Emergency Alert: శనివారం ఉదయం 11:41 గంటలకు దేశంలోని మొబైల్ వినియోగదారులందరూ ఒక్కసారిగా ఉలిక్కిపడ్డారు. అన్ని ఫోన్లలోనూ పెద్ద శబ్దంతో కూడిన బీప్ సౌండ్ రావడంతో పౌరులు ఆందోళనకు గురయ్యారు. అయితే, ఇది ప్రమాద సంకేతం కాదని, భారత ప్రభుత్వం చేపట్టిన ‘ఎమర్జెన్సీ అలర్ట్ సిస్టమ్’ పరీక్ష అని తెలియడంతో అందరూ ఊపిరి పీల్చుకున్నారు.
ఏమిటీ ఎమర్జెన్సీ మెసేజ్?
భారత ప్రభుత్వం విపత్తుల సమయంలో పౌరులను తక్షణమే అప్రమత్తం చేయడానికి ‘సెల్ బ్రాడ్కాస్ట్’ అనే స్వదేశీ సాంకేతికతను అభివృద్ధి చేసింది. ఈ వ్యవస్థ పనితీరును తనిఖీ చేయడంలో భాగంగా శనివారం ఉదయం ఒక టెస్ట్ మెసేజ్ను పంపింది.
-
ముఖ్య ఉద్దేశం: భూకంపాలు, సునామీలు లేదా ఇతర ప్రకృతి వైపరీత్యాలు సంభవించినప్పుడు క్షణాల్లో ప్రజలందరికీ సమాచారాన్ని చేరవేయడం.
-
ప్రభుత్వ ప్రకటన: “ఇది కేవలం ఒక పరీక్షా సందేశం మాత్రమే. దీనివల్ల ఎవరూ భయపడాల్సిన అవసరం లేదు, అలాగే ఎలాంటి చర్యలు తీసుకోవాల్సిన పనిలేదు” అని ప్రభుత్వం స్పష్టం చేసింది.
అమిత్ షా సమక్షంలో ప్రారంభం
కేంద్ర హోం మంత్రి అమిత్ షా, ఐటీ శాఖ మంత్రి జ్యోతిరాదిత్య సింధియా సమక్షంలో 2026 మే 2న ఈ మొబైల్ ఆధారిత విపత్తు సమాచార వ్యవస్థను అధికారికంగా ప్రారంభించారు. టెలికమ్యూనికేషన్ల విభాగం (DoT) మరియు జాతీయ విపత్తు నిర్వహణ అథారిటీ (NDMA) సంయుక్తంగా ఈ ప్రాజెక్టును రూపొందించాయి.
రాష్ట్రాల విపత్తు నిర్వహణ కార్యదర్శులు, హోం గార్డుల అధిపతుల వార్షిక సమావేశం జరుగుతుండగా, అమిత్ షా సమక్షంలోనే ఈ ప్రయోగాత్మక హెచ్చరికను మొబైల్స్కు పంపారు.
ఎందుకీ వ్యవస్థ అవసరం?
క్లిష్ట పరిస్థితుల్లో ప్రజల ప్రాణాలను కాపాడటానికి సమాచారం వేగంగా చేరడం చాలా ముఖ్యం. ప్రస్తుతం అందరి చేతుల్లోనూ స్మార్ట్ఫోన్లు ఉంటున్నాయి కాబట్టి, అత్యవసర సమాచారాన్ని పంపడానికి ఇదే అత్యుత్తమ సాధనమని ప్రభుత్వం భావిస్తోంది. ఇంటర్నెట్ లేకపోయినా, ఫోన్ సైలెంట్ మోడ్లో ఉన్నా కూడా ఈ అలర్ట్ సౌండ్ వినిపించేలా ఈ టెక్నాలజీని డిజైన్ చేశారు.