Viral News: విధి నిర్వహణలో నీతిగా ఉండాల్సిన ఓ ఆర్టీసీ అధికారి అవినీతికి పాల్పడటంతో ప్రయాణికులు ఆగ్రహంతో ఊగిపోయారు. టికెట్ లేని ప్రయాణికుడిని సాకుగా చూపి, కండక్టర్ను భయపెట్టి డబ్బులు వసూలు చేయాలని చూసిన సదరు అధికారిని నడిరోడ్డుపై నిలదీసి చెప్పులతో కొట్టిన ఘటన సంచలనం సృష్టించింది.
అసలేం జరిగింది?
నారాయణఖేడ్ డిపోకు చెందిన బస్సు హైదరాబాద్ నుండి రాయికోడ్ మీదుగా వెళ్తుండగా, రాయికోడ్ బస్టాండ్ వద్ద చెకింగ్ అధికారులు తనిఖీలు చేపట్టారు. ఈ క్రమంలో ఒక ప్రయాణికుడు టికెట్ తీసుకోలేదని అధికారి ప్రకాష్ గుర్తించారు. నిబంధనల ప్రకారం ప్రయాణికుడికి జరిమానా విధించి, కండక్టర్పై శాఖాపరమైన చర్యలు తీసుకోవాలి. కానీ, ప్రకాష్ మాత్రం దీనిని క్యాష్ చేసుకోవాలని చూశారు.
రూ. 20 వేల లంచం డిమాండ్
ప్రయాణికుడిపై కేసు నమోదు చేయకుండా, కండక్టర్కు నోటీసులు ఇవ్వకుండా ఉండాలంటే తనకు రూ. 20,000 లంచం ఇవ్వాలని ప్రకాష్ డిమాండ్ చేశారు. ఈ వ్యవహారాన్ని గమనిస్తున్న తోటి ప్రయాణికులు మరియు కండక్టర్ ఒక్కసారిగా ఆగ్రహానికి లోనయ్యారు. బహిరంగంగా లంచం అడుగుతారా అంటూ రాయికోడ్ పోలీస్ స్టేషన్ సమీపంలోనే తనిఖీ అధికారి వాహనాన్ని అడ్డుకున్నారు.
నడిరోడ్డుపై దేహశుద్ధి
వాహనంలో కూర్చున్న ప్రకాష్ను కాలర్ పట్టుకుని బయటకు లాగిన ప్రయాణికులు, కండక్టర్ అతడిపై దాడికి దిగారు.
-
చెప్పులతో దాడి: కోపం తట్టుకోలేక కండక్టర్ తన చెప్పు తీసి అధికారిని కొట్టగా, వెంటనే మిగిలిన ప్రయాణికులు కూడా అదే రీతిలో స్పందించారు.
-
సోషల్ మీడియాలో వైరల్: ఈ గొడవ మొత్తాన్ని అక్కడి వారు వీడియో తీయడంతో అది కాస్తా క్షణాల్లో వైరల్ అయ్యింది. లంచం అడిగిన అధికారికి తగిన శాస్తి జరిగిందని నెటిజన్లు కామెంట్స్ చేస్తున్నారు.
పోలీసులకు ఫిర్యాదు
ఈ ఘటనతో ఆ ప్రాంతంలో కాసేపు ఉద్రిక్తత నెలకొంది. లంచం డిమాండ్ చేసి తమను ఇబ్బందులకు గురిచేసిన అధికారి ప్రకాష్పై పోలీసులకు ఫిర్యాదు చేసేందుకు కండక్టర్ మరియు ప్రయాణికులు సిద్ధమయ్యారు.