NBK: టాలీవుడ్ అగ్ర కథానాయకుడు, హిందూపురం శాసనసభ్యుడు, గాడ్ ఆఫ్ మాసెస్ నందమూరి బాలకృష్ణ (Balakrishna) జన్మదినాన్ని పురస్కరించుకుని తెలుగు రాష్ట్రాలతో పాటు సోషల్ మీడియా వేదికగా అభిమానుల హంగామా అంబరాన్ని తాకింది. సినీ, రాజకీయ రంగాలకు చెందిన ప్రముఖులంతా బాలకృష్ణ కి పుట్టినరోజు శుభాకాంక్షలు తెలియజేస్తూ ఆయన సినిమా పోస్టర్లు, అరుదైన ఫోటోలను షేర్ చేస్తున్నారు. దీంతో ఇంటర్నెట్లో ‘#HappyBirthdayNBK’ హ్యాష్ ట్యాగ్ నేషనల్ లెవెల్లో ట్రెండ్ అవుతోంది.
1. “సినీ, రాజకీయ, సేవా రంగాల అజేయ శక్తి” – ఏపీ సీఎం చంద్రబాబు నాయుడు
ఏపీ ముఖ్యమంత్రి నారా చంద్రబాబు నాయుడు తన ఆప్తుడైన బాలకృష్ణకు ట్విట్టర్ (X) వేదికగా సుదీర్ఘమైన, భావోద్వేగ భరితమైన సందేశాన్ని పంచుకున్నారు:
“సినీ, రాజకీయ, సేవా రంగాలలో సరికొత్త రికార్డులు సృష్టిస్తూ అజేయంగా ముందుకువెళ్తోన్న పద్మభూషణుడు, నా ఆప్తుడు నందమూరి బాలకృష్ణకు జన్మదిన శుభాకాంక్షలు. ఐదు దశాబ్దాలుగా సినీ వినీలాకాశంలో ధ్రువతారగా వెలుగొందుతూ.. మాతృమూర్తి పేరుతో నెలకొల్పిన ‘బసవతారకం ఇండో అమెరికన్ క్యాన్సర్ హాస్పిటల్’ ఛైర్మన్గా అశేష జనానికి ఆపన్నహస్తం అందిస్తూ, హిందూపురం ప్రజలకు అండగా నిలుస్తూ మీరు సాగిస్తున్న జీవనయానం నిరంతరాయంగా కొనసాగాలని ఆకాంక్షిస్తున్నాను. నవరస నట సార్వభౌముడు, తెలుగువారి అన్న నందమూరి తారక రామారావు (NTR) దివ్య ఆశీస్సులు మీపై కలకాలం ఉండాలని కోరుకుంటున్నాను.”
2. “నిండైన తెలుగుదనం మా బాలా మావయ్య” – మంత్రి నారా లోకేశ్
ఏపీ రాష్ట్ర ఐటీ, విద్యాశాఖ మంత్రి నారా లోకేశ్ తన మావయ్యపై ఉన్న ప్రేమాభిమానాలను చాటుకుంటూ శుభాకాంక్షలు తెలిపారు. నిండైన తెలుగుదనం.. అభిమానం.. భోళాతనానికి ప్రతిరూపం మా బాలా మావయ్యకు హృదయపూర్వక పుట్టినరోజు శుభాకాంక్షలు. అభిమానుల పాలిట గాడ్ ఆఫ్ మాసెస్, క్యాన్సర్ బాధితులకు సాంత్వన చేకూర్చే ఆపన్నహస్తం, హిందూపురం ప్రజా విజేత అయిన బాలా మావయ్య ఆయురారోగ్యాలతో వందేళ్లు వర్ధిల్లాలని దేవుడిని ప్రార్థిస్తున్నట్లు లోకేశ్ పేర్కొన్నారు.
3. “మరిన్ని విజయాలు సాధించాలి” – డిప్యూటీ సీఎం పవన్ కల్యాణ్
ఆంధ్రప్రదేశ్ ఉపముఖ్యమంత్రి పవన్ కల్యాణ్ కూడా బాలకృష్ణకు ప్రత్యేకంగా శుభాకాంక్షలు తెలియజేశారు. “ప్రముఖ కథానాయకుడు, హిందూపురం శాసనసభ్యులు శ్రీ నందమూరి బాలకృష్ణకు హృదయపూర్వక జన్మదిన శుభాకాంక్షలు. కథానాయకుడిగా ఆయన మరిన్ని విజయాలు సాధించాలని, ప్రజాప్రతినిధిగా ప్రజలకు ఎన్నో సేవలు అందించాలని ఆకాంక్షిస్తున్నాను” అని పవన్ పేర్కొన్నారు.
4. “ధైర్యం, ఉదారతకు ప్రతీక” – నారా రోహిత్
యువ నటుడు నారా రోహిత్ ట్వీట్ చేస్తూ.. “బాలా మామకి పుట్టినరోజు శుభాకాంక్షలు. ధైర్యం, ఉదారత, నాయకత్వం, విధేయత, మానవత్వం, గొప్పతనానికి మీరు నిలువెత్తు ప్రతీక. మీరు ఎప్పుడూ సంతోషంగా, ఆరోగ్యంగా ఉండాలి” అని కోరుకున్నారు.
5. దర్శకుల సందడి – ‘డాకు మహారాజ్’, ‘NBK111’ అప్డేట్స్!
బాలకృష్ణతో సినిమాలు చేస్తున్న స్టార్ డైరెక్టర్లు ఆయన పుట్టినరోజున తమ వర్కింగ్ ఎక్స్పీరియన్స్ను పంచుకుంటూ క్రేజీ కామెంట్స్ చేశారు.
-
దర్శకుడు బాబీ (నా డాకు మహారాజ్): “అంతులేని ఉత్సాహానికి రూపం ఉంటే మీలానే ఉంటుంది సర్. మీతో కలిసి పనిచేయడం, సినిమాపై మీకున్న నిబద్ధతను చూడడం నా అదృష్టం. ఈ అద్భుత జ్ఞాపకాలకు, స్ఫూర్తికి, ప్రోత్సాహానికి ధన్యవాదాలు. భవిష్యత్తులో మరెన్నో బ్లాక్బస్టర్లు అందుకోవాలి. నా ‘డాకు మహారాజ్’ (Daaku Maharaaj)కు పుట్టినరోజు శుభాకాంక్షలు” అంటూ విష్ చేశారు.
-
దర్శకుడు గోపిచంద్ మలినేని (NBK111): “బాలయ్య బాబుకు జన్మదిన శుభాకాంక్షలు. మీ గురించి తెలుసుకోవడం, మీతో కలిసి పనిచేసే అవకాశం లభించడం నా లైఫ్ టైమ్ అదృష్టం. చిన్న పిల్లలపై చూపినట్లు మీరు చూపే ఆప్యాయత, అనురాగం ప్రతి ఒక్కరూ తమ జీవితంలో ఒక్కసారైనా చూడాలి. మన కాంబినేషన్లో వస్తున్న ‘#NBK111’ సినిమా అభిమానులకు కచ్చితంగా నచ్చుతుంది. వారు కోరుకుంటున్న అన్ని మాస్ ఎలిమెంట్స్ ఇందులో ఉంటాయి” అని ధీమా వ్యక్తం చేశారు.