి లేదని ఆవేదన చెందారు. స్టేషన్కు వెళ్లి అడిగితే అధికారులు బాధ్యతారాహిత్యంగా సమాధానం ఇస్తున్నారని, విచారణ వేగవంతం చేసి తన బిడ్డను తనకు క్షేమంగా అప్పగించాలని ఆమె డిమాండ్ చేశారు. మరోవైపు ఈ ఘోరం నేపథ్యంలో నిత్యం పదుల సంఖ్యలో దొంగతనాలు జరిగే సికింద్రాబాద్ రైల్వే స్టేషన్లో ప్రయాణికుల రక్షణపై తీవ్ర విమర్శలు వెల్లువెత్తాయి.
అయితే, ఎట్టకేలకు ఈ సికింద్రాబాద్ బాలుడి మిస్సింగ్ కేసు సుఖాంతమైంది. రైల్వే స్టేషన్ నుండి కిడ్నాపైన మూడేళ్ల బాలుడు నిఖిల్ సురక్షితంగా దొరకడంతో తల్లిదండ్రులు, బంధువులు ఊపిరి పీల్చుకున్నారు. సీసీటీవీ దృశ్యాలు, సాంకేతిక ఆధారాల సహాయంతో నిఘా పెట్టిన పోలీసులు.. జీడిమెట్లలోని ఓ హోటల్ దగ్గర కిడ్నాపర్ను చాకచక్యంగా అదుపులోకి తీసుకుని అరెస్ట్ చేశారు. బాలుడు సురక్షితంగా లభించడంతో బాధిత కుటుంబంలో పండగ వాతావరణం నెలకొంది.